Suma ben de Abraham?

FURU mansma no de di abi so furu krakti tapu den difrenti bribi di de na grontapu. Ma Abraham ben de wan fu den man dati. * Dyu, Moslim, nanga Kresten, abi bigi lespeki gi a man disi. Sma e taki dati a de wan „tumusi prenspari sma na ini den Santa Buku” èn sosrefi „wan tumusi bun eksempre fu wan sma di abi bribi”. Bijbel e kari en „a Tata fu ala sma di e bribi”.​—Romesma 4:11.

Fu san ede sma ben abi so furu lespeki gi Abraham? Wan sani, na taki Abraham ben de a wan-enkri sma di Bijbel e taki krin fu en dati a ben de wan mati fu Gado, èn Bijbel e taki a sani dati dri leisi!​—2 Kroniki 20:7; Yesaya 41:8; Yakobus 2:23.

Ma te yu luku en bun, dan Abraham ben de wan sma neleki wi. A ben abi den srefi broko-ede leki wi èn a ben man horidoro na ini den situwâsi dati. Yu wani sabi fa a ben man du dati? Luku san Bijbel e taki fu na aparti man disi.

A fasi fa a ben kweki

Abraham gebore na ini a yari 2018 fosi Krestes, èn a kweki na ini Ur (Genesis 11:27-31). Ur ben de wan bigi èn gudu foto. Bun furu sma na ini a foto dati ben e anbegi falsi gado. A kan taki Abraham en papa, Tera, ben de wan fu den sma di ben e anbegi difrenti falsi gado (Yosua 24:2). Ma Abraham bosroiti fu anbegi Yehovah * wawan na presi fu den tra falsi gado di no man du noti.

Fu san ede Abraham teki a bosroiti dati? We, a ben gebore 150 yari fosi Sem, a manpikin fu Noa, dede. Efu Abraham ben abi demakandra nanga a man dati di ben owru omeni yari moro en, dan sortu krakti dati ben abi na en tapu? Kande Abraham ben leri fu Sem srefi fa a ben de fu pasa a Frudu libilibi. Kande a ben leri tu o prenspari a de fu anbegi Yehovah, a Gado di ben kibri a libi fu Sem nanga en famiri na a ten fu a Frudu.

Awansi Abraham ben yere den sani disi fu Sem noso fu tra sma, toku a poti bribi na ini den sani di a ben leri fu a tru Gado. Di Yehovah, „a sma di e ondrosuku sma ati”, ben luku Abraham, dan a si wan bun sani na ini en èn a yepi en fu tron wan moro bun sma.​—Odo 17:3; 2 Kroniki 16:9.

A libi fu en

Abraham ben libi wan koloku libi en a ben abi furu fu du. Ala ten tyalensi ben e miti en, ma noiti den sani dati ben de fu soso. Luku wan tu fu den sani di a ben ondrofeni.

▪ Di Abraham ben e libi na ini Ur, dan Gado taigi en fu gowe libi a kondre pe a ben gebore èn fu go na a presi pe A ben o sori en fu go. Aladi Abraham nanga Sara no ben sabi finifini pe den ben o go, noso fu san ede Gado ben aksi den fu gowe libi a kondre fu den, toku den gi yesi. Te fu kaba, Abraham nanga Sara ben e libi na ini tenti na ini a kondre Kanan, èn den ben e hari fu a wan presi go na a trawan den heri libi langa.​—Tori fu den apostel 7:2, 3; Hebrewsma 11:8, 9, 13.

▪ Di Abraham nanga Sara no ben abi pikin ete, dan Yehovah pramisi Abraham taki a ben o meki a tron na afo fu wan bigi pipel. Yehovah taki tu dati ala den famiri fu grontapu ben o kisi blesi nanga yepi fu Abraham (Genesis 11:30; 12:1-3). Bakaten Yehovah taki dati a ben o du ete san a pramisi. A taigi Abraham  taki den bakapikin fu en ben o kon furu leki den stari na hemel.​—Genesis 15:5, 6.

▪ Di Abraham ben abi 99 yari èn Sara ben doro 90 yari, dan Yehovah pramisi den taki den ben o kisi wan manpikin. Gi libisma a sani dati no ben o man, ma Abraham nanga Sara ben o kon si taki nowan sani no de „di Yehovah no man du” (Genesis 18:14). Wán yari baka dati, di Abraham ben abi 100 yari, a tron a papa fu wan manpikin di a kari Isak (Genesis 17:21; 21:1-5). Gado ben taigi en krin taki nanga yepi fu Isak, libisma ben o kisi furu blesi.

▪ Wan tu yari baka dati, Yehovah aksi Abraham fu du wan sani di no ben makriki gi en. A aksi Abraham fu gi en lobi manpikin Isak leki ofrandi, aladi a yonkuman dati no ben trow èn a no ben abi pikin. * Aladi a ben musu fu firi sari taki a ben o abi fu lasi en manpikin na so wan fasi, toku a du san Yehovah aksi en èn a sreka sani fu gi Isak leki ofrandi. Abraham ben abi a tranga bribi taki Gado ben o man gi Isak wan opobaka efu dati ben de fanowdu, fu man meki den pramisi fu En kon tru (Hebrewsma 11:19). Leti na a momenti di Abraham ben o gi en manpikin leki ofrandi, Gado kon na ini a tori èn a kibri Isak en libi. A prèise Abraham fu di a ben gi yesi na en na ini ala sani. Ne Yehovah memre Abraham baka na den sani di a ben pramisi en.​—Genesis 22:1-18.

▪ Di Abraham ben abi 175 yari, dan a kon dede. Bijbel e taki dati a „libi wan bun libi” èn „a ben owru srefisrefi” (Genesis 25:7, 8). Na so Abraham si a kontru fu wan tra sani di Gado ben pramisi en. Iya a ben o libi langa èn a ben o dede nanga wan korostu firi.​—Genesis 15:15.

San wi e leri fu a man disi?

A no de so nomo taki Abraham na wan sma fu wan spesrutu bribi noso fu owruten historia. Te nanga a dei fu tide, a tori fu en abi krakti ete tapu sma, fu di a de wan moi eksempre gi wi alamala (Hebrewsma 11:8-10, 17-19). Meki wi luku fo bun fasi di Abraham ben abi. Wi o bigin nanga wan fu den fasi fu en di wi sabi moro bun, èn dati na bribi.

[Futuwortu]

[Faki na tapu bladzijde 4]

Wan prenspari sma na ini Bijbel ten

Den fosi tin kapitel fu a Bijbel buku Genesis e taki fu a libi fu difrenti man di ben abi bribi. Wan tu fu den na Abel, Heinok, nanga Noa. Ma den 15 kapitel di e kon baka dati e taki moro furu fu a libi fu wán man, èn dati na Abraham.

Boiti dati, na ini a tori fu Abraham Bijbel e taki fu a fosi leisi fu wan tu fu den moro prenspari sani di de fu feni na ini Bijbel. Fu eksempre, a tori fu Abraham e taki fu a fosi leisi . . .

▪ taki Gado na wan Skelt, noso wan sma di e kibri den futuboi fu en.​—Genesis 15:1; luku Deuteronomium 33:29; Psalm 115:9; Odo 30:5.

▪ taki wan sma e poti bribi na ini Gado.​—Genesis 15:6.

▪ fu a wortu profeiti.​—Genesis 20:7.

▪ fu a lobi di wan papa noso wan mama abi gi en pikin.​—Genesis 22:2.