Den tru tori fu Gado kan kenki yu libi

KANDE yu yere noso leri wan fu den leitori di sma e fruteri fu Gado, soleki fa den artikel disi tyari kon na krin. Toku yu ben kan draidrai fu bribi tra sani, spesrutu te yu ben bribi wan fu den leitori langa ten kaba.

Wi kan frustan fu san ede sma e draidrai fu bribi tra leri. Son kerki e leri sma taki a no bun fu ondrosuku efu den sani di den e leri e kruderi nanga Bijbel. Tra kerki wani sori taki den falsi leri fu den bun. Fu dati ede den e taki dati Bijbel muilek tumusi fu frustan èn taki a no ala sma man frustan en. Toku furu fu den disipel fu Yesus ben de sma di no ben kisi heiskoro-leri, èn den ben man frustan krin san a ben e leri den.​—Tori fu den apostel 4:13.

Kande yu e draidrai tu fu ondrosuku a bribi fu yu, fu di yu frede taki dati ben o sori taki a bribi fu yu no tranga. Ma yu denki taki Gado no ben o feni en bun te yu e ondrosuku Bijbel? Yu denki taki a no wani yu frustan a boskopu di a seni gi libisma? Nôno. Na presi fu dati, a Wortu fu en e gi yu deki-ati fu ondrosuku Bijbel. A e taki: „Sabi san na a wani fu Gado di bun, di e gi en prisiri, èn di no e mankeri noti.”​—Romesma 12:2.

Te wi e ondrosuku den tru tori fu Gado, dan wi no e du dati nomo fu kon sabi nyun sani, ma a kan yepi wi fu kon abi wan moro bun libi (Yohanes 8:32). Deanne, di wi ben taki fu en na ini a fosi artikel, kon abi wan bribi now di e kruderi nanga Gado Wortu. A e fruteri: „Noiti mi ben sabi taki Gado Wortu de so makriki fu frustan, teleki mi bigin studeri Bijbel. Mi sabi Yehovah now. A no de wan Gado di no e broko en ede nanga mi, ma a de mi lobi-ati hemel Tata. Now mi de koloku trutru.”

Kande yu ben studeri Bijbel bifo, ma yu feni taki yu no kisi wini fu dati. Efu dati de so, dan no lasi-ati. Te yu ben leri soso lei fu Gado, dan dati de neleki te yu e go na wan presi, aladi yu no sabi soifri fa fu go drape. A pasi di sma taigi yu fu teki no de a yoistiwan. Kande sani e waka bun na a bigin, ma te fu kaba yu e lasi-ati fu di yu no man feni a pasi go drape. Sobun, efu yu wani doro a presi pe yu wani go, dan yu musu kon sabi krin sortu pasi yu musu teki go drape.

Yu wani kon sabi den tru tori fu Gado? Dan pruberi fu miti Yehovah Kotoigi na ini yu birti, noso skrifi go na wan fu den adres na tapu bladzijde 4 fu a tijdschrift disi, so taki den kan kon na yu oso fu studeri Bijbel nanga yu, sondro taki yu abi fu pai gi dati.

[Prenspari pisi na tapu bladzijde 9]

„Sabi san na a wani fu Gado di bun, di e gi en prisiri, èn di no e mankeri noti.”​—ROMESMA 12:2.