A prenspari fu kon sabi a piki?

„Di mi ben abi tin yari, mi bigin hori nanga boi. Na a bigin, wi ben e hori makandra anu èn bosi makandra. Fosi yu denki, wi ben e fasifasi makandra skin èn wi ben e du ala sortu fisti sani. Di mi ben abi 15 yari, mi bigin wroko èn den mansma na wrokope ben wani abi seks nanga mi. Mi ben wani sori den sma na wrokope taki mi no ben de wan pikin meisje èn fu dati ede mi ben e du den sani di den ben e du. Mi ben wani taki den ben o si mi leki wan fu den, èn dati meki mi bigin du moro nanga moro sani di abi fu du nanga seks.”​—SARAH, * AUSTRALIA.

YU BEN O wani bribi taki Sarah ben kweki na ini wan osofamiri di e anbegi Gado? En papa nanga mama kweki en fu hori ensrefi na den markitiki fu Bijbel. Ma Sarah go libi wan tra sortu libi.

Furu sma no ben o abi problema nanga a fasi fa Sarah ben e libi. Den e bribi taki den sani di Bijbel e taki fu seks no de gi a ten disi kwetikweti. Trawan feni taki a no de wan problema te wan sma di e taki dati a e anbegi Gado, e du san a wani te a abi fu du nanga seks.

Yu denki taki a prenspari fu kon sabi san Bijbel e taki fu seks èn fu hori yusrefi na den sani dati? Bijbel srefi e taki: „Na Gado srefi ben meki sma skrifi ala den sani di de na ini Gado Buku. Den sani disi bun fu gi leri” (2 Timoteyus 3:16). Efu yu e bribi taki na Gado meki libisma èn taki na en meki sma skrifi Bijbel, dan a prenspari fu kon sabi san Bijbel e taki fu a tori disi.

A de wan sari sani taki furu sma no sabi krin san Bijbel e taki fu seks. Kerki fesiman di e taki dati den e lespeki Bijbel e leri sma ala sortu sani di no e kruderi nanga makandra te a abi fu du nanga seks. Fu taki en leti, a tori disi meki taki furu bigi kerki kon prati.

Na presi fu luku san trawan e taki, a ben o bun fu teki wan tu miniti fu ondrosuku a tori disi gi yusrefi. A tra artikel o poti prakseri na tin aksi di sma e poti nofo tron te a abi fu du nanga san Bijbel e taki fu seks. Na ini na artikel dati yu o kisi krin piki di e sori san Bijbel e leri trutru. A di fu dri artikel di e taki fu a tori disi o sori fu san ede a prenspari fu go luku sortu bosroiti wi e teki ini a tori disi.

[Futuwortu]