Fa fu gi pikin leri fu Gado​—San na a moro bun fasi fu du dati?

„Den sani di mi e taigi unu tide, musu de na ini un ati. Un musu leri un pikin den sani disi ibri tron baka, so taki den no frigiti den. Taki fu den sani disi te unu e sidon na ini un oso, te unu e waka na strati, te unu e didon, èn te unu opo.”​—DEUTERONOMIUM 6:6, 7.

SON LEISI papa nanga mama kan feni en muilek fu gi den pikin fu den leri. Ma te den e suku rai fu kon sabi fa den musu du dati, dan den kan bruya fu di den e kisi someni difrenti rai. Nofo tron, famiriman nanga mati lobi fu taigi den san den kan du. Boiti dati, buku, artikel na ini tijdschrift, nanga Internet e gi papa nanga mama ala sortu rai doronomo, èn son leisi, den rai disi no e kruderi nanga makandra.

Ma Bijbel de heri tra fasi, bika boiti taki a e gi papa nanga mama bun rai di e sori den san den musu leri den pikin fu den, a e leri den tu fa den musu gi den leri. Soleki fa den Bijbel vers na a bigin fu na artikel disi e sori, papa nanga mama musu suku wan fasi ibri dei fu taki fu Gado nanga den pikin fu den. Wi o poti prakseri na fo rai di skrifi na ini Bijbel èn di yepi dusundusun papa nanga mama fu gi den pikin fu den leri fu Gado.

1. Teki leri fu den sani di Gado meki. Na apostel Paulus ben skrifi: „Sensi grontapu meki, sma man si krin sortu fasi Gado abi, aladi den no man si en. Te den e luku den sani di a meki, den kan frustan taki a abi têgo krakti èn taki en na Gado trutru” (Romesma 1:20). Papa nanga mama kan du furu fu yepi den pikin fu kon si Gado leki wan trutru Sma. Den kan yepi den fu poti prakseri na den sani di Gado meki, èn fu kon si san den sani dati e leri den fu den fasi di Gado abi.

Na a fasi dati Yesus ben e gi den disipel fu en leri. A ben taki fu eksempre: „Luku den fowru di e frei na loktu bun. Den no e sai siri, den no e koti nyanyan èn den no e kibri nyanyan na ini maksin. Toku un Tata na hemel e gi den nyanyan. Unu no warti moro den?” (Mateyus 6:26) Na ini a tekst disi, Yesus poti prakseri na a lobi nanga a sari-ati fu Yehovah. Ma a ben du moro. A yepi den disipel fu kon si fa Gado ben sori den fasi dati te a ben e handri nanga den pikin fu en.

A koni Kownu Salomo ben poti prakseri na a koni di Gado gi mira, èn a gebroiki den pikin mira disi fu leri wi wan prenspari sani. Salomo ben skrifi: „Yu lesiman yu, go na den mira! Go luku fa den e libi èn kon kisi koni. Aladi den no abi edeman, fesiman, noso tiriman,  toku den e sreka den nyanyan na a waran ten fu a yari. Na a kotiten den e tyari a nyanyan fu den kon na wán” (Odo 6:6-8). Dati na wan tumusi moi fasi fa Salomo leri wi fu poti bun marki èn fu gebroiki a krakti di Gado gi wi fu doro den marki dati!

Neleki Yesus nanga Salomo, papa nanga mama kan gi bun leri tu te den e du den sani disi: (1) Aksi den pikin sortu bon nanga meti den lobi. (2) Kon sabi moro fu den bon nanga den meti dati. (3) Luku san den sani dati kan leri yu fu Gado.

2. Sori den fasi di Yesus ben e sori te a ben e gi sma leri. Fu ala den sma na grontapu, Yesus ben abi den moro prenspari sani fu leri sma. Toku a gebroiki furu fu en ten fu poti aksi gi sma. A ben wani kon sabi trutru fa den sma di a ben e gi leri ben e firi èn ben e denki (Mateyus 17:24, 25; Markus 8:27-29). Na so papa nanga mama abi furu prenspari sani tu fu leri den pikin fu den. Ma fu man gi bun leri, dan den musu teki na eksempre fu Yesus, èn den musu gi den pikin fu den deki-ati fu taki fri fa den e firi.

Ma fa a de te pikin no e tyari densrefi na wan bun fasi, noso te den no man frustan prenspari sani wantewante? Luku fa Yesus ben handri nanga den apostel fu en. Son leisi den ben e krutukrutu fayafaya nanga makandra, èn den no ben man si sortu wini a e tyari kon fu sori sakafasi. Toku Yesus tan sori pasensi èn ibri tron baka a ben e sori den taki den ben musu abi sakafasi (Markus 9:33, 34; Lukas 9:46-48; 22:24, 25). Papa nanga mama di e teki na eksempre fu Yesus, sa abi pasensi te den e gi den pikin fu den piri-ai. Te a de fanowdu, den sa leri den pikin den srefi sani ibri tron baka, teleki den kon frustan fu san ede den sani dati prenspari.

3. De wan bun eksempre gi den pikin fu yu. A bun te papa nanga mama e gi yesi na a rai di na apostel Paulus ben gi den Kresten na ini Rome. A ben skrifi den: „Yu e gi trawan leri, ma yu no e leri yusrefi? Yu e preiki gi sma: ’No fufuru’, ma yu e fufuru?”​—Romesma 2:21.

A rai dati fiti fu di den sani di papa nanga mama e du abi moro krakti na tapu den pikin fu den, leki den sani di den e taki. Fu taki en leti, te papa nanga mama e du san den e taki, dan a sa moro makriki gi den pikin fu gi yesi na den.

4. Bigin gi a pikin leri te a yongu ete. Timoteyus, di ben e wroko makandra nanga na apostel Paulus leki zendeling, ben abi wan bun nen na ini a libimakandra pe a ben e tan (Tori 16:1, 2). Disi ben de so fu di ’sensi di a ben de wan beibi’, a ben kisi leri fu „den Santa Buku”. Boiti taki Timoteyus en mama nanga en granmama ben e leisi den buku fu Bijbel gi en, den ben yepi en tu fu denki na wan fasi di e kruderi nanga den tru tori di skrifi na ini den buku dati.​—2 Timoteyus 1:5; 3:14, 15.

Pe yu kan feni yepi?

Yehovah Kotoigi e tyari difrenti publikâsi kon na doro di skrifi spesrutu fu yepi papa nanga mama fu leri den pikin den tru tori fu Gado. Sonwan fu den publikâsi disi skrifi nanga yongu pikin na prakseri. Tra sma kan yepi papa nanga mama nanga den tini pikin fu den fu taki fri nanga makandra. *

A no de fu taki dati fosi papa nanga mama kan gi den yongu pikin fu den leri fu Gado, den musu kon sabi den piki tapu wan tu muilek aksi di pikin kan poti. Fu eksempre, fa yu ben o piki aksi soleki: Fu san ede Gado e gi pasi taki sma e pina? San Gado o du nanga grontapu? Pe den dedewan de? Yehovah Kotoigi de klariklari fu yepi yu fu kon sabi a piki na tapu den aksi disi, èn na tapu tra aksi di kan yepi yu nanga yu osofamiri fu kon moro krosibei na Gado.​—Yakobus 4:8.

[Futuwortu]