Gado abi wan organisâsi?

ALA den sani di Gado meki èn di wi e si na wi lontu, seti na wan orga fasi. Boiti den sani dati, Bijbel e sori taki den engel orga tu, soleki fa a Mekiman wani. Na ini wan fisyun, a profeiti Danièl ben si wan bun bigi grupu fu engel na ini hemel di ben tanapu na fesi Gado. A ben taki: „Dusun tron dusun engel ben e dini en èn tin dusun tron tin dusun ben e tanapu leti na en fesi” (Danièl 7:9, 10). Prakseri o bun na organisâsi ben musu seti, so taki moro leki wán hondro milyun engel ben kan du san Gado taigi den fu du gi den futuboi fu en dyaso na grontapu.​—Psalm 91:11.

Aladi Yehovah Gado, a Mekiman, na a moro bun sma di sabi orga sani, toku a no de so taki a no e firi gi sma, noso taki a de nomonomo fu poti wan lo wet gi den. Na presi fu dati, a de wan lobi-ati Gado di de koloku èn di e broko en ede nanga a tanbun fu ala den sani di a meki (1 Timoteyus 1:11; 1 Petrus 5:7). A sani disi de krin fu si te wi e luku a fasi fa a ben handri nanga a pipel Israel fu owruten èn nanga den Kresten fu a fosi yarihondro.

Israel fu owruten ben orga bun

Yehovah Gado ben poti Moses fu orga den Israelsma gi a tru anbegi. Luku nomo fa den ben musu seti den tenti di den ben waka na ini a sabana fu Sinai. A no de fu taki dati sani ben o waka bruyabruya efu ibri famiri ben mag poti en tenti pe den ben wani. Yehovah ben gi a pipel finifini bodoi pe ibri lo ben musu seti den tenti (Numeri 2:1-34). A Wet di Gado ben gi Moses, ben sori finifini tu san sma ben musu du fu tan gosontu èn krin. Fu eksempre, a wet ben taki san den ben musu du te den ben go pupe.​—Deuteronomium 23:12, 13.

Di den Israelsma go na ini a Pramisi Kondre, dan den ben de wan pipel di orga bun na difrenti fasi. A pipel ben prati na ini 12 lo èn ibri lo ben kisi wan pisi kontren. A Wet di Yehovah ben meki Moses gi a pipel, ben taki fu ibri pisi fu den libi. A ben taki fu na anbegi, a trowlibi, na osofamiri-libi, a leri di den ben musu kisi, a fasi fa den ben musu du bisnis, den sani di den ben mag nyan, a fasi fa den ben musu wroko a gron, a fasi fa den ben musu kweki den meti èn so moro fara. Aladi sonwan fu den wet ben taki finifini san sma ben musu du, toku den ben sori taki Yehovah ben broko en ede nanga en pipel èn disi ben meki taki den ben de koloku. Fu di den Israelsma ben hori densrefi na den lobi-ati seti disi, meki den ben de wan spesrutu pipel di Yehovah feni bun.​—Psalm 147:19, 20.

Moses ben de wan bun fesiman, ma a no dati ben meki taki sani ben waka bun. A ben de wan bun fesiman fu di a ben hori ensrefi na den seti fu Gado en organisâsi. Fu eksempre, fa Moses ben sabi sortu pasi den ben musu teki di den ben e waka na ini a sabana? Na deiten Yehovah ben e tyari den nanga yepi fu wan wolku di ben gersi wan pilari, èn na neti a ben meki wan pilari fu faya skèin leti gi den (Exodus 13:21, 22). Aladi Gado ben gebroiki libisma fu tiri en pipel, toku na Yehovah srefi ben orga den èn na en ben sori den  san den musu du. A ben du a srefi sani tu na ini a fosi yarihondro.

Den fosi Kresten ben orga bun

Fu di den apostel nanga den disipel ben e preiki fayafaya, meki Kresten gemeente ben seti na ini difrenti pisi fu Asia nanga Europa, na ini a fosi yarihondro. Aladi den gemeente disi ben de na ini difrenti kontren, toku den no ben de grupu di ben du san densrefi wani. Na presi fu dati den ben orga bun èn den ben kisi wini fu a lobi-ati fasi fa den apostel ben e teki fesi. Fu eksempre, na apostel Paulus, ben seni Titus go na Kreta fu „seti alasani” drape (Titus 1:5, Da Bijbel na ini Sranantongo). Paulus ben skrifi a gemeente Korente taki son brada ben abi „a koni fu orga sani”, noso den ben de „orgaman” (1 Korentesma 12:28, The New Testament in Modern Speech; The Bible in Contemporary Language). Ma suma ben meki taki sani ben orga so bun? Paulus ben taki dati na „Gado meki”, noso „orga” a gemeente.​—1 Korentesma 12:24; The Riverside New Testament.

Den brada di ben poti leki opziener na ini a Kresten gemeente, no ben de basi fu den tra Kresten. Na presi fu dati den ben „wroko makandra” nanga den èn den ben teki a tiri fu Gado en yeye. Boiti dati, den ben musu de „eksempre gi den skapu” (2 Korentesma 1:24; 1 Petrus 5:2, 3). A no libisma noso wan grupu fu sondu mansma na a ’ede fu a gemeente’, ma na Yesus Krestes di kisi wan opobaka.​—Efeisesma 5:23.

Di a gemeente na ini Korente bigin du sani heri tra fasi leki fa den tra gemeente ben du sani, dan Paulus ben skrifi: „San? Na fu unu a wortu fu Gado ben komoto? Noso na unu wawan yere en?” (1 Korentesma 14:36) Paulus poti aksi na a fasi disi fu kenki a fasi fa den ben e denki èn fu yepi den frustan taki den no kan du sani soleki fa den wani. Di den gemeente teki a rai fu den apostel, dan den gemeente ben e gro èn sani ben waka bun.​—Tori fu den Apostel 16:4, 5.

Wan fasi fa Gado e sori lobi

Fa a de na ini a ten disi? Son sma kan draidrai fu tron wan memre fu wan kerki organisâsi. Ma soleki fa Bijbel e sori, dan ala ten Gado ben gebroiki en organisâsi fu du san a abi na prakseri. A ben orga den anbegiman fu en na ini Israel fu owruten, èn a ben orga den fosi Kresten na ini na anbegi fu den.

Sobun, wi kan frustan taki te now ete Yehovah Gado e tiri en pipel soleki fa a ben du dati na ini a ten di pasa, a no so? Iya, a e sori den anbegiman fu en taki a lobi den èn taki a e broko en ede nanga den, fu di a e orga den èn a e meki den du sani leki wán man. Na ini a ten disi, Yehovah e gebroiki en organisâsi fu du san a abi na prakseri gi libisma. Fa wi kan kon sabi sortu organisâsi Gado e gebroiki? Luku den markitiki di e kon now.

▪ Tru Kresten orga fu du wan wroko (Mateyus 24:14; 1 Timoteyus 2:3, 4). Yesus gi den bakaman fu en a komando fu preiki a Kownukondre bun nyunsu gi ala pipel. A wroko disi no ben o man du efu wan organisâsi no ben de fu orga den sma na heri grontapu. Fu eksempre, a makriki fu gi wán sma nyanyan te yu de yu wawan, ma efu yu musu gi dusundusun sma noso srefi milyunmilyun sma nyanyan, dan yu o abi wan grupu sma fanowdu di orga bun. Fu man du a wroko fu den, tru Kresten e „dini [Gado] makandra leki wán man”, noso den e „wroko makandra na ini a diniwroko fu [Gado]” (Sefanya 3:9; Byington). Den e du a preikiwroko disi na ini difrenti kondre, na ini difrenti tongo èn den e preiki gi sma fu difrenti kulturu. A de so taki den ben o man du a wroko disi leki wán man sondro fu de na ini wan organisâsi di seti bun? A de krin taki dati no ben o man.

▪ Tru Kresten orga fu horibaka gi makandra èn fu gi makandra deki-ati. Wan sma di e kren wan bergi en wawan kan bosroiti fu go pe a wani èn a no abi fu luku tra sma di no abi so furu ondrofeni. Ma efu a kisi mankeri noso a kon na ini wan muilek situwâsi, dan a  o de na ini bigi problema fu di nowan sma o de drape fu yepi en. Sobun, a no de wan koni sani kwetikweti te wan sma no wani moksi nanga trawan (Odo 18:1). Te Kresten wani gi yesi na a komando fu Yesus, dan den musu yepi makandra èn horibaka gi makandra (Mateyus 28:19, 20). Na ini a Kresten gemeente ala sma e kisi Bijbel rai, den e kisi leri èn den e kisi deki-ati di de tranga fanowdu fu man horidoro. Pe wan sma ben o go fu kisi leri fu den fasi fu Yehovah efu Kresten konmakandra no ben orga pe sma e kisi leri èn pe den e anbegi Gado?​—Hebrewsma 10:24, 25.

▪ Tru Kresten orga fu dini Gado na ini wánfasi. Fu di den skapu fu Yesus e arki en sten, meki den tron „wán ipi” di de na ondro a tiri fu en (Yohanes 10:16). Den no panya na ini difrenti kerki nanga grupu di abi den eigi denki fu sani èn den no abi difrenti denki te a abi fu du nanga den leri fu Bijbel. Na presi fu dati den alamala e taki sani di e „kruderi nanga makandra” (1 Korentesma 1:10). Efu wi wani taki wánfasi de, dan sani musu orga bun. Na soso wan organisâsi pe sma e libi leki wán famiri, kan kisi a blesi fu Gado.​—Psalm 133:1, 3.

Trutru lobi gi Gado èn gi den tru tori fu Bijbel meki taki milyunmilyun sma kon na ini wan organisâsi di e hori ensrefi na den markitiki disi èn sosrefi na tra Bijbel markitiki. Leki wan organisâsi nanga wan pipel di de na ini wánfasi, Yehovah Kotoigi na heri grontapu e du muiti fu du a wani fu Gado. Den de seiker taki a pramisi disi fu en tru: „Mi sa tan na den mindri èn mi sa waka na den mindri, èn mi sa de a Gado fu den, èn den sa de a pipel fu mi” (2 Korentesma 6:16). Yu kan kisi a moi blesi disi tu te yu e anbegi Yehovah Gado makandra nanga en organisâsi.

[Prenki na tapu bladzijde 13]

Ala sani ben orga bun di den Israelsma ben seti den tenti

[Prenki na tapu bladzijde 14, 15]

Sani musu orga bun fu man du a preikiwroko na heri grontapu

Oso-fu-oso preikiwroko

Yepi te rampu pasa

Bigi konmakandra

Den e bow presi fu anbegi Gado