Te dati pasa, dan no denki taki yu leki Kresten papa noso mama no du yu wroko bun. Bika soleki fa wi o si, tra sani de tu di kan meki taki yu pikin teki so wan bosroiti. Ma hori disi na prakseri: A fasi fa yu e du te a pikin fu yu e tweifri, kan meki taki a pikin o wani teki a bribi fu yu noso a kan meki taki a no o wani teki en. Efu yu e hari-taki fu a tori nanga a pikin fu yu, dan yu o bigin nanga wan strei di yu no o man wini makriki.​—Kolosesma 3:21.

A moro bun fu gi yesi na a rai di na apostel Paulus e gi. A ben skrifi: „Wan srafu fu Masra no musu meki trobi, ma a musu sori switifasi gi ala sma èn a musu abi a koni fu man gi sma leri. Te ogri e miti en, a musu man hori ensrefi” (2 Timoteyus 2:24). Fa yu kan sori taki yu „abi a koni fu man gi sma leri” te a pikin fu yu e tweifri na a bribi fu yu?

A fosi sani di yu kan du, na fu pruberi fu kon sabi fu san ede a pikin fu yu e denki so. Fu eksempre:

• A e firi leki a de en wawan èn taki a no abi mati na ini a Kresten gemeente? „Fu di mi ben wani abi mati, meki mi bigin moksi nanga difrenti pikin na skoro. Furu yari langa a sani disi tapu pasi gi mi fu tron wan mati fu Gado. Fu di mi ben abi takru kompe, meki na anbegi no ben e hari mi moro te fu kaba, èn now a sani dati e hati mi srefisrefi.” ​—Lenore, 19 yari.

•   A muilek gi en fu taki fu a bribi fu en, fu di a no de seiker fu ensrefi? „Di mi ben de na skoro, mi ben frede fu taki fu a bribi fu mi nanga den tra pikin. Mi ben frede taki den ben o feni taki mi de tra fasi leki den, noso taki den ben o si mi leki wan ’Bijbel boi’. Den no ben e bumui nanga pikin di ben de tra fasi leki den, èn mi no ben wani taki den ben e du dati nanga mi.”​—Ramón, 23 yari.

• A e firi leki a hebi tumusi gi en fu libi leki wan Kresten? „Mi ben e firi leki a têgo libi di Bijbel e pramisi de te na tapusei fu wan hei trapu èn mi feni taki mi no bigin kren a trapu srefi. Mi ben e firi leki mi ben de farawe fu en. Mi ben e frede so te fu kren a trapu, taki mi bigin denki fu drai baka gi a bribi fu mi.”​—Renee, 16 yari.

San e trobi a pikin fu yu trutru? A moro bun fasi fa yu kan kon sabi dati, na fu aksi en! Ma luku bun taki unu no bigin haritaki nanga makandra. Na presi fu dati, a bun fu teki a rai na Yakobus 1:19 pe skrifi taki un ’no musu de gaw fu taki èn taki un no musu de gaw fu kisi atibron’. Sobun, abi pasensi nanga yu pikin. Te yu e yepi en yu musu „du dati nanga ala pasensi èn nanga a koni fu gi sma leri”, neleki fa yu ben o du nanga wan sma di no de wan famiriman fu yu.​—2 Timoteyus 4:2.

Efu a de so taki a pikin fu yu no wani go moro na den Kresten konmakandra, dan suku fu kon sabi efu wan tra sani e trobi en. Ma abi pasensi te yu e taki nanga en. A papa na ini na eksempre di e kon now no o abi bun bakapisi.

Pikin: Mi no wani go na den konmakandra moro.

Papa: [nanga wan krasi sten] Yu no wani go moro? San yu wani taigi mi nanga dati?

Pikin: Mi e fuga te mi de drape, dati meki mi no wani go moro!

Papa: Na so yu e prakseri fu Gado? Na fuga yu e fuga fu en? We mi no sabi fa yu o du èn mi no abi trobi san yu wani. Ma solanga yu e libi na ini wi oso, yu e go nanga wi!

Gado wani taki papa nanga mama musu gi den pikin leri fu en. A wani tu taki pikin e gi yesi na den papa nanga mama (Efeisesma 6:1). Toku yu no wani taki yu pikin e du den sani di yu gwenti du na ini na anbegi, sondro taki en ati de na ini a tori. Yu no wani taki a e go nanga yu na den Kresten konmakandra, aladi a no wani go trutru. A no de fu taki dati yu ben o wani taki a kon nanga en heri ati.

Yu kan abi moro bun bakapisi te yu e kon sabi san e trobi a pikin fu yu trutru. Hori a sani disi na prakseri te wi o luku now fa a takimakandra di wi luku didyonsro ben kan waka, so taki a papa ben kan abi moro bun bakapisi.

Pikin: Mi no wani go na den konmakandra moro.

Papa: [nanga wan safri sten] San meki yu no wani go moro?

Pikin: Mi e fuga te mi de drape, dati meki mi no wani go moro!

Papa: Mi sabi taki yu kan fuga son leisi efu yu musu sidon wán noso tu yuru langa. Ma san fu den konmakandra hebi so gi yu?

Pikin: Mi no sabi. Mi denki taki a ben o moro switi gi mi efu mi ben kan go du wan tra sani.

Papa: Na so den mati fu yu e prakseri tu?

Pikin: We dati na a sani! Mi no abi nowan mati. Sensi di mi bunbun mati froisi gowe, mi no abi mati moro! Mi e firi leki mi no abi nowan sma fu taki tori. Ala tra sma e lafu, e prisiri. Mi wawan no abi sma fu taki!

 Fu di a papa e gi a pikin deki-ati fu taki fri fa a e denki, meki a e kon frustan san e trobi a pikin fu en. A e kon si taki a pikin e firi leki a de en wawan. Boiti dati, a pikin e si taki a kan frutrow en papa, èn na so a o moro makriki gi den fu taki nanga makandra wan tra leisi.​—Luku a faki di nen  „Abi pasensi!”

Te fu kaba furu yonguwan e kon si taki te den e du muiti fu wini a problema di e tapu pasi gi den fu tron wan moro bun mati fu Gado, dan nofo tron den no sa tweifri so furu moro na densrefi èn na a bribi fu den. Teki Ramón fu eksempre, di wi ben taki fu en kaba. A yonkuman disi ben e bigin beifi kaba te a ben e prakseri taki a ben musu fruteri sma na skoro taki a de wan Kresten. Di Ramón bigin taki fu a bribi fu en te fu kaba, a kon si taki a sani dati no ben hebi so leki fa a ben denki, srefi te trawan ben e spotu en. A e taki:

„Wan leisi wan boi na skoro ben e spotu nanga a bribi fu mi. Senwe ben e naki mi trutru, èn mi ben e si taki a heri klas ben e arki wi. Ne mi bosroiti fu drai a tori poti tapu en. Mi bigin poti aksi gi en, fu meki a fruteri fu en eigi bribi. Mi ben fruwondru fu si taki a ben e senwe moro mi! Ne mi kon frustan taki furu yonguwan abi den eigi bribi, ma den no e frustan en. Awansi fa a no fa, mi man fruklari a bribi fu mi. Iya, mi kon si taki a no mi musu firi wan fasi fu taki fu a bribi fu mi, ma na den tra pikin!”

Papa nanga mama èn sma di ondrosuku a tori kon si taki wan bigi difrenti de na mindri a fasi fa yongu pikin e denki nanga a fasi fa den moro bigi pikin e denki (1 Korentesma 13:11). Yongu pikin e bribi makriki san den e leri, ma te den pikin kon moro bigi, dan den wani frustan sani fosi den bribi den. Fu eksempre: A makriki fu leri wan yongu pikin taki na Gado meki ala sani (Genesis 1:1). Ma wan moro owru pikin o wani sabi sani soleki: ’Fa wi sabi taki wan Gado de? Fu san ede wan Gado di lobi wi ben o gi pasi taki ogri de? Fa a kan taki Gado ben de ala ten kaba?’​—Psalm 90:2.

 Te a pikin fu yu e poti den sortu aksi disi, dan kande yu e denki taki a bribi fu en e kon swaki. Ma te yu luku en bun, dan a sani disi ben kan sori taki a pikin e go na fesi. Bika te wan Kresten e bigin poti aksi, dan dati e sori taki a e go na fesi trutru.​—Tori fu den apostel 17:2, 3.

Boiti dati, a sani disi e sori taki a pikin fu yu e leri fu ’gebroiki en frustan’ (Romesma 12:1, 2). Na a fasi disi a e kon frustan „san na a bradi nanga a langa nanga a hei nanga a dipi” fu a Kresten bribi. Leki yongu pikin a no ben o man frustan den sani disi na so wan fasi (Efeisesma 3:18). Disi na a ten fu yepi yu pikin fu sidon denki fu san ede a e bribi son sani, so taki a kan kon abi na overtoigi taki den sani di a e bribi de so trutru.​—Odo 14:15; Tori fu den apostel 17:11.

Bijbel e taki fu a yonkuman Timoteyus di ben sabi den santa buku ’sensi di a ben de wan beibi’. Toku na apostel Paulus e gi Timoteyus a deki-ati disi: „Tan du den sani di yu leri èn di yu e bribi, fu di sma sori yu krin taki den de so” (2 Timoteyus 3:14, 15). A kan taki yu leri a pikin fu yu den gronprakseri fu Bijbel sensi di a gebore. Ma now yu musu yepi en fu bribi san a e leri, so taki a e kon si krin taki dati de so trutru.

A buku Wat jonge mensen vragen ​— Praktische antwoorden, Deel 1 (Sani di yongu sma e aksi​—Piki di kan yepi den, Pisi 1), e taki: „Solanga a pikin fu yu e libi na ini yu oso ete, yu abi a reti fu taigi en fu teki prati na den sani di abi fu du nanga na anbegi. Ma te fu kaba a marki fu yu musu de fu leri en fu lobi Gado nanga en heri ati, aladi a yongu ete. A no musu du sani nomo fu di yu e fruwakti dati fu en.” Efu yu hori a sani dati na prakseri, dan yu kan yepi yu pikin fu kon abi „wan tranga bribi”, so taki a no e poti bribi na ini Gado soso fu di yu wani dati, ma fu di en srefi wani dati. *​—1 Petrus 5:9.