TE WI e luku san pasa bifo Yesus taki den wortu di skrifi na tapusei, dan dati e sori san ben de a moro prenspari sani na ini en libi. A heri mamanten, Yesus nanga den disipel fu en ben waka na ini a bergikontren fu Samaria (Yohanes 4:6). Fu di den disipel ben e denki taki angri ben musu fu kiri Yesus now, meki den ben wani gi en nyanyan (Yohanes 4:31-33). A piki fu Yesus e sori san ben de a moro prenspari sani na ini en libi. Fu du a wroko fu Gado, ben de moro prenspari leki nyanyan gi en. Den sani di Yesus taki èn du, ben sori taki a ben e libi fu du a wani fu Gado. San disi ben wani taki?

Kownukondre Bijbel e taki fu a wroko di Yesus ben e du: ’A waka lontu na ini heri Galilea, aladi a ben e gi leri . . . èn preiki a bun nyunsu fu a kownukondre’ (Mateyus 4:23). Yesus no ben preiki noso fruteri trawan nomo fu Gado Kownukondre. Te a ben gi sma leri, dan a ben taigi den san den ben musu du, a ben fruklari sani gi den, èn a ben overtoigi den fu di a ben taki-go-taki-kon nanga den. A moro prenspari sani di Yesus ben e taki fu en, ben de a Kownukondre.

Na ini a diniwroko fu Yesus, a ben leri den arkiman fu en san na Gado Kownukondre èn san a o du. Luku den tru tori di abi fu du nanga a Kownukondre, èn den Bijbeltekst di e sori san Yesus ben taki fu a Kownukondre.

• Gado Kownukondre na wan tirimakti na ini hemel, èn Yesus na a sma di Yehovah poti leki Kownu.​—MATEYUS 4:17; YOHANES 18:36.

• A Kownukondre o meki a nen fu Gado kon santa èn a o meki a wani fu Gado pasa na grontapu soleki fa a e pasa na hemel.​—MATEYUS 6:9, 10.

• Na ondro a tiri fu Gado Kownukondre, heri grontapu o kenki kon tron wan paradijs.​—LUKAS 23:42, 43.

• Heri esi Gado Kownukondre o kon èn a o meki taki den sani di Gado wani gi grontapu, kon tru. *​—MATEYUS 24:3, 7-12.

Sma ben sabi Yesus moro leki „Leriman” (Yohanes 13:13). Ma na ini den dri nanga afu yari fu en diniwroko, a ben du wan tu bigi wondru. Tu prenspari reide de fu san ede a ben du den wondru disi. A fosi reide ben de taki den wondru ben sori taki na Gado trutru seni en kon (Mateyus 11:2-6). A di fu tu reide ben de taki den wondru ben sori san a ben o du leki Kownu fu Gado Kownukondre na heri grontapu na ini a ten di e kon. Luku wan tu fu den wondru di a ben du.

• A ben meki wan krasi se kon tiri, èn a ben meki wan bigi winti saka.​—MARKUS 4:39-41.

• A ben dresi siki sma, soleki den brenisma, den dofusma nanga den malengrisma.​—LUKAS 7:21, 22.

• Na wan wondru fasi a ben meki nyanyan kon moro furu, so taki ipi-ipi sma di ben abi angri, ben kan nyan.​—MATEYUS 14:17-21; 15:34-38.

• Na dri okasi, a ben gi dedesma wan opo baka.​—LUKAS 7:11-15; 8:41-55; YOHANES 11:38-44.

Prakseri fa a libi ben o de na grontapu te so wan makti Kownu ben o tiri!

A moro bun sma di ben kan leri trawan fu Yehovah Gado, na en eigi Manpikin di sma ben kon sabi leki Yesus Krestes. Yesus di de „a fosiwan fu ala sani di Gado meki”, ben libi ini hemel makandra nanga Yehovah moro langa leki iniwan tra yeye (Kolosesma 1:15). Prakseri den okasi di a ben abi fu leri fa en Tata e denki, èn fu leri a wani fu En, den markitiki fu En, èn den fasi fu En.

Yesus ben kan taki nanga reti: „Nowan sma sabi a Manpikin, boiti a Tata; nowan sma sabi a Tata, boiti a Manpikin, nanga a sma di a Manpikin wani fu a kon sabi a Tata” (Lukas 10:22). Di Yesus ben de na grontapu leki libisma, a ben de klariklari, iya, a ben de fayafaya fu meki sma kon sabi fa en Tata de. Yesus ben man taki èn gi leri fu en Tata, fu di a ben memre den sani di ensrefi kon sabi di a ben de na hemel, krosibei fu a Moro Hei Gado.​—Yohanes 8:28

A fasi fa Yesus ben tyari kon krin suma na en Tata, yu kan agersi nanga a fasi fa wan trafo (transformator) e wroko. Te hebi stroom e kon na ini a trafo, dan a e kenki a stroom so taki a no hebi so moro èn na so sma man gebroiki na apparaat fu den. Di Yesus ben de na grontapu, dan den sani di a ben leri na ini hemel fu en Tata, a ben tyari kon na krin gi libisma. A ben du dati na wan fasi di sma ben man frustan wantewante, èn di den ben man fiti makriki na ini den libi.

Luku tu prenspari fasi fa Yesus tyari kon na krin fa a Tata de.

• Te Yesus ben e gi leri, dan a ben meki sma kon sabi san na den tru tori di abi fu du nanga Yehovah. A meki den kon sabi a nen fu En, den sani di a abi na prakseri èn den fasi fu en.​—YOHANES 3:16; 17:6, 26.

• Nanga den sani di Yesus du, a ben tyari kon na krin sortu difrenti moi fasi Yehovah abi. Yesus ben sori den fasi fu en Tata dorodoro, èn fu taki en leti, a ben kan taki: ’Efu yu wani kon sabi fa mi Tata de, dan na luku yu musu luku mi nomo.’​—YOHANES 5:19; 14:9.

A moi trutru fu si fa Yesus ben e libi. Wi kan kisi bun furu wini te wi e ondrosuku fu san ede a dede, èn te wi e fiti den sani di wi leri na ini wi libi.