Abi bribi neleki den

A kisi trowstu fu en Gado

ELIA ben e lon na ini na alen, aladi hemel ben kon moro dungru. A ben abi wan langa pasi fu go ete fosi a doro Yisreyel, èn a no ben yongu. Ma toku a ben e lon sondro fu kon weri, fu di „Yehovah ben de nanga en”. A no de fu taki dati noiti ete a ben firi so krakti. Fu taki en leti, a ben lon pasa den asi di ben e hari Kownu Akab na ini en asi-wagi!​—1 Kownu 18:46.

Now Kownu Akab ben de bun fara na en baka, èn Elia ben abi wan langa pasi fu go ete. Prakseri fa Elia ben e pingi en ai fu di na alen ben naki en na ini en fesi, èn fa a ben e denki san ben pasa a dei dati, di ben de a moro span dei fu en libi. A no de fu taki dati Elia en Gado, Yehovah, ben wini krinkrin èn a dei dati a kon na krin suma abi a tru anbegi. Bun fara na en baka a hei Karmel-bergi ben de, di a no ben man si moro fu di na alen nanga den blaka wolku ben meki a kon dungru. Na tapu a bergi dati Yehovah ben meki Elia sori taki a Bâal anbegi na fu soso èn a du dati na wan makti èn wondru fasi. A ben kon na krin taki hondrohondro Bâal profeiti ben de ogri bedrigiman èn den ben frudini en di a kiri den. Baka dati, Elia begi Yehovah fu tyari wan kaba kon na a dreiten di ben de dri nanga afu yari langa na ini a kondre. Ne alen fadon! *​—1 Kownu 18:18-45.

Elia ben e lon na ini na alen, 30 kilometer go na Yisreyel, èn now a ben kan gersi leki sani ben o kenki. Akab ben o abi fu kenki! A no de fu taki dati den sani di a si ben o meki a drai baka gi na anbegi fu Bâal, èn a ben o tapu en wefi Iseibel fu frufolgu den futuboi fu Yehovah.

Leki libisma, wi e kisi howpu te sani e bigin go soleki fa wi wani. Kande wi e prakseri taki sani o tan go bun na ini wi libi, èn kande wi e denki srefi taki den moro bigi problema fu wi lusu. A no ben o fruwondru wi efu Elia ben denki so, fu di a „ben de wan man di ben abi den srefi firi leki wi” (Yakobus 5:17). Ma den problema fu Elia no ben lusu ete. Fu taki en leti, baka wan tu yuru Elia ben o frede so te, èn a ben o lasi-ati so te, taki a ben o winsi fu dede. San ben pasa? Fa Yehovah yepi a profeiti fu en fu kisi wan tranga bribi baka èn fu kon abi deki-ati baka? Meki wi go luku.

A no ben fruwakti taki sani ben o kenki so

Di Akab doro na en kownu-oso na ini Yisreyel, dan a ben sori taki a kenki, noso taki a ben poti bribi na ini Gado? Bijbel e taki: „Now Akab go fruteri Iseibel ala san Elia du. A fruteri en fa Elia kiri ala den profeiti nanga feti-owru” (1 Kownu 19:1). Luku taki di Akab fruteri san ben pasa a dei dati, dan a no ben taki noti fu Yehovah, a Gado fu Elia. Akab ben e denki soleki fa libisma e denki, fu di a ben si den wondru di ben pasa a dei dati leki sani di „Elia du”. A de krin fu si taki a no leri fu sori lespeki gi Yehovah Gado. San na ogri Iseibel du?

A ben atibron! Nanga bigi atibron a seni a  boskopu disi gi Elia: „Meki den gado fu mi strafu mi èn meki den du moro leki dati srefi, efu tamara na a ten disi mi no kiri yu, soleki fa mi kiri den tra profeiti!” (1 Kownu 19:2) Disi ben de wan fu den moro ogri fasi fa wan sma ben kan winsi dede gi wan trawan. Fu taki en leti, Iseibel ben sweri taki ensrefi musu dede efu a no ben o meki sma kiri Elia a tra dei, fu di a ben wani Elia pai gi a dede fu den Bâal profeiti. Prakseri disi: Elia ben de na wan presi na ini Yisreyel pe a ben e sribi a neti dati di bigi alen ben e fadon. Ne wantronso a wiki fu di a yere a boskopuman fu na uma-kownu, di ben tyari wan takru boskopu kon gi en. Sortu krakti a boskopu disi ben abi na en tapu?

A ben lasi-ati èn a kon frede srefisrefi

Efu Elia ben bribi taki a feti teige den anbegiman fu Bâal ben kaba, dan wantronso a kon frustan taki dati no ben de so. Iseibel no ben kenki den fasi fu en, aladi a ben yere san ben pasa. Iseibel ben gi a komando kaba fu kiri furu fu den tra profeiti fu Yehovah, èn now a ben gersi leki Iseibel ben o seni sma fu kiri Elia. Bijbel e taki: „Elia kon frede.” A de so taki Elia ben si kaba fa Iseibel ben o kiri en na wan ogri-ati fasi? Efu a ben o tan prakseri a sani disi, dan a no e fruwondru wi taki a ben kon frede. Awansi fa a no fa, Elia „lowe fu den no kiri en”.​—1 Kownu 18:4; 19:3.

Elia no ben de a wan-enkri bribiman di ben kon frede. Furu yari baka dati, na apostel Petrus ben abi a srefi problema. Fu eksempre, di Yesus ben meki taki Petrus waka na tapu a watra, dan na apostel bigin „si fa a bigi winti e wai”. Disi meki taki a ben kon frede èn a bigin sungu (Mateyus 14:30). Na eksempre fu Petrus nanga Elia e leri wi wan prenspari sani. Efu wi wani tan abi deki-ati, dan wi no musu prakseri den ogri di kan miti wi èn di e meki wi frede. Wi musu tan poti prakseri na a Sma di e gi wi howpu èn krakti.

„A nofo!”

Fu di Elia ben e frede, meki a lowe 150 kilometer go na a zuid-westsei na Berseiba, wan foto krosibei fu a zuid lanki fu Yuda. A gowe libi en futuboi drape, èn a go en wawan na ini a sabana. A tori e taki dati a „waka wan heri dei”. Wi kan prakseri fa a bigin waka di son opo, sondro fu tyari nyanyan noso tra sani nanga en. A ben frede èn a no ben sabi san fu du, di a ben e waka na ini a drei sabana na ini a faya son. Di a faya son bigin dongo safrisafri èn neti tapu, dan Elia no ben abi krakti moro fu go doro. Fu di a ben weri srefisrefi, meki a go sidon na ondro wan bon di ben de a wan-enkri  sani di ben kan gi en kowru na ini a drei kontren drape.​—1 Kownu 19:4.

Fu di Elia no ben sabi san fu du, meki a bigin begi. A aksi Gado fu dede. A ben taki: „Mi no betre moro den afo fu mi.” A ben sabi taki den afo fu en ben de doti nanga bonyo nomo na ini a grebi, èn den no ben man du nowan bun gi iniwan sma (Preikiman 9:10). Elia ben firi leki a no warti, neleki den afo fu en di dede. A no e fruwondru wi taki a bari taki: „A nofo!” Fu san ede a ben musu tan libi go doro?

A musu fruwondru wi taki wan futuboi fu Gado kan lasi-ati so te? Nôno, fu di wan tu mansma nanga umasma di Bijbel e taki fu den, ben firi so sari tu taki den ben winsi fu dede. Wan tu fu den ben de Rebeka, Yakob, Moses, nanga Yob.​—Genesis 25:22; 37:35; Numeri 11:13-15; Yob 14:13.

Now wi e libi na ini ’muilek ten di tranga fu pasa’. Fu dati ede, a no e fruwondru wi taki a e pasa dati furu sma, srefi den futuboi fu Gado di e tai hori na en, e lasi-ati son leisi (2 Timoteyus 3:1). Efu wan leisi a e pasa taki yu kon de na ini so wan muilek situwâsi, dan teki na eksempre fu Elia ini a tori disi: Fruteri Gado ala san de tapu yu ati èn fruteri en fa yu e firi. Te yu luku en bun, dan Yehovah na „a Gado fu ala trowstu” (2 Korentesma 1:3). A ben trowstu Elia?

Yehovah ben gi a profeiti fu en krakti

Fa yu denki taki Yehovah ben e firi di a ben e si komoto fu hemel fa a profeiti fu en di a lobi, ben e didon na ondro a bon na ini a sabana èn ben e begi en fu dede? Wi no abi fu aksi wisrefi fa a ben e firi. Baka di Elia fadon na sribi, Yehovah seni wan engel go na en. Safri na engel fasi Elia fu wiki en, èn a taigi en: „Opo, dan yu nyan.” Elia ben du dati, fu di na wan switifasi na engel ben poti waran brede nanga watra gi en. Elia ben taki na engel tangi srefi? A tori e taki nomo dati a profeiti ben nyan èn dringi, èn a go sribi baka. A ben lasi-ati so te taki a no ben firi fu taki? Awansi fa a no fa, na engel ben wiki en wan di fu tu leisi, èn kande a ben du dati di dei broko. Agen na engel taigi Elia fu opo èn nyan. Na engel ben taki den moi wortu disi: „Opo, dan yu nyan, noso yu no o man waka a pasi.”​—1 Kownu 19:5-7.

Na engel ben sabi pe Elia ben e go fu di Gado ben meki a kon sabi dati. Na engel ben sabi tu taki a ben o muilek tumusi gi Elia fu waka a pasi dati, fu di a no ben abi nofo krakti fu du dati. A e trowstu wi trutru fu sabi taki wi e dini wan Gado di sabi moro wi san wi wani du èn san wi no man du! (Psalm 103:13, 14) Fa Elia kisi wini fu a nyanyan dati?

Bijbel e taki: „Elia opo, dan a nyan èn dringi. Na so a nyanyan gi en krakti fu waka fotenti dei nanga fotenti neti, teleki a doro na Horeb-bergi, a bergi fu a tru Gado” (1 Kownu 19:8). Neleki Moses di ben libi sowan siksi hondro yari bifo en èn neleki Yesus di ben libi sowan dusun yari baka en, na so Elia ben faste 40 dei nanga 40 neti (Exodus 34:28; Lukas 4:1, 2). A nyanyan dati no ben lusu ala den problema fu en, ma a ben gi en krakti na wan wondru fasi. Prakseri fa na owru man dati ben meki tranga muiti fu waka na ini a sabana pe pasi no ben de. A ben du dati ibri dei, ibri wiki, iya, pikinmoro wán nanga afu mun langa!

Yehovah e gi den futuboi fu en na ini a ten disi krakti tu. A no e gi den nyanyan na wan wondru fasi, ma a e gi den krakti na wan moro prenspari fasi. A e sorgu taki den futuboi fu en e kisi san den abi fanowdu fu abi wan bun matifasi nanga en (Mateyus 4:4). Te wi e leri sani  fu Gado na ini en Wortu èn Bijbel publikâsi, dan dati e tranga wi bribi. Te wi e leri den sani dati, dan a no e lusu ala wi problema, ma a kan yepi wi fu horidoro na ini situwâsi di ben o hebi tumusi gi wi. Boiti dati, a o meki wi kisi „têgo libi” tu.​—Yohanes 17:3.

Elia ben waka pikinmoro 320 kilometer teleki a doro Horeb-bergi. Langa ten na fesi, a ben de so taki nanga yepi fu wan engel, Yehovah Gado ben kon na fesi Moses na ini a makabusi di ben e bron èn bakaten na a srefi presi drape, Yehovah ben meki a Wetfrubontu nanga Israel. Elia ben go kibri na ini wan bergi-olo drape.

A fasi fa Yehovah trowstu a profeiti fu en èn fa a gi en krakti

Na tapu Horeb-bergi, Yehovah en sten ben de fu yere, èn soleki fa a sori dan na wan engel di ben taki gi Yehovah, ben aksi Elia a sani disi: „San yu kon du dya, Elia?” Na engel ben poti na aksi na wan switifasi, fu di Elia ben si disi leki wan okasi fu fruteri fa a ben e firi. Iya, a ben taki san ben de tapu en ati! Elia ben taki: „Yehovah, a Gado fu den legre, na yu wawan mi dini fayafaya. Ma den Israelsma broko a frubontu di yu meki nanga den, den broko den altari fu yu, èn den kiri den profeiti fu yu nanga feti-owru. Now na mi wawan tan abra èn den wani kiri mi tu” (1 Kownu 19:9, 10). Te wi e luku san Elia taki, dan dati e sori taki awansi dri sani ben de di meki Elia lasi-ati.

A fosi sani di ben meki Elia lasi-ati, na taki a ben feni taki a wroko di a ben du ben de fu soso. Aladi a ben e ’dini Yehovah wawan fayafaya’, fu di a ben poti a santa nen fu en Gado èn na anbegi fu en tapu a fosi presi, toku gi Elia a situwâsi ben kon moro ogri. Den sma no ben poti bribi na ini Gado èn den ben tan opo densrefi, aladi moro nanga moro sma ben e anbegi falsi gado. A di fu tu sani, na taki Elia ben firi ensrefi en wawan. „Na mi wawan tan abra”, na so Elia taki, neleki en ben de a wan-enkri man fu a pipel di ben e dini Yehovah ete. A di fu dri sani, na taki Elia ben frede. Sma ben kiri furu fu den tra profeiti fu Yehovah kaba, èn a ben de seiker taki sma ben o kiri en tu. Kande a no ben makriki gi Elia fu taki fu den sani dati, ma a no ben meki bigifasi noso syen tapu en fu fruteri fa a ben e firi. Di a begi en Gado èn a fruteri en ala san de tapu en ati, dan a gi wan bun eksempre na ala sma di e gi yesi na Gado.​—Psalm 62:8.

San Yehovah du di a si fa Elia ben frede èn fa a ben e broko en ede nanga sani? Na engel taigi Elia fu go tanapu na a mofo fu a bergi-olo. Elia gi yesi, aladi a no ben sabi san ben o pasa. Wantronso wan bigi winti bigin wai! A ben musu fu meki wan bigi babari, fu di a ben wai so tranga taki den bergi nanga den ston ben priti opo. Prakseri fa Elia ben tapu en fesi nanga en anu èn fa a ben e hori a hebi dyakti fu  en di meki fu metibuba, aladi a winti ben wai en. Dan a ben musu du tranga muiti fu no fadon fu di a gron bigin seki hebi, iya, wan gronseki ben seki a heri kontren! A no ben kaba kisi ensrefi ete di wan bigi faya pasa, di meki taki a ben musu hari ensrefi go nanga baka na ini a bergi-olo, so taki a faya no bron en.​—1 Kownu 19:11, 12.

Awansi fa a no fa, a tori e sori wi taki Yehovah no ben de na ini a bigi winti, a gronseki, noso a faya. Elia ben sabi taki Yehovah a no wan falsi gado, soleki Bâal di sma ben anbegi leki „a sma di ben e rèi na tapu den wolku”, noso a sma di e tyari alen kon. Yehovah na a Sma di e meki ala den kefalek sani dati pasa, ma a abi omeni tron moro krakti leki iniwan sani di a meki. Srefi hemel no bigi nofo fu a tan na ini! (1 Kownu 8:27) Ma fa den sani disi ben yepi Elia? Yu e memre ete taki Elia ben e frede. Nanga wan Gado leki Yehovah na en sei, di abi so furu krakti, Elia no ben abi fu frede kwetikweti gi Akab nanga Iseibel!​—Psalm 118:6.

Di a faya ben pasa, dan a presi kon tiri, èn Elia yere „wan tiri, safri sten”. A sten ben taigi Elia fu taki baka fa a ben e firi, èn na dati Elia du tu. Elia taki san ben de tapu en ati fu a di fu tu leisi. * Kande dati ben meki a firi moro korostu. Ma a no de fu taki dati Elia ben kisi moro trowstu srefi di a yere san a „tiri, safri sten” taigi en baka dati. Yehovah ben gi Elia a dyaranti taki a no de so taki a no warti. Fa so? Gado ben tyari kon na krin san a ben o du te a abi fu du nanga na anbegi di sma ben e anbegi Bâal na ini Israel. A de krin taki a wroko di Elia ben du, no ben de fu soso, fu di noti ben kan tapu Gado fu meki den sani di a abi na prakseri, kon tru. Boiti dati, Yehovah ben o gebroiki Elia ete fu di a ben seni en go baka fu du wan tu spesrutu sani.​—1 Kownu 19:12-17.

Ma fa a ben de nanga a firi di Elia ben abi taki a de en wawan? Yehovah ben du tu sani fu yepi en. A fosi sani na taki a taigi Elia fu salfu Elisa leki profeiti di ben o kon baka en te fu kaba. A yonkuman disi ben o wroko makandra nanga Elia èn a ben o yepi en wan tu yari langa. Dati ben de wan bigi trowstu gi en! A di fu tu sani di Yehovah du, na taki a fruteri en a tumusi moi nyunsu disi: „Mi meki seibi dusun sma tan na libi na ini Israel. Nowan fu den sma disi saka kindi boigi gi Bâal èn nowan fu den no bosi en” (1 Kownu 19:18). Elia no ben de en wawan. A ben musu fu de so taki a prisiri Elia en ati fu yere taki den dusundusun sma dati ben tai hori na Yehovah èn den ben weigri fu anbegi Bâal. A ben de fanowdu taki Elia tan go doro nanga a diniwroko fu en. Na so fasi, a ben o gi den sma na eksempre fa fu tai hori na Yehovah na ini a muilek ten dati di pikinmoro ala sma ben opo densrefi teige Yehovah. A ben musu fu naki na ati fu Elia di a yere den wortu dati fu na engel fu Yehovah di ben taki nanga wan „tiri, safri sten” gi a Gado fu en.

A kan taki neleki Elia, wi kan fruwondru srefisrefi te wi e si den kefalek sani soleki wan bigi winti noso gronseki. Den sani dati e sori na wan moi fasi o furu krakti a Mekiman abi (Romesma 1:20). Te now ete, Yehovah lobi fu gebroiki a krakti fu en fu yepi den futuboi fu en di e tai hori na en (2 Kroniki 16:9). Ma Gado e taki moro krin nanga wi, nanga yepi fu en Wortu, Bijbel (Yesaya 30:21). Wi kan taki dati Bijbel de leki a „tiri, safri sten” dati, di Yehovah e gebroiki fu tiri wi na ini a ten disi, fu piri-ai gi wi, fu gi wi deki-ati, èn fu gi wi a dyaranti taki a lobi wi.

Elia ben teki a trowstu di Yehovah gi en na Horeb-bergi? Iya, a no de fu taki dati a ben du dati. Syatu baka dati a ben wroko baka, leki a deki-ati profeiti di ben feti teige falsi anbegi di ben ogri srefisrefi. Te wi e du a srefi fu di wi e gi yesi na a wortu fu Gado, noso „a trowstu di Gado Buku e gi”, dan wi o man abi bribi neleki Elia.​—Romesma 15:4.

[Futuwortu]

[Prenki na tapu bladzijde 19]

Yehovah ben gi Elia bogobogo blesi na ini bun ten nanga muilek ten

[Prenki na tapu bladzijde 20]

Di Elia ben lasi-ati, dan a fruteri Yehovah ala san de tapu en ati

[Prenki na tapu bladzijde 21]

Yehovah gebroiki en bigi krakti fu trowstu Elia èn fu gi en deki-ati