▪ Soleki fa a Bijbel buku Genesis e sori, dan Yehovah Gado ben aksi Abraham fu gi en manpikin Isak leki ofrandi (Genesis 22:2). Son sma di e leisi Bijbel, no man frustan a tori dati. Wan professor di nen Carol, e taki: „Di mi yere a tori dati fu a fosi leisi di mi ben pikin, dan mi mandi srefisrefi. Sortu Gado ben o aksi wan sma fu du so wan sani?” Aladi wi kan frustan taki sma e firi so, toku a bun fu hori wan tu sani na prakseri.

Meki wi luku fosi san Yehovah no du. A no gi pasi taki Abraham kiri en manpikin, aladi Abraham ben de klariklari fu du dati. Wan tra sani, na taki noiti moro Gado aksi wan sma fu du so wan sani. Yehovah wani taki ala den anbegiman fu en, sosrefi den pikin, e tan na libi. Iya, a wani taki den libi langa èn taki den de koloku.

A di fu tu sani, na taki Bijbel e sori taki wan spesrutu sani ben de fu san ede Gado aksi Abraham fu gi Isak leki ofrandi. Gado ben sabi taki hondrohondro yari baka dati, a ben o gi pasi taki en eigi Manpikin, * Yesus, dede fu a bun fu wi (Mateyus 20:28). Yehovah ben wani meki wi kon frustan o hebi a ben o de gi en fu gi en manpikin leki ofrandi. Nanga yepi fu a sani di a aksi Abraham fu du, a sori wi krin fa a ben o de te en eigi manpikin ben o gi en libi. Fa so?

Luku san Yehovah ben taigi Abraham: ’Grantangi, teki Isak, a wan-enkri manpikin fu yu di yu lobi trutru èn gi en leki wan bron-ofrandi’ (Genesis 22:2). Luku taki Yehovah ben kari Isak a manpikin „di yu lobi trutru”. Yehovah ben sabi o furu Abraham ben lobi Isak. Gado ben sabi tu fa a ben firi gi en Manpikin Yesus. Yehovah ben lobi Yesus so te, taki tu leisi a ben taki komoto fu hemel taki Yesus na en „Manpikin, a lobiwan”.​—Markus 1:11; 9:7.

Luku tu taki di Yehovah ben aksi Abraham fu tyari en manpikin leki ofrandi, dan a ben taki sosrefi „grantangi”. Wán Bijbel sabiman e taki dati a wortu disi di Gado gebroiki, e sori taki „a MASRA e frustan taki a sani di a ben e aksi Abraham fu du no ben makriki srefisrefi”. Soleki fa wi kan si, dan a sani dati ben musu fu meki Abraham sari trutru. Na so a de tu taki wi no man frustan trutru fa Yehovah ben e sari di a ben e luku fa en lobi Manpikin ben e pina èn fa a dede. A no de fu taki dati noiti ete wan sani ben gi Yehovah so furu sari, èn noiti moro dati o pasa.

Sobun, aladi a kan taki wi e kisi gro-skin te wi e prakseri a sani di Yehovah aksi Abraham fu du, toku a bun te wi e hori na prakseri taki Yehovah no gi pasi taki a reti-ati famiri-edeman dati kiri en manpikin. A sorgu taki Abraham no ben abi fu ondrofeni a moro bigi sari di wan papa noso mama kan kisi. Iya, a kibri a libi fu Isak. Ma toku „en eigi Manpikin srefi [Yehovah] no kibri, ma a libi en meki a dede gi wi alamala” (Romesma 8:32). Fu san ede Yehovah ben de klariklari fu ondrofeni so wan takru sani? A du dati so taki wi kan „kisi libi” (1 Yohanes 4:9). Dati na wan krakti buweisi taki Gado lobi wi! A sani disi e gi wi deki-ati fu sori lobi tu gi en, a no so? *

[Futuwortu]