Leisiman e aksi . . .

A o soi fu libi fu têgo na ini Paradijs?

▪ Bijbel e gi wi a howpu taki wi kan libi fu têgo na ini Paradijs na grontapu (Psalm 37:29; Lukas 23:43). A o kon soi fu libi fu ala ten na wan presi pe ala sani bun dorodoro?

A bun fu poti na aksi disi. Ondrosukuman kon si taki te wan sma en libi soi, dan dati e gi a sma broko-ede, a sma e firi brokosaka, èn a o wani du sani di kan meki taki a kisi mankeri. Den sma di no abi nowan marki na ini a libi, noso di kon weri fu den sani di den musu du ala dei, kan feni taki a libi soi. Den sma di o libi na ini Paradijs no o abi wan marki na ini den libi? Den sani di den o du na ini na aladei libi, o soi?

Na a fosi presi, wi musu hori na prakseri taki na Yehovah Gado, a Skrifiman fu Bijbel, e gi wi a howpu fu libi fu têgo (Yohanes 3:16; 2 Timoteyus 3:16). A moro prenspari fasi fu Gado na lobi (1 Yohanes 4:8). Yehovah lobi wi trutru èn a gi wi ala den bun sani di wi abi now.​—Yakobus 1:17.

Wi Mekiman sabi taki wi musu du wroko di e gi wi prisiri fu man de koloku (Psalm 139:14-16; Preikiman 3:12). Na ini Paradijs, sma no o firi leki den na masyin di e du a srefi wroko ibri leisi baka. A wroko di den o du o tyari wini kon gi densrefi nanga den sma di den lobi (Yesaya 65:22-24). Efu yu ben abi wan wroko di e gi yu prisiri èn di yu lobi, dan yu ben o feni a libi soi?

Boiti dati, hori na prakseri tu taki Yehovah Gado no o gi pasi taki ala sortu sma o libi na ini Paradijs. A o gi têgo libi soso na den sma di e teki na eksempre fu en Manpikin, Yesus (Yohanes 17:3). Di Yesus ben de na grontapu, dan a ben lobi fu du a wani fu en Tata. Nanga den sani di a taki èn nanga na eksempre fu en, a leri den bakaman fu en taki wan sma o de moro koloku te a e gi sani leki te a e kisi sani (Tori fu den Apostel 20:35). Na ini a Paradijs di o meki kon bun baka, ala sma o hori densrefi na den tu moro bigi komando. Den komando disi na taki den musu lobi Gado èn den musu lobi tra sma (Mateyus 22:36-40). Prakseri fa a o de fu libi na mindri sma di no e denki densrefi nomo, ma di lobi yu èn di lobi a wroko fu den! Yu denki taki yu o feni a libi soi te yu ben o de na mindri den sortu sma dati?

Sortu tra sani wi o du na ini Paradijs? Ibri dei wi o man leri wan tra sani fu wi Mekiman. Ondrosukuman kon sabi bun furu moi sani kaba fu den sani di Yehovah meki (Romesma 1:20). Ma teleki now wi kon sabi pikinso nomo fu den sani di Yehovah meki. Dusundusun yari pasa, a man Yob di ben e tan gi yesi na Gado, ben denki baka san a ben sabi fu den sani di Gado meki. A sani di a kon si, tru te na a dei fu tide. Yob ben taki: „Disi na soso wan tu sani nomo di [Gado] man du. Den sani di wi yere fu en no furu srefisrefi! Suma man taki dati a e frustan a kefalek dondru fu Gado?”​—Yob 26:14.

Awansi o langa wi e libi, toku noiti wi o sabi ala sani di abi fu du nanga Yehovah Gado èn den sani di a meki. Bijbel e taki dati Gado poti a firi na ini wi ati fu libi fu têgo. Ma a e taki tu dati „libisma noiti no man kon sabi finifini fa a tru Gado meki den sani fu en” (Preikiman 3:10, 11). Yu denki taki yu o feni a libi soi te yu o leri nyun sani fu yu Mekiman?

Srefi now, den sma di e du wan wroko di e tyari wini kon gi trawan èn di e meki Gado kisi glori, nofo tron no e feni taki den libi soi. Wi kan de seiker taki efu wi e tan du a srefi wroko, dan noiti a libi fu wi o soi, srefi te wi e libi fu têgo.

[Sma di abi a reti fu a prenki na tapu bladzijde 27]

Earth: Image Science and Analysis Laboratory, NASA-Johnson Space Center; Galaxy: The Hubble Heritage Team (AURA/​STScI/​NASA)