A bun fu abi wan denki kaba fu sma sondro taki yu kon sabi den fosi?

WAN datra ben e sidon langa en futu na ini en foroisi, aladi a ben e luku wan programa na telefisi. Na ini a programa dati, wan sma ben taki nanga wan minister fu Ierland. A datra ben e luku a minister en fesi bun, ne a si wan sani di meki a prakseri taki a minister ben abi wan takru sweri na ini en fesi. Bakaten a gi a minister a rai fu meki wan datra luku en wantewante.

Te fu kaba a kon na krin taki a ben abi wan takru sweri trutru. A datra di ben luku a programa na telefisi ben abi a koni fu luku wan sma nomo fu sabi san e du en. Ma son sma feni taki te den e luku wan sma nomo, dan den sabi kaba sortu fasi a abi, fa a de, èn efu a de fu frutrow.

Na ini den hondrohondro yari di pasa, sabiman pruberi fu feni wan fasi fa den kan kon sabi fa wan sma de, soso te yu e luku a sma nomo. Den e kari a sani dati fysionomie. Wan buku e taki dati nanga yepi fu a sani disi „sma kan luku nomo fa wan sma en fesi noso en skin tan fu kon sabi sortu fasi a sma dati abi (Encyclopædia Britannica). Na ini a di fu 19 yarihondro, sabiman soleki Francis Galton, di ben de wan famiriman fu Charles Darwin, nanga Cesare Lombroso fu Italiakondre, ben kon nanga den srefi sortu leri dati di furu sma kon frigiti sensi a ten dati. Francis Galton na wan fu den sabiman di e ondrosuku fa sma e tyari densrefi èn Cesare Lombroso na wan sabiman di e ondrosuku fu san ede sma e du ogri.

Toku furu sma feni taki yu kan kon sabi fa wan sma de trutru te yu e luku fa en fesi nanga en skin tan. Ma a bun fu krutu sma na a fasi dati?

Te a fasi fa wan sma tan e meki wi kisi wan denki fu en

Na ini a Fosi buku fu Samuel, wi e si wan bun eksempre di e sori fa wan sma kan kon abi wan denki kaba fu wan trawan, soso fu di a luku a sma dati. Yehovah ben taigi a profeiti Samuel fu salfu wan sma fu a famiri fu Isai leki a kownu fu Israel. Bijbel e taki: „Di den [manpikin fu Isai] waka kon na inisei, dan Samuel si Eliab. Wantewante Samuel taki: ’Trutru, na a salfuwan fu Yehovah e tanapu na En fesi.’ Ma Yehovah taigi Samuel: ’No luku fa a de, noso fa a langa, bika a no en mi wani. Gado no e si sani soleki fa libisma e si sani, bika libisma e si soso san na ai e si. Ma Yehovah e si fa na ati de.’” A srefi sani ben pasa nanga den tra siksi manpikin fu Isai. Te fu kaba, Gado teki David, a di fu aiti manpikin fu Isai fu tron kownu, èn disi ben de heri tra fasi leki san a profeiti nanga Isai ben fruwakti. Iya, Gado teki David, wan yonkuman di sma ben frigiti fu kari srefi.​—1 Samuel 16:6-12.

Na so a de tu na ini a ten disi. Wan tu yari pasa, wan professor na ini Doisrikondre, di e ondrosuku fu san ede sma e du ogri, ben du wan ondrosuku nanga yepi fu 500 studenti. A kari 12 man kon di den studenti no ben sabi. Den sma dati ben de a skowtu komandanti fu drape, wan lanti afkati fu a kontren dati, a man di e luku den moni tori fu a heiskoro, sosrefi wan takiman fu wan organisâsi, wan tu afkati, sma di e wroko na wan krutubangi, nanga dri strafuman. Den studenti ben musu kon sabi sortuwan fu den man ben e koti strafu, sortu ogri den ben du, èn sortu wroko ibriwan fu den ben e du. Fu kon sabi den sani disi, den studenti ben musu luku nomo fa den sma tan, èn sosrefi den sani di den ben lobi du.

San ben de a bakapisi? Sowan 75 procent fu den studenti ben man taki suma na den dri ogriman. Ma sowan 60 procent fu den ben taki dati neigi fu den tra man ben de ogriman, aladi dati no ben de so. Wán fu ibri seibi studenti ben denki taki a lanti afkati ben kan de wan  man di e seri drugs èn wán fu ibri dri studenti ben denki taki a skowtu komandanti ben de wan fufuruman! Sobun, te wi e bigin abi wan denki fu wan sma baka te wi luku en nomo, dan a sani dati kan kori wi. Fu san ede?

Yu kan kori yusrefi te yu e luku nomo fa wan sma tan

Te wi miti wan sma fu a fosi leisi, dan nofo tron den sani di wi ben ondrofeni na ini a ten di pasa, kan meki taki wi e kisi wan denki fu a sma. Wi kan denki taki a sma disi de leki ala trawan, èn wi e krutu en na a fasi dati tu. Kande wi e denki so fu a sma, fu di wi luku fa en fesi nanga en skin tan, noso fu di wi luku a kondre pe a komoto, a ras fu en, a moni di a e meki, noso a bribi fu en.

Efu wi kon si bakaten taki a sani di wi ben denki fu a sma de so trutru, dan wi e bigin bribi moro nanga moro taki wi man luku wan sma nomo fu kon sabi fa a de. Ma te wi e kon si taki a denki di wi ben abi fu a sma no ben bun kwetikweti, dan san wi e du? Efu wi na krin-ati sma, dan wi no musu tan nanga a fowtu denki di wi abi èn wi musu du muiti fu kon sabi fa a sma de trutru. Te wi e tan nanga a denki fu wi, dan dati kan hati a sma trutru, noso kande wi o poti en na ini bigi problema srefi. Èn dati na soso fu di wi e prefuru fu denki taki wi man si kaba fa a sma tan, sondro taki wi kon sabi en trutru.

Te wi e bigin kisi wan denki kaba fu wan sma soso fu di wi luku en, dan dati kan tyari problema gi a sma di wi e krutu èn gi wisrefi tu. Fu eksempre, na ini a fosi yarihondro, furu Dyu ben e weigri fu prakseri srefi taki Yesus ben kan de a Mesias. Fu san ede? Den ben feni taki a no ben gersi wan Mesias, ma den ben e si en nomo leki a manpikin fu a temreman fu drape. A tru taki den koni sani di Yesus ben taki èn den makti sani di a ben du ben e naki den ati. Ma fu di den ben abi wan denki kaba fu Yesus, meki den weigri fu bribi taki a ben kan de wan tra sma leki san den ben denki. Fu di den ben abi a denki disi, meki Yesus go preiki gi tra sma èn a taki: „Na ala presi den e lespeki wan profeiti, boiti na ini en eigi kontren èn na ini en eigi oso.”​—Mateyus 13:54-58.

Den Dyu dati ben de a pipel di ben wakti a Mesias furu hondro yari kaba. Fu di den ben abi den eigi denki fu a Mesias, meki di a doro te fu kaba, den no ben man poti bribi na ini en. A sani dati meki taki Gado no ben feni den bun moro (Mateyus 23:37-39). Sma ben abi a srefi fowtu denki disi tu fu den bakaman fu Yesus. Furu sma no ben man bribi taki wan pikin grupu fisiman, di heihei sma èn sosrefi fesiman fu a prenspari kerki fu a ten dati ben e wisiwasi, ben kan abi wan prenspari sani fu taki. Den sma di tan nanga a fowtu denki di den ben abi fu Yesus nanga den disipel fu en, lasi a tumusi  moi okasi fu tron bakaman fu Gado en Manpikin.​—Yohanes 1:10-12.

Son sma kenki a fasi fa den ben e denki

Sonwan fu den sma di ben e libi na ini a ten fu Yesus, ben de klariklari fu kenki a fasi fa den ben e denki, di den si nanga den eigi ai sortu sani Yesus ben du (Yohanes 7:45-52). Wan tu fu den sma di ben e denki so, ben de den famiriman fu Yesus di no ben wani bribi taki wan famiriman fu den ben kan de a Mesias (Yohanes 7:5). Ma san moi, na taki bakaten, den kenki a denki fu den èn den poti bribi na ini a Mesias (Tori fu den apostel 1:14; 1 Korentesma 9:5; Galasiasma 1:19). Wan tu yari baka dati, son Dyu na ini Rome ben de klariklari tu fu arki san na apostel Paulus srefi ben abi fu taki, na presi fu arki den sani di feanti fu a Kresten gemeente ben e fruteri. Baka di den arki Paulus, dan sonwan fu den tron bribiman.​—Tori fu den apostel 28:22-24.

Na ini a ten disi, furu sma abi wan fowtu denki tu fu Yehovah Kotoigi. Fu san ede? Nofo tron, dati no e kon fu di den ondrosuku fa sani de trutru, noso fu di den ben man kon nanga buweisi taki den sani di den Kotoigi e bribi no e kruderi nanga Bijbel. Ma na fu di den no man bribi taki Yehovah Kotoigi kan abi a tru bribi. Ma kande yu e memre ete taki den Kresten na ini a fosi yarihondro ben e denki so tu.

A no musu fruwondru wi taki sma e taki takru fu den wan di e du muiti fu teki na eksempre fu Yesus. Fu san ede? Fu di Yesus ben gi den tru bakaman fu en a warskow: „Fu mi nen ede, sma o teige unu.” Ma a ben gi den a deki-ati disi: „A sma di horidoro te na a kaba, o kisi frulusu.”​—Mateyus 10:22.

Neleki fa Yesus ben taigi den fu du, na so Yehovah Kotoigi na ini a ten disi e wroko tranga fu preiki a bun nyunsu fu Gado Kownukondre gi sma na heri grontapu (Mateyus 28:19, 20). Den sma di e weigri krin fu arki a boskopu disi, kan lasi na okasi di den abi fu waka na tapu a pasi di e tyari sma go na têgo libi (Yohanes 17: 3). Fa a de nanga yu? Yu o tan nanga a fowtu denki fu yu, noso yu o opo yu ati èn yu o luku fa sani de trutru? Hori a sani disi na prakseri: A fasi fa wan sma en fesi noso en skin tan no e taki ete fa a sma de trutru, èn a denki di wi abi fu sma kan kori wi. Ma te wi e ondrosuku sani fu kon sabi fa sma de trutru, dan wi kan kon sabi moi sani di yu no ben fruwakti.​—Tori fu den apostel 17:10-12.

[Prenki na tapu bladzijde 11]

A denki di den Dyu ben abi kaba fu Yesus, meki taki den weigri fu si en leki a Mesias

[Prenki na tapu bladzijde 12]

Yu abi yu eigi denki fu Yehovah Kotoigi, noso yu e si den soleki fa den de trutru?