Abraham​—Wan man di ben abi lobi

Abraham e sari srefisrefi. En lobi wefi, Sara, dede. Te a e beri en wefi, dan a e prakseri ala den moi momenti di a ben abi nanga en. Abraham e sari èn a e krei (Genesis 23:1, 2). A no de wan syen taki Abraham e krei, ma na presi fu dati, a krei di a e krei e sori wan fu den moro moi fasi fu en, èn dati na lobi.

SAN NA LOBI? Lobi na te wan sma abi waran firi gi wan trawan di prenspari trutru gi en. Wan sma di abi lobi, e du sani di e sori fa a e firi gi trawan, awansi dati e aksi furu fu en.

FA ABRAHAM BEN SORI LOBI? Abraham ben sori taki a lobi en osofamiri. A no de fu taki dati Abraham ben abi furu fu du. Toku a ben tan poti prakseri na en osofamiri, èn a ben e yepi den tu fu kon moro krosibei na Gado. Fu taki en leti, Yehovah srefi si taki leki osofamiri edeman, Abraham ben e teki fesi na ini na anbegi (Genesis 18:19). San moro prenspari, na taki Yehovah taki krin fu a lobi fu Abraham. Di Gado ben e taki nanga Abraham, dan Gado kari Isak ’a manpikin di yu lobi trutru’.​—Genesis 22:2.

Wan tra sani di e sori taki Abraham ben abi lobi, na te wi e luku a fasi fa a ben e firi di en lobi wefi, Sara, dede. Abraham krei so te. Aladi a ben de wan kánkan man-nengre, toku a no ben e syen fu sori taki a e sari. Abraham sori na wan moi fasi taki a ben de wan tranga man di ben abi safu-ati.

Abraham ben sori taki a lobi a Gado fu en. A heri fasi fa a ben e libi ben e sori dati. Fa so? Kande wi e memre san Bijbel e taki na  1 Yohanes 5:3: „Te wi lobi Gado, dan wi o hori den komando fu en.” A sani disi e sori taki Abraham ben de wan bun eksempre fu wan sma di ben lobi Gado.

Ibri tron baka te Yehovah ben taigi Abraham fu du wan sani, dan Abraham ben e gi yesi wantewante (Genesis 12:4; 17:22, 23; 21:12-14; 22:1-3). A no ben abi trobi efu a sani di Yehovah ben aksi en ben makriki noso ben muilek fu du. A no ben abi trobi tu efu Abraham ben sabi fu san ede Yehovah ben aksi en fu du a sani dati. Gi Abraham, den sani dati no ben prenspari. Efu Gado ben wani taki a du wan sani, dan a ben de klariklari fu du dati. Abraham ben e si ibri sani di Gado ben taigi en fu du leki wan okasi fu sori lobi gi Yehovah.

SAN WI E LERI FU DEN SANI DISI? Neleki Abraham, wi kan sori lobi gi trawan, spesrutu gi den memre fu wi osofamiri. Noiti wi musu meki den tyalensi fu a libi tapu wi fu meki ten gi den wan di prenspari srefisrefi gi wi.

A bun tu te wi e leri fu lobi Yehovah nanga wi heri ati. A lobi dati kan abi bun furu krakti tapu wi libi. Fu eksempre, a kan gi wi deki-ati fu tyari kenki kon na ini den fasi fu wi, na ini a fasi fa wi e taki, èn na ini a fasi fa wi e tyari wisrefi, so taki wi kan plisi Gado.​—1 Petrus 1:14-16.

A tru taki a no makriki ala ten fu du san Yehovah e taigi wi fu du. Ma wi kan abi a dyaranti taki a sma di yepi Abraham, a sma di ben e kari en „mi mati”, sa yepi wi tu (Yesaya 41:8). A Wortu fu en, Bijbel, e pramisi: „A o meki unu kon tranga” (1 Petrus 5:10). Dati na wan heri moi pramisi di wi e kisi fu a bun mati dati fu Abraham!

[Faki na tapu bladzijde 11]

A fiti taki wan man e krei?

Furu sma ben o taki dati a sani dati no fiti. Kande den no o wani bribi srefi taki Abraham ben de wan fu den someni kánkan man-nengre di krei di den ben de na ini banawtu, soleki fa Bijbel e sori. Tra man di krei tu ben de Yosef, David, na apostel Petrus, den owruman fu a gemeente na ini Efeise, èn sosrefi Yesus (Genesis 50:1; 2 Samuel 18:33; Lukas 22:61, 62; Yohanes 11:35; Tori fu den apostel 20:36-38). A de krin taki Bijbel no e leri wi taki a no fiti taki wan man e krei.