Yu ben sabi a sani disi?

Fu san ede sma di ben e broko moni ben de na ini a tempel fu Yerusalem?

▪ Syatu bifo Yesus dede, a poti prakseri na wan bigi ogri di ben e pasa na ini a tempel. Bijbel e taki: „Yesus . . . yagi ala den sma go na dorosei di ben e seri èn ben e bai sani na ini a tempel. A drai den tafra tapu fu den sma di ben e broko moni èn den bangi fu den sma di ben e seri doifi. A taigi den: ’Gado Buku taki: „Sma o kari mi oso, wan oso pe sma e kon begi”, ma unu e meki a kon tron wan presi pe fufuruman e tan.’”​—Mateyus 21:12, 13.

Den Dyu fu a fosi yarihondro nanga den sma di ben teki a Dyu bribi, ben e komoto na furu kondre nanga foto fu go na a tempel na ini Yerusalem, èn den ben abi moni na den di ben de fu a presi pe den ben komoto. Ma den ben musu abi a yoisti moni fu man pai na alayari belasting moni fu a tempel, fu man bai meti fu tyari leki ofrandi, èn fu man tyari tra sortu ofrandi. Sobun, den sma di ben e broko moni ben kan kenki a moni gi den sma disi di ben e komoto fu difrenti presi, èn den ben e hori pikinso fu a moni dati leki pai. Te a ten ben e doro fu hori den Dyu fesa, dan den sma disi di ben e broko moni ben e seti tafra na ini a tempel, na ini a Fesidyari fu den sma di no de Dyu.

Di Yesus krutu den sma di ben e broko moni taki den ben e meki a tempel kon tron „wan presi pe fufuruman e tan”, dan a ben wani sori nanga dati taki den ben e aksi sma tumusi furu moni gi a yepi di den ben e gi den.

Fu san ede olèifbon ben prenspari srefisrefi na ini Bijbel ten?

▪ Olèifbon nanga droifidyari ben de tu fu den blesi di Gado ben o gi a pipel fu en efu den ben o tan gi yesi na en (Deuteronomium 6:10, 11). Te nanga a dei fu tide, olèifbon prenspari srefisrefi gi den sma fu den kontren pe den bon disi e gro. Den bon disi kan gi nyanyan hondrohondro yari langa, sondro taki sma abi fu sorgu tumusi furu gi den. Wan bon di sma e kweki kan gro bun srefi na ini gron di lai nanga ston èn srefi na ini dreiten. Te sma koti a bon, dan a bontompu e gi sproiti di kan gro kon tron nyun taki.

Na ini Bijbel ten, a buba nanga den wiwiri fu a bon ben prenspari gi sma, fu di den ben e gebroiki den leki dresi fu saka korsu. A tara di e komoto fu den owru taki e smeri vanille, èn sma e gebroiki dati fu meki switismeri. Ma moro furu, a bon disi ben prenspari fu di sma ben kan gebroiki den froktu nanga na oli fu en fu meki nyanyan sani. Te sma masi wan lepi olèif, dan afu fu en na oli.

Wan bon di e gro bun, kan gi sowan 57 liter oli na ini wán yari. Sma ben e gebroiki olèif oli tu gi lampu, gi sani di ben abi fu du nanga na anbegi, gi a skin nanga a wiwiri fu den, èn leki dresi gi soro nanga tra mankeri di ben e gi sma skin-ati.​—Eksodes 27:20; Lefitikus 2:1-7; 8:1-12; Rut 3:3; Lukas 10:33, 34.