Wan brifi fu Kongo (Kinsyasa)

Na ini a kontren fu a Bergi fu Faya

TE A son e opo na ini a foto Goma, dan a loktu e kon kisi wan moi rediredi kloru. A fosi sani di wi e si ibri dei, na a tumusi moi Nyiragongobergi. Disi na wan fu den bergi na grontapu di e spiti faya moro iniwan trawan. Doronomo smoko e komoto na ini a bigi olo na loktusei fu a bergi. Te neti a faya tokotoko (noso lava) na ini a bergi-olo e meki a gersi leki a smoko di e komoto na ini, redi.

Na ini Swahili, sma e kari a bergi disi Mulima ya Moto, san wani taki Bergi fu Faya. A lasti leisi di a bergi disi spiti bun furu faya tokotoko, ben de na ini 2002. Furu fu den birtisma nanga mati fu wi dyaso na ini Goma ben lasi ala san den ben abi. Na ini sonwan fu den birti pe mi nanga mi masra e preiki, wi e waka na tapu kundukundu pasi fu drei lava. Te mi e waka na tapu den pasi disi, dan mi e prakseri fa a ben o de fu waka na tapu a mun. Ma den sma di e libi dyaso no de leki a tranga lava. Alaten den de nanga prisiri, den ati safu èn den de klariklari fu arki a bun nyunsu di wi e preiki. Dati meki a de wan prisiri gi wi trutru fu dini na ini a kontren fu a Bergi fu Faya.

Tide na satra. Mi wiki, èn mi no man wakti fu si fa a dei o waka. Mi, mi masra, sosrefi wan tu mati di kon luku wi, nanga tra zendeling, o go preiki heri dei na ini a loweman kampu Mugunga di de pikinso dorosei fu a foto, na westsei. Furu fu den sma na ini a kampu disi lowe gi den ogri-ati sani di sma na ini den foto fu den e du nanga trawan.

Wi e lai a truck nanga buku di e taki fu Bijbel tori. Den buku disi skrifi na ini Fransitongo, Kiswahili, nanga Kinyarwanda. Dan wi e hari gowe. Te wi e bigin rèi na tapu na olo-olo pasi di nen Sake Pasi, wi e si fa safrisafri a foto e bigin kisi libi. Yonguman e pusu den chukudu fu den, di span nanga lai. Dati na den udu baisigri di den meki fu syow sani. Umasma di weri moi pangi e waka na wan moi fasi na sei pasi nanga bigi taitai na tapu den ede. Bromfiets, di sma sabi leki mototaxi, e rèi go-kon fu tyari sma go na wroko noso na wowoyo. Na ala sei fu a kontren yu kan si blakablaka udu oso di ferfi blaw lontu den doro nanga den fensre fu den.

Wi e doro na a Ndosho Kownukondre zaal fu miti tra Yehovah Kotoigi di o go preiki makandra nanga wi na ini a kampu. A e naki mi ati trutru fu si yonguwan, umasma di a masra fu den dede kaba, pikin di no abi papa nanga mama, èn sosrefi malengri sma. Furu fu den nyan pina trutru, ma den kon abi wan moro bun libi fu di den e hori densrefi na Bijbel gronprakseri. A howpu di Bijbel e gi sma de leki wan faya di e bron na ini den ati èn den e angri fu fruteri tra  sma fu a howpu disi. Wan syatu preikiwroko konmakandra e hori fu sori wi sortu Bijbeltekst ben o de wan deki-ati gi den sma di wi e miti èn baka dati, 130 sma e hari gowe na ini feifi pikin bus nanga wán four-wheel-drive pick up.

Wan afu yuru baka dati, wi e doro na a kampu. Hondrohondro pikin weti tenti seti na tapu wan gron di tapu nanga drei lava. Na mindrisei fu a loweman kampu, grupu toilet seti moi gi den sma drape, sosrefi presi pe sma kan wasi krosi. Na alasei yu kan si sma e wasi sani, e bori, e piri bonki, èn e figi a mofodoro fu a tenti fu den.

Wi e miti wan man di sma e kari Papa Jacques. A man disi abi a frantwortu fu wan spesrutu pisi fu a kampu. A e broko en ede nanga a fasi fa a musu kweki den pikin fu en na ini a muilek ten disi. A ben breiti srefisrefi di wi gi en a buku Wat jonge mensen vragen ​— Praktische antwoorden (Sani di yongu sma e aksi​—Piki di kan yepi den). A taki dati a o leisi en èn taki baka dati, a o tyari pikin grupu sma kon na wán fu fruteri den san a leri.

Wi e waka pikinso moro fara èn wi e miti wan uma di den e kari Mama Beatrice. A e aksi wi fu san ede Gado e gi pasi taki sma e pina. A e bribi taki na Gado e strafu en. En masra lasi en libi na ini na orloku èn na umapikin fu en no abi masra èn a e du muiti fu kweki a beibi fu en na ini a kampu. Boiti dati, wan tu mun na fesi, sma grabu a boi fu en tyari gowe. Te nanga now a no sabi pe a de.

Den sari tori di Mama Beatrice e fruteri, e meki mi prakseri fa Yob ben musu fu firi di a kisi ala sortu takru nyunsu. Wi e sori en fu san ede sma e pina èn wi e yepi en fu kon frustan taki den problema di a abi no de wan strafu fu Gado (Yob 34:10-12; Yakobus 1:14, 15). Wi e sori en krin tu sortu kenki Gado o tyari kon heri esi na grontapu nanga yepi fu a Kownukondre fu en. Safrisafri en fesi e kenki èn a e bigin lafu pikinso. A e taigi wi taki a o tan studeri Bijbel èn taki a o begi Gado fu yepi en.

Ala sma na ini a grupu nyan bun fu a dei èn wi alamala ben e firi taki Yehovah yepi wi trutru fu gi den sma drape howpu nanga deki-ati. Wi e gowe libi a kampu èn furu fu den sma drape e wai anu gi wi aladi den e hori den traktaat, den tijdschrift, nanga den buku fu den na loktu.

Wi e rèi go na oso èn mi e prakseri baka fa a dei waka. Mi breiti trutru taki mi ben abi na okasi fu teki prati na a spesrutu dei disi. Mi e prakseri fa Papa Jacques ben breiti, fa Mama Beatrice no ben e sari moro, èn fa wan owru uma di ben e lafu nomo nanga mi ben gi mi wan steifi anu. Mi e prakseri den yonguwan di poti ala sortu moi aksi di ben e sori taki den lepi gi a yari fu den. Mi abi furu lespeki gi den sma di mi miti. Den e pina srefisrefi, ma toku den de nanga prisiri ete èn den e lafu.

Na ini a pisi disi fu grontapu, mi e si a tranga muiti di furu tra sma e meki fu tyari frulekti kon gi den wan di e pina. Tide a ben de wan grani gi mi trutru taki mi ben man gebroiki Bijbel fu sori sma a têgo lusu gi den problema fu den. Mi breiti srefisrefi taki mi e teki prati na a moro bigi wroko di e du na grontapu fu tyari frulekti kon gi sma nanga yepi fu Bijbel.