Bijbel e kenki sma libi

SAN meki taki wan yongu uma di drai baka gi den sani di a ben leri fu Gado sensi di a ben pikin, bigin dini Gado baka? Meki wi go luku san a abi fu taki.

„Now mi e du wan bun sani nanga mi libi.”​—LISA ANDRÉ

A GEBORE NA INI 1986

KONDRE: LUXEMBURG

A BEN DE WAN PIKIN DI DRAI KON BAKA NA GADO

A LIBI FU MI FOSI: Mi kweki na ini Bertrange, wan pikin gudu foto krosibei fu Luxemburg. A foto disi krin èn ogri no ben e pasa so furu drape. Mi na a moro yonguwan fu den feifi pikin fu mi papa nanga mama. Mi papa nanga mama na Kotoigi fu Yehovah, èn den du tranga muiti fu leri mi nanga den brada nanga sisa fu mi Kresten markitiki.

Di mi tron wan tini, dan mi bigin tweifri na den sani di Yehovah Kotoigi e leri. Na a bigin, mi no ben e si a sani dati leki wan problema, ma safrisafri a bribi fu mi ben e kon swaki. Mi papa nanga mama ben du ala san den man fu sori mi a yoisti pasi, ma mi no ben wani taki den yepi mi. Sondro taki mi papa nanga mama ben sabi, mi ben e bumui nanga yonguwan di no ben abi lespeki gi bigiwan. Mi ben wani libi leki den, fu di a ben gersi leki den ben kan du ala san den wani. Wi ben lobi go na fesa, wi ben abi seks nanga difrenti sma, wi ben e gebroiki drugs, èn wi ben e dringi tumusi furu sopi. Na a bigin, mi ben breiti fu de nanga sma di ben e du ala san den ben wani na ini den libi. A ben gersi leki den ben de koloku.

Aladi mi ben e bumui nanga den sma dati, toku a libi no ben e gi noti. Nowan fu den ben e si a libi leki wan seryusu sani. Ma mi ben e broko mi ede nanga a kruktudu di ben e pasa na heri grontapu. Te fu kaba, mi bigin firi brokosaka moro nanga moro.

A FASI FA BIJBEL KENKI MI LIBI: Di mi ben abi 17 yari, dan mi ben e firi brokosaka srefisrefi wan dei. Fu di mi mama ben si taki mi no ben de koloku, meki a aksi mi fu studeri Bijbel baka. A gi mi deki-ati fu ondrosuku den leri fu Bijbel èn fu bosroiti efu mi ben wani hori misrefi na den leri dati. Fu di mi nanga mi mama taki so krin nanga makandra, meki mi kisi wan tra denki fu sani. Mi agri fu studeri Bijbel nanga mi bigi sisa nanga en masra, Akif. Mi swagri no ben kweki leki wan Kotoigi fu Yehovah, ma a ben tron wan Kotoigi di a ben de wan bigisma kaba. Den sani di Akif ben ondrofeni na ini en libi, meki taki mi ben man taki krin nanga en, èn na a sani dati ben prenspari gi mi.

 Mi ben sabi taki a fasi fa mi ben e libi no ben fiti gi wan Kotoigi. Toku mi ben feni taki tra sma no ben musu taigi mi san mi ben musu du nanga mi libi. Ma di mi ben e studeri Bijbel, mi kon frustan taki a fasi fa mi e tyari misrefi abi krakti tapu den firi fu Yehovah (Psalm 78:40, 41; Odo 27:11). Mi kon frustan tu taki a fasi fa mi e tyari misrefi abi krakti tu tapu tra sma.

Di mi ben e studeri Bijbel moro fara, dan mi kon si taki furu buweisi de taki a buku disi na a Wortu fu Gado. Fu eksempre, mi kon sabi taki furu Bijbel profeititori kon tru finifini soleki fa a ben skrifi, èn a sani dati naki mi ati. Fu di mi kon sabi den sani dati, meki mi no ben e tweifri moro leki fosi.

Pikinmoro wán yari baka di mi bigin studeri Bijbel, mi go makandra nanga mi papa nanga mama fu go luku mi bigi brada di ben e wroko na a bijkantoro fu Yehovah Kotoigi na ini Doisrikondre. Di mi si fa mi brada de koloku, dan dati naki mi ati. Na dati mi ben wani tu! Mi ben wani de koloku neleki en. A ben naki mi ati tu fu si den tra Kotoigi di ben e wroko drape. Den ben de heri tra fasi leki den mati fu mi di ben abi bedrigifasi èn di ben e suku nomo fu meki prisiri. Syatu baka dati, mi begi Yehovah nanga mi heri ati èn mi pramisi en taki mi o dini en mi heri libi langa. Di mi ben abi 19 yari, dan mi teki dopu fu sori taki mi gi misrefi abra na Yehovah.

DEN WINI DI MI KISI: Now mi e du wan bun sani nanga mi libi. A e gi mi prisiri fu studeri Bijbel nanga sma, èn fu yepi den fu kon sabi Yehovah nanga den sani di a o du na ini a ten di e kon. Mi famiri kisi wini tu fu di den no abi fu broko den ede moro nanga mi.

Mi sabi taki mi ben meki fowtu fosi, ma mi e pruberi fu no denki den fowtu dati. Na presi fu dati, mi e tan hori na prakseri taki Yehovah gi mi pardon èn taki a e broko en ede nanga mi fu di a lobi mi. Mi e agri dorodoro nanga den wortu disi di skrifi na Odo 10:22: „A blesi fu Yehovah, na dati e meki sma kon gudu èn a no e meki den firi sari.”

[Prenspari pisi na tapu bladzijde 12]

„Wi ben lobi go na fesa, wi ben abi seks nanga difrenti sma, wi ben e gebroiki drugs, èn wi ben e dringi tumusi furu sopi”

[Prenspari pisi na tapu bladzijde 13]

„Mi sabi taki mi ben meki fowtu fosi, ma mi e pruberi fu no denki den fowtu dati”