A ROME Tiriman Pontius Pilatus ben poti na aksi dati gi Yesus, di ben de na fesi krutu. A krutu dati ben kan meki taki a kisi dedestrafu. * Pilatus ben sabi fu sortu kontren fu Israel Yesus ben komoto (Lukas 23:6, 7). A ben sabi tu taki Yesus no ben de leki ala tra sma. A de so taki Pilatus ben e aksi ensrefi efu Yesus ben libi kaba bifo? A tiriman disi di no ben bribi na ini Gado ben de klariklari fu kon sabi san tru èn handri kruderi dati? Awansi fa a no fa, Yesus no ben wani piki en. Bakaten a kon na krin taki Pilatus ben e broko en ede moro nanga a posisi fu en, leki fu kon sabi san tru èn fu krutu sani na wan reti fasi.​—Mateyus 27:11-26.

Koloku taki den sma di trutru wani kon sabi pe Yesus komoto, kan kon sabi dati makriki. Bijbel e sori krin pe Yesus Krestes komoto. Luku den sani di e kon now.

Yesus gebore leki wan pôti pikin na ini a dorpu Betlehem na ini Yudea. Fu di Caesar Augustus ben gi a komando taki sma ben musu skrifi den nen na lantibuku, meki Yesus en mama Maria nanga en masra Yosef ben musu go na Betlehem, a presi pe den afo fu Yosef ben komoto. Na a ten dati Maria en „bere ben bigi kaba”. A trowpaar no ben man feni wan presi fu tan, fu di sma ben lai na ini a dorpu. Disi meki taki den ben musu go na wan presi pe meti e tan, èn drape Yesus gebore. Baka dati den poti en na ini wan nyanyan baki fu meti.​—Lukas 2:1-7.

Hondrohondro yari bifo, wan Bijbel profeititori ben taki pe Yesus ben o gebore: „Ai Betlehem fu Efrata, yu pikin so te, taki den no e teri yu srefi leki wan fu den foto fu Yuda. Ma na fu yu mi o teki a sma di o tron tiriman fu Israel” (Mika 5:2). * Soleki fa a sori, dan Betlehem ben de pikin tumusi fu sma teri en leki wan fu den foto fu a kontren fu Yuda. Ma a pikin dorpu disi ben o abi wan aparti grani. A pramisi Mesias, noso Krestes ben o kon fu Betlehem.​—Mateyus 2:3-6; Yohanes 7:40-42.

Baka di Yesus en famiri tan wan syatu pisi ten na ini Egepte, den froisi go na Nasaret, wan foto na ini a kontren fu Galilea, di ben de sowan 100 kilometer noordsei fu Yerusalem. Na a ten dati, Yesus no ben abi dri yari ete. Na ini a moi kontren disi pe gronman, skapuman nanga fisiman ben e wroko, Yesus gro kon bigi na ini wan bigi osofamiri, di no ben gudu.​—Mateyus 13:55, 56.

Hondrohondro yari na fesi, Bijbel ben taki  dati a Mesias ben o de „wan Nasaretsma”. Na Evangelie skrifiman Mateyus ben taki dati Yesus en famiri ben go libi na ini „Nasaret, so taki a sani di den profeiti taki ben sa kon tru, namku: ’Den sa kari en wan Nasaretsma’” (Mateyus 2:19-23). A nen Nasaretsma kan abi fu du nanga a Hebrew wortu „pransun”. Soleki fa a sori, dan Mateyus ben taki fu a profeititori fu Yesaya di ben kari a Mesias „wan pransun” fu Isai. Disi wani taki dati a Mesias ben o de wan bakapikin fu Isai, a papa fu Kownu David (Yesaya 11:1). Fu taki en leti, Yesus ben de wan bakapikin fu Isai nanga David.​—Mateyus 1:6, 16; Lukas 3:23, 31, 32.

Bijbel e leri taki Yesus en libi bigin langa ten bifo a gebore na ini Betlehem na wan presi pe meti ben tan. A profeititori fu Mika di wi ben taki fu en kaba, e sori moro fara taki Yesus ben „de bun langa kaba, sensi owruten” (Mika 5:2). Leki a fosi Manpikin fu Gado, Yesus ben de wan yeye na ini hemel fosi a gebore leki wan libisma na grontapu. Yesus srefi ben taki dati a „saka komoto fu hemel” (Yohanes 6:38; 8:23). Fa dati ben kan?

Nanga yepi fu a santa yeye, Yehovah Gado du wan wondru, fu di a teki a libi fu en Manpikin na hemel èn a poti en na ini a bere fu a Dyu nyunwenke Maria, so taki a ben kan gebore leki wan libisma sondro sondu. * Fu du so wan wondru na wan makriki sani gi na Almakti Gado. Soleki fa na engel ben taigi Maria, dan „Gado man du ala san a taki”.​—Lukas 1:30-35, 37.

Bijbel no e fruteri wi wawan pe Yesus komoto. Den fo Evangelietori fu Mateyus, Markus, Lukas, nanga Yohanes e fruteri furu fu a fasi fa Yesus ben libi.