San na Armagedon trutru?

„Takruyeye . . . e go na den tiriman fu heri grontapu fu tyari den . . . kon makandra na a presi san den e kari ini Dyutongo: Harmagedon.” (Na wi skrifi den wortu skoinsi.)​—OPENBARING 16:14, 16, Nyun Testamenti.

A WORTU Armagedon, di son leisi e vertaal leki „Harmagedon”, na a nen fu wan presi. Ma a presi dati no de wan trutru presi na grontapu.

San a wortu „Armagedon” wani taki trutru? Fu san ede furu sma di e yere a wortu dati e prakseri taki wan sani o pasa, soleki wan feti?

Den kon na wán na a presi di nen Armagedon

A Hebrew wortu Harmagedon trutru wani taki „Bergi fu Megido”. Aladi so wan bergi no ben de trutru, toku wan presi de di sma sabi leki Megido. A prenspari presi disi de leti pe tu bigi pasi e koti makandra. Dati ben de na a noord-westsei fu a kontren pe a fositen pipel Israel ben e libi. Furu prenspari feti ben feti krosibei fu a foto disi. Fu dati ede, te sma ben e yere a nen Megido, dan den ben e prakseri wan feti. *

Ma te wi e taki fu Megido, dan wi no musu aksi wisrefi sortu feti ben feti drape, ma fu san ede den feti disi ben feti. Megido ben de wan pisi fu a Pramisi Kondre di Yehovah Gado ben gi den Israelsma (Eksodes 33:1; Yosua 12:7, 21). A ben pramisi a pipel taki a ben o kibri  den gi feanti èn na dati a du tu (Deuteronomium 6:18, 19). Fu eksempre, na Megido Yehovah ben kibri den Israelsma gi den legre fu Kownu Yabin fu Kanan nanga en legre-edeman Sisera, di ben e suku fu teki a kondre abra.​—Krutuman 4:14-16.

Fu dati ede a wortu „Harmagedon” noso „Armagedon”, e prenki wan tumusi prenspari sani. A abi fu du nanga tu bigi makti di o feti nanga makandra.

A profeititori na ini Openbaring e taki dati heri esi, Satan nanga den ogri yeye o gi libisma tirimakti deki-ati fu tyari den legre fu den kon na wán. Na so den o prefuru fu tapu skreki gi a pipel fu Gado fu meki den tapu nanga a wroko fu den. A sani disi o meki taki milyunmilyun sma o lasi den libi te Gado o wini den wan di kon fu feti nanga a pipel fu en.​—Openbaring 19:11-18.

Fu san ede wan Gado di abi ’sari-ati, di no e ati bron esi, èn di e sori sma bun-ati pasa marki’ soleki fa Bijbel e taki, ben o meki taki so furu sma lasi den libi? (Nehemia 9:17) Fu man frustan fu san ede Gado e du dati, dan wi musu kisi piki tapu dri aksi: (1) Suma e bigin a feti? (2) Fu san ede Gado e kon na ini a tori? (3) Sortu bakapisi a feti disi o abi gi grontapu èn den sma di e tan na ini?

1. SUMA E BIGIN A FETI?

A no de so taki na puru Gado e puru atibron na sma tapu na a feti fu Armagedon. Na presi fu dati, Gado o kibri bun sma gi den wan di wani puru den na pasi. Na ini a feti disi, den sma di e suku fu du ogri nanga a pipel fu Gado, na „den kownu na heri grontapu”, noso den tiriman fu grontapu. Fu san ede? Fu di Satan di abi den ogri-ati sma na ini en makti, o sorgu taki den tirimakti nanga den legre fu grontapu, e bondru kon na wán fu kon feti nanga den wan di e anbegi Yehovah Gado.​—Openbaring 16:13, 14; 19:17, 18.

Na ini a ten disi, sma na ini son kondre e si en leki wan prenspari sani fu taki fri san den e denki èn fu anbegi Gado soleki fa densrefi wani. Dati meki den no wani bribi taki tirimakti o pruberi fu tyari wan kaba kon na den kerki di de. Ma den sortu feti disi ben pasa na ini a di fu 20 yarihondro, èn den e pasa tu na ini a ten disi. * Boiti dati, awansi tu prenspari  sani de di e meki taki den feti di ben pasa kaba, e difrenti fu a feti fu Armagedon. A fosi sani, na taki a feti disi o de na heri grontapu. A di fu tu sani, na taki a fasi fa Yehovah Gado o kon na ini a tori, o de na wan moro krakti fasi leki fa a ben du dati na ini a ten di pasa (Yeremia 25:32, 33). Bijbel e kari a feti disi „a feti na a bigi dei fu Gado na Almaktiwan”.

2. FU SAN EDE GADO E KON NA INI A TORI?

Yehovah e gi den anbegiman fu en a rai fu libi na ini freide nanga trawan èn fu lobi den feanti fu den (Mika 4:1-3; Mateyus 5:43, 44; 26:52). Fu dati ede den no o teki fetisani fu kibri densrefi te na ogri-ati feti disi o pasa. Efu Gado no ben o kon na ini a tori fu kibri a pipel fu en, dan den alamala ben o kisi pori. Fu dati ede a nen fu Yehovah Gado de na ini a tori. Efu den feanti fu Gado ben o man puru a pipel fu en na pasi, dan a ben o gersi leki Yehovah no abi lobi, taki a no lobi retidu, èn taki a no abi makti. Sobun, so wan sani no kan pasa kwetikweti!​—Psalm 37:28, 29.

Gado no wani kiri nowan sma èn fu dati ede a e warskow wi na fesi san a o du (2 Petrus 3:9). Nanga yepi fu den tori di skrifi na ini Bijbel, a e memre ala sma taki na ini a ten di pasa a opo feti gi a pipel fu en te sma ben wani du ogri nanga den (2 Kownu 19:35). Bijbel e warskow wi tu taki na ini a ten di o kon te Satan nanga den sma di de na ondro a makti fu en o kon feti nanga a pipel fu Gado, dan Yehovah o kon na ini a tori baka èn a o feti tu nanga den. Fu taki en leti, Gado Wortu ben taki na fesi langa ten kaba taki Yehovah o pori den ogri sma (Odo 2:21, 22; 2 Tesalonikasma 1:6-9). Na a ten dati, den feanti o si krin taki den e feti nanga na Almaktiwan srefi.​—Esekièl 38:21-23.

3. SAN O DE A BAKAPISI FU A FETI DISI?

Na a feti fu Armagedon milyunmilyun sma o kisi kibri. Fu taki en leti a feti disi o de a bigin fu freide na grontapu.​—Openbaring 21:3, 4.

A buku Openbaring e taki fu wan „bigi ipi sma” di wi no man teri èn di o pasa a feti disi libilibi (Openbaring 7:9, 14). Na ondro a tiri fu Gado, den sma disi o yepi fu meki grontapu kon tron wan paradijs, soleki fa Yehovah ben abi na prakseri biginbigin.

Wi sabi o ten sma o kon feti nanga a pipel fu Gado?

[Futuwortu]

[Prenki na tapu bladzijde 6]

Yehovah Gado opo feti gi a pipel fu en na ini a ten di pasa

[Prenki na tapu bladzijde 7]

Na a feti fu Armagedon, Yehovah o opo feti baka gi a pipel fu en