Wan brifi fu Noorwegen

Wi e go na wan bigi weti sabana

WAN fruku mamanten na ini a kowru pisi ten fu a yari, wi e opo den garden pikinso fu si fa a weer de. Wi breiti srefisrefi fu si wan moi blaw hemel! Wi o go preiki dri dei na Finnmarksvidda, wan plata kontren fu den bergi, na a noordsei fu Noorwegen.

Na a pisi ten disi fu a yari, a kowru srefisrefi na ini Noorwegen. Fu dati ede wi e frede pikinso fu go na a sabana di de na a noordsei fu a kondre. Wi breiti taki wi e go makandra nanga dri Yehovah Kotoigi di e libi na ini a kontren dati. Den sabi san wi kan fruwakti drape èn den gi wi bun rai.

Furu pasi no de drape. A moro bun fasi fu doro den sma di e libi na den farawe kontren, na te yu e go nanga wan sortu skooter di e grati na tapu a snew. Wi e tyari wi krosi, nyanyan sani, nanga na oli di wi o abi fanowdu gi den skooter bakaten. Ala den sani disi wi e tai na tapu den skooter fu wi èn na tapu a sortu wagi di wi e hari. Na wi fesi wi man si soso a bigi plata bergi kontren di tapu nanga snew. A snew e brenki leki dyamanti na ini a son. A kontren moi fu tru!

Na ini Finnmarksvidda, yu abi difrenti sortu dia, sosrefi tigri, bigi konikoni, sabanadagu, krabudagu, nanga wan tu beer. Ma a sani di e gi wi moro prisiri, na taki wi o miti den sma di e libi na ini a farawe kontren disi. Wi no man wakti fu miti wan tu fu den Samisma. Den sma disi e kweki dia fu sorgu densrefi, noso den e wroko na den oso na ini a kontren drape pe sma e kon hori fakansi.

Dorosei fu a fosiwan fu den oso disi, wi e miti wan tu yonguwan di kon drape nanga a klas fu den fu teki waka na ini a kontren drape. Den ben e grati pasa na tapu na ijs nanga yepi fu spesrutu sani di den ben e weri na den futu. Den e kon taki nanga wi èn den e aksi wi san wi e du. A no de fu taki dati wi de klariklari fu fruteri den dati. Te wi e gowe, dan wan fu den e taigi wi taki a e howpu taki sani waka bun nanga a Bijbel wroko fu wi. Te wi e rèi gowe baka, dan wi e abra bigi pisi watra di kon tron ijs èn wi e pasa sosrefi bigi opo presi di tapu nanga snew. Wi e howpu taki wi o si wan tu dia na pasi.

Te wi e doro wan pikin oso, dan wan man e gi wi wan switi odi. Boiti en, wan tu sma nomo e libi dyaso. Te a si taki a wagi di wi e hari baka a skooter broko, dan a de klariklari fu meki en gi wi. A e teki en ten fu du dati, iya, den sma dyaso no e hasti densrefi. A fasi fa a e du e meki taki wi no e broko wi ede tumusi tu. Te a kaba meki a wagi, dan wi e  taigi en tangi èn wi e fruteri en wan tu sani fu Bijbel di e sori fu san ede Gado e gi pasi taki sma e pina. A e poti ala en prakseri na den sani di wi e taigi en. Fosi wi e gowe a e teki a buku San Bijbel e leri wi trutru? nanga wan tu Waktitoren nanga Ontwaakt! A e lafu èn a e taki: „Grantangi taki un kon na mi.”

Baka te wi go na ete wan tu sma, neti e bigin fadon èn wi e hari go baka na a oso pe wi o sribi. Wantronso wi e si wan sabanadagu. A moi fu si fa den redi wiwiri fu en e brenki na ini a weti snew. A sabanadagu e tanapu luku wi wan momenti neleki a e aksi ensrefi suma na wi, ne a e waka go doro. Now snew e bigin fadon, èn a sani disi e meki en muilek gi wi fu si pe wi e go. Wi breiti srefisrefi te wi e si na oso te fu kaba! Wi e meki wan faya na ini na onfu, èn safrisafri a presi e kon waran. Wi weri srefisrefi fu di wi heri skin ben e sekiseki di wi ben e rèi a skooter heri dei. Ma toku wi ben breiti.

Fosi yu denki, mamanten doro. Wi e poti den sani fu wi baka na tapu a skooter èn wi e rèi go na a lagipresi, ne wi e go pe a liba e tyari wi, teleki wi doro wan tra oso pe sma e hori fakansi. Dyaso wi e miti wan yonkuman èn wi e fruteri en wan tu moi sani fu Bijbel. Na wan switi fasi a e sori wi san na a moro makriki fasi fu doro baka na a pasi di wi ben teki.

Te fu kaba, a lasti dei fu wi drape doro. Te wi e rèi go na ini Stabbursdalen National Park, dan wi e si wan tumusi moi presi na wi lontu, èn farawe wi e si bergi di e brenki na ini a son fu di den abi snew na den tapu. Wantronso wi e si wan bigi ipi dia! Den e waka e nyan grasi neleki noti no pasa, èn den e gebroiki den bigi futu fu den fu diki fini grasi puru di kibri na ondro a snew. Pikinso moro fara wi e si wan Samisma. A e sidon na tapu en skooter e luku den dia fu en. A dagu fu en e luku na ipi bun, èn a e sorgu taki den dia e tan na makandra. A dagu e drai luku wi wan momenti fu smeri suma na wi. Ma heri esi, a e poti prakseri baka na a wroko fu en. Wi e fruteri a man di e luku den dia a boskopu fu wi. A abi switifasi èn a e arki wi.

Te wi e drai go baka na oso, dan wi e prakseri den sma di wi miti na pasi di wi rèi 300 kilometer go na a noordsei. Wi feni en wan grani taki wi ben man yepi pikinso fu preiki gi den sma na ini a bigi weti sabana disi.

[Sma di abi a reti fu a prenki na tapu bladzijde 15]

© Norway Post