Leisiman e aksi . . .

Gado lobi a wan ras moro a trawan?

▪ Nôno, dati no de so. Bijbel e sori krin: „Gado no lobi a wan sma moro a trawan, ma awansi fu sortu kondre wan sma de, efu a e du san de regtfardiki èn a e frede Gado, dan Gado feni a sma dati bun.”​—Tori fu den Apostel 10:34, 35.

A fasi fa Gado e si a tori disi, de moro prenspari leki fa libisma e si en. Furu sma e bribi taki a wan ras (nofo tron a di fu den) bun moro a trawan. So wan denki de leki a di fu Charles Darwin, di ben skrifi: „Wan ten o kon, . . . taki den sma fu den moro bun ras o puru den sma na pasi di de fu den ras di no de so bun. Na so den o teki a presi fu den.” A sari fu si taki furu sma ondrofeni ogri sani fu di sma fu tra ras di e si densrefi moro hei, ben kwinsi den.

A bun te sma fu wan ras e firi densrefi moro hei leki sma fu tra ras? Fu eksempre, a de so taki sabidensi e buweisi taki son ras bun moro leki tra ras? Tra fasi leki dati, na Oxford professor Bryan Sykes e taki: „Te wi ben o ondrosuku a brudu fu sma, dan wi no ben o si wan bigi difrenti na mindri a wan ras nanga a trawan. . . . Nofo tron sma e aksi mi efu Grikisma, noso Italiasma abi wan aparti DNA, noso wan aparti sani na ini den cel fu den skin. Ma a no de fu taki dati a sani disi no de so. . . . Wi alamala na famiri fu makandra.”

Den sani disi di sabidensiman kon si e kruderi nanga san skrifi na ini Bijbel. Bijbel e leri taki Gado ben meki wán man nanga wán uma, èn ala tra libisma na bakapikin fu den (Genesis 3:20; Tori fu den Apostel 17:26). Sobun gi Gado a wán ras no hei moro a trawan, ma ala libisma de a srefi.

Yehovah no e si wan sma en skin kloru, noso fa en fesi tan leki prenspari sani. Na presi fu dati, san moro prenspari gi En na a ati fu wi, noso fa wi de inisei. A e taki: „Sma e krutu trawan fu di den e luku den fesi, ma mi e krutu sma fu di mi e luku san de na ini den ati” (1 Samuel 16:7, Contemporary English Version). Wi kan kisi furu deki-ati te wi e hori a sani disi na prakseri. Fa so?

Awansi fu sortu ras wi de, furu fu wi no de tevrede nanga a fasi fa wi fesi noso skin tan. Wi no man du furu fu kenki den sani dati. Ma wi kan kenki san de moro prenspari èn dati na den prakseri fu wi nanga na ati fu wi (Kolosesma 3:9-11). Te wi ben o ondrosuku a tori sondro fu kori wisrefi, dan wi ben kan kon si taki wi e firi wisrefi moro hei noso moro lagi leki sma fu wan tra ras, awansi na pikinso nomo. Fu di nowan fu den denki disi e kruderi nanga a fasi fa Gado e denki, meki wi musu du tranga muiti fu puru den sortu firi disi na ini wi ati.​—Psalm 139:23, 24.

Te wi e du muiti fu si wisrefi nanga trawan neleki fa Yehovah e si wi, dan wi kan de seiker taki a o yepi wi. A Wortu fu Gado e memre wi na a sani disi: „Den ai fu Yehovah e luku heri grontapu fu si san e pasa, so taki a kan sori a krakti fu en fu yepi den wan di e dini en nanga den heri ati” (2 Kroniki 16:9). Disi de tru awansi fu sortu ras wi de.