Teki leri fu Gado Wortu

Howpu de gi den dedewan?

Na artikel disi e poti prakseri na sani di yu ben aksi yusrefi èn a e sori pe yu kan feni den piki na ini yu Bijbel. Yehovah Kotoigi ben o breiti fu taki nanga yu fu den piki disi.

1. Sortu howpu de gi den dedewan?

Di Yesus ben doro na Betania di ben de krosibei fu Yerusalem, dan en mati Lasarus ben dede fo dei kaba. Yesus ben go makandra nanga Marta èn nanga Maria, den sisa fu Lasarus, na a presi pe den ben beri Lasarus. Heri esi furu sma kon drape. Yu man frustan fa Marta nanga Maria ben breiti di Yesus gi Lasarus wan opobaka?​—Leisi Yohanes 11:20-24, 38-44.

Marta ben bribi taki den dede sma ben o kisi wan opobaka. Langa ten kaba reti-ati futuboi fu Yehovah ben sabi taki na ini a ten di e kon, Gado o gi sma wan opobaka fu libi baka na grontapu.—Leisi Yob 14:14, 15.

2. San e pasa nanga wan sma te a dede?

Aladi libisma nanga meti abi libikrakti, noso „wan yeye”, toku wi a no yeye di e libi na ini wan libisma skin (Preikiman 3:19; Genesis 7:21, 22). Wi na libisma di meki fu a doti fu a gron (Genesis 2:7; 3:19). Te wi dede, dan wi edetonton e tapu fu wroko èn den prakseri fu wi e lasi gowe. Dati meki, di Lasarus kisi wan opobaka, a no ben taki noti fu san ben pasa nanga en di a ben dede, fu di den dedewan no sabi notinoti.​—Leisi Psalm 146:4; Preikiman 9:5, 10.

A de krin taki den dedewan no man nyan pina. Sobun, a leri di e taki dati Gado e pina sma baka te den dede, no tru èn a e gi Gado porinen. A prakseri fu bron sma na ini faya, na wan tegu sani gi en.​—Leisi Yeremia 7:31.

  3. Wi kan taki nanga dede sma?

Den dede sma no man taki (Psalm 115:17). Ma te ogri yeye e taki nanga sma, dan den e lei taki den na a yeye fu wan dede sma (2 Petrus 2:4). Yehovah no wani taki wi e suku fu taki nanga den dedewan.​—Leisi Deuteronomium 18:10, 11.

4. Suma o kisi wan opobaka?

Na ini a nyun grontapu di e kon, milyunmilyun sma di de na ini a grebi o kon na libi baka. Srefi son sma di ben du ogri fu di den no ben sabi Yehovah, o kisi wan opobaka.​—Leisi Lukas 23:43; Tori fu den Apostel 24:15.

Den sma di o kisi wan opobaka o abi na okasi fu kon leri sabi den tru tori di abi fu du nanga Gado. Boiti dati, den o abi na okasi fu sori taki den poti bribi na ini Yesus fu di den gi yesi na en (Openbaring 20:11-13). Den sma di kon na libi baka èn di e du bun sani, o man libi fu têgo na grontapu. Ma sonwan fu den sma di kisi wan opobaka o tan du ogri sani. Fu di den sma disi o kisi krutu fu den ogri di den du na ini a ten dati, meki na opobaka fu den o de wan ’opobaka fu kisi krutu’.​—Leisi Yohanes 5:28, 29.

5. San na opobaka e leri wi fu Yehovah?

Sma o man kisi wan opobaka fu di Gado seni en Manpikin fu gi en libi gi wi. Sobun, na opobaka e sori a bun-ati fu Yehovah èn a lobi fu en.​—Leisi Yohanes 3:16; Romesma 6:23

Efu yu wani sabi moro, dan luku kapitel 6 nanga 7 fu a buku disi, San Bijbel e leri wi trutru?, di Yehovah Kotoigi tyari kon na doro.

[Prenki na tapu bladzijde 16]

Gado ben meki Adam fu a doti fu a gron