FURU sma e agri taki wan fu den moro prisiri sani na ini a libi na fu kisi pikin. Bijbel e taki dati pikin na „wan blesi” fu Gado (Psalm 127:3). Neleki Charles nanga Mary, trowpaar di kisi den fosi pikin sabi taki pikin kan kenki a trowlibi na fasi di den no ben fruwakti. Fu eksempre, wan mama di kisi en fosi pikin kan poti ala en prakseri na a beibi. Boiti dati, a kan fruwondru taki wantewante a e du sani di a beibi abi fanowdu, awansi o pikin a sani dati de. Na a tra sei, a papa di kisi en fosi pikin, kan fruwondru fu si fa en wefi e poti ala en prakseri na a beibi. Ma a kan kisi a firi tu taki wantronso en wefi no abi ten gi en moro.

Fu taki en leti, te wan trowpaar kisi den fosi pikin, dan a sani disi kan tyari bigi problema kon na ini a trowlibi. Fu di den tron papa nanga mama meki a kon de moro krin fu si sortu swakifasi den abi. Boiti dati, problema di den no ben lusu kan opo kon baka.

Fa trowpaar di kisi den fosi pikin kan fiti densrefi na a nyun situwâsi na ini den fosi mun te a beibi gebore èn te den musu poti ala den prakseri na en? San wan trowpaar kan du fu tan de bun nanga makandra? San den kan du te den no e agri nanga makandra fa fu kweki den pikin? Meki wi go luku ibriwan fu den problema dati èn meki wi luku fa Bijbel gronprakseri kan yepi wan trowpaar fu lusu den problema.

Te wan mama kisi wan beibi, dan furu fu en ten e go na a pikin èn a e poti furu prakseri na en. Te a e sorgu gi a beibi fu en, dan dati kan gi en furu prisiri. Na a srefi ten, en masra kan firi leki en wefi no abi ten gi en moro. Manuel, di e libi na ini Brasyonkondre, e taki: „A ben muilek gi mi di mi wefi no ben e poti ala en prakseri moro na mi, ma na a beibi. Fosi, a ben de mi nanga en, ne wantronso a ben de mi wefi nanga a beibi.” San yu kan du te a bigi kenki disi kon?

Fa fu lusu a problema: Abi pasensi.

„Lobi abi langa pasensi èn a abi switifasi”, na so Bijbel e taki. Lobi „no e suku en eigi bun, èn a no e mandi esi” (1 Korentesma 13:4, 5). Fa masra nanga wefi kan fiti a rai disi te den kisi den fosi pikin?

Te wan uma kisi wan pikin, dan dati abi krakti tapu en skin èn a fasi fa a e denki. Wan koni masra e sori taki a lobi en wefi fu di a e du muiti fu kon sabi den sani dati. Efu a du dati, dan a o frustan fu san ede a fasi fa en wefi e firi kan kenki wantronso. * Adam, di e libi na ini Fransikondre èn di abi wan meisje fu 11 mun e taki: „Son leisi a muilek gi mi fu frustan fa a fasi fa mi wefi e firi e kenki wantronso èn a muilek gi mi fu abi pasensi nanga en. Ma mi e pruberi fu hori na prakseri taki a no e atibron nanga mi. Na presi fu dati a e handri so fu di a musu gwenti a nyun situwâsi fu wi.”

A e pasa son leisi taki yu wefi no e frustan taki na yepi yu wani yepi en nomo? Efu dati de so, no mandi esi (Preikiman 7:9). Na presi fu dati yu musu abi pasensi èn yu musu pruberi fu no suku yu eigi bun ma di fu en fosi. Na so yu no o mandi esi.​—Odo 14:29.

Na a tra sei, wan koni wefi o pruberi fu gi en masra deki-ati fu tyari en frantwortu leki papa na wan bun fasi. A o meki a yepi en sorgu gi a beibi. Nanga pasensi a o sori en fa fu kenki den pamper, noso fa fu sreka a papa batra, srefi efu a gersi leki a no man du en bun na a bigin.

Ellen, wan mama di abi 26 yari, kon frustan taki a ben musu kenki a fasi fa a ben e handri nanga en masra. A e taki: „Mi no ben musu du leki na mi wawan abi a beibi. Boiti dati, mi ben musu memre misrefi fu no luku tumusi fini te mi masra ben e pruberi fu sorgu gi a beibi soleki fa mi ben sori en.”

Furu trowpaar di kisi den fosi beibi e kon weri fu di den e lasi sribi èn den e kisi fu du nanga ala sortu problema di den no ben fruwakti. Disi e meki en muilek gi den fu abi ten gi makandra. Vivianne, wan mama na ini Fransikondre, di abi tu yongu pikin, e taki: „Na a bigin mi ben poti so furu prakseri na a frantwortu leki mama, taki pikinmoro mi frigiti a frantwortu di mi abi leki wefi.”

Na a tra sei, a kan taki wan masra no man frustan taki di en wefi ben de nanga bere, dati ben abi krakti tapu en. Kande a wefi kon swaki èn a no e firi switi ala ten. A beibi kan teki furu fu un ten nanga krakti. A sani disi kan abi krakti tapu den firi fu unu èn a sekslibi fu unu. Fa wan trowpaar kan sorgu taki a moi beibi fu den di no man yepi ensrefi, no meki taki den no abi  so furu ten moro gi makandra?

Fa fu lusu a problema: Sori taki unu lobi makandra ete.

Te a abi fu du nanga a trowlibi, dan Bijbel e taki: „Wan man o gowe libi en papa nanga en mama. A musu tai hori na en wefi èn den musu tron wán skin” (Genesis 2:24). * Yehovah Gado ben wani taki pikin gowe libi den papa nanga mama te fu kaba. Tra fasi leki dati, Gado e fruwakti taki masra nanga wefi musu tan de wán skin den heri libi langa (Mateyus 19:3-9). Te wan trowpaar di kisi den fosi pikin e frustan a sani disi, dan fa dati kan yepi den fu tan poti den prenspari sani na a fosi presi?

Vivianne di wi ben taki fu en kaba, e taki: „Mi ben prakseri den wortu fu Genesis 2:24 èn a tekst dati yepi mi fu frustan taki mi no musu tron ’wán skin’ nanga mi pikin, ma nanga mi masra. Mi kon si taki mi musu du muiti fu kon abi wan moro bun trowlibi.” Theresa, wan mama di abi wan meisje fu tu yari, e taki: „Efu mi kisi a firi taki mi no de so bun moro nanga mi masra, dan wantewante mi e du muiti fu poti ala mi prakseri na en, srefi efu mi e du dati fu wan syatu pisi ten ibri dei.”

Efu yu na wan masra, dan san yu kan du fu kon abi wan moro bun trowlibi? Taigi yu wefi taki yu lobi en. Sori en dati fu di yu e handri nanga en na wan switi fasi. Du muiti fu trowstu yu wefi te a e broko en ede nanga sani. Sarah, wan mama di abi 30 yari, e taki: „Wan wefi musu sabi taki en masra e warderi èn lobi en ete, aladi en skin no de moro leki fa a ben de bifo a ben de nanga bere.” Alan, wan papa di abi tu boi èn di e libi na ini Doisrikondre, sabi taki a de fanowdu fu trowstu en wefi. A e taki: „Ala ten mi e pruberi fu trowstu mi wefi te a e sari.”

A no de fu taki dati te wan trowpaar kisi wan pikin, dan dati abi krakti tapu den sekslibi. Dati meki masra nanga wefi musu taki nanga makandra fu a tori disi. Bijbel e taki dati ala tu trowpatna musu agri nanga makandra fu man tyari kenki kon na ini a sekslibi fu den (1 Korentesma 7:1-5). Disi wani taki dati den musu taki nanga makandra. Kande yu e draidrai fu taki nanga yu trowpatna fu sani di abi fu nanga un sekslibi, fu di yu no kweki so, noso fu di a no de a gwenti na ini yu kulturu. Ma den sortu takimakandra disi prenspari srefisrefi te wan trowpaar e fiti densrefi fu man tyari a frantwortu di den abi leki papa nanga mama. Frustan fa yu patna e firi, abi pasensi èn taki krin san de tapu yu ati (1 Korentesma 10:24). Na so a no o pasa so makriki taki yu nanga yu trowpatna kisi kesekese fu di unu no e frustan makandra. Boiti dati, unu o abi moro lobi gi makandra.​—1 Petrus 3:7, 8.

Wan trowpaar kan kon abi moro lobi gi makandra te den e sori warderi gi makandra. Wan masra di koni o frustan taki sma no e si furu fu den sani di wan mama e du. Vivianne e taki: „Nofo tron a de so taki na a kaba fu a dei, mi e  firi leki mi no du noti, aladi mi ben e sorgu heri dei gi a beibi!” Aladi wan wefi e du furu, toku a o sori taki a koni te a e luku bun taki a no e krutu en masra te a e yepi en fu du sani gi na osofamiri.—Odo 17:17.

Wan trowpaar kan kon si taki a fasi fa den kweki, e meki taki den e haritaki nanga makandra. Asami, wan mama na ini Yapan nanga en masra Katsuro ben abi a problema disi. Asami e taki: „Mi ben feni taki Katsuro ben pori wi umapikin tumusi, ma en ben feni taki mi ben poti tumusi furu wet gi en.” Fa unu kan sorgu taki unu no e du sani di e meki unu no e agri nanga makandra?

Fa fu lusu a problema: Taki nanga yu patna èn horibaka gi makandra.

A koni Kownu Salomo ben skrifi: „Wan sma di abi heimemre e tyari soso problema kon, ma den wan di e suku rai na trawan, abi koni” (Odo 13:10). Yu sabi fa yu trowpatna e denki fu a fasi fa a wani kweki pikin? Efu unu e wakti teleki a beibi gebore, fosi unu bigin taki fu spesrutu sani di unu wani du fu kweki a pikin, dan te fu kaba unu o haritaki nanga makandra na presi fu lusu a problema.

Luku wan tu aksi di e kon now èn luku na sortuwan fu den piki unu e agri nanga makandra: „Fa wi kan leri wi pikin fu nyan bun èn fu go sribi biten? Wi o opo a beibi ibri leisi te a e krei na a ten te a musu sribi? Fa wi musu leri wi pikin fu sidon na tapu wan pow?” A no de fu taki dati den bosroiti di unu o teki o de tra fasi leki di fu tra trowpaar. Ethan, wan papa fu tu pikin, e taki: „Un musu taki nanga makandra fu sani so taki unu kan agri nanga makandra fu spesrutu sani. Dan makandra, unu o man sorgu gi den sani di un pikin abi fanowdu.”

Neleki fa tu sma di e leri dansi abi ten nanga pasensi fanowdu fu man dansi bun nanga makandra, na so unu abi ten fanowdu fu fiti unsrefi na a frantwortu di unu abi now leki papa nanga mama. Ma te fu kaba yu o sabi san yu musu du.

Te unu musu kweki pikin, dan dati kan meki en muilek gi unu na ini a trowlibi èn a kan kenki a fasi fa unu de nanga makandra. Ma a o gi unu na okasi fu kon kisi moi fasi tu. Efu unu e teki den koni rai fu Bijbel, dan unu o ondrofeni a srefi sani leki wan papa di nen Kenneth. A e taki: „ A kweki di wi ben kweki wi pikin ben abi bun krakti tapu mi nanga mi wefi. Now wi no e denki wisrefi nomo, wi e sori moro lobi gi makandra èn wi e frustan makandra moro bun.” Den sortu kenki dati bun srefisrefi gi a trowlibi.