„A bun nyunsu disi fu a Kownukondre o preiki gi sma”

„A bun nyunsu disi fu a Kownukondre o preiki gi sma na heri grontapu, so taki sma fu ala kondre kan yere dati, èn dan a kaba o kon.”​—MATEYUS 24:14.

San disi wani taki? Na Evangelie skrifiman Lukas ben skrifi taki Yesus „bigin go na ala den foto nanga den dorpu fu preiki a bun nyunsu fu Gado Kownukondre èn fu fruteri ala sma disi” (Lukas 8:1). Yesus srefi ben taki: „Mi musu go fruteri a bun nyunsu fu Gado Kownukondre na tra foto tu, bika na fu disi Gado ben seni mi kon” (Lukas 4:43). A seni den disipel fu en fu preiki a bun nyunsu na ini den foto nanga den dorpu, èn bakaten a taigi den: „Unu sa de kotoigi fu mi . . . te na den moro farawe presi fu grontapu.”​—Tori fu den apostel 1:8; Lukas 10:1.

Fa a ben de nanga den fosi Kresten? Den disipel fu Yesus no ben draidrai fu du san Yesus ben taigi den. „Ibri dei den ben e gi sma leri doronomo na ini a tempel èn na ibri oso. Den ben e fruteri sma a bun nyunsu fu Yesus, a Krestes” (Tori fu den apostel 5:42). A no wan pikin grupu prenspari sma nomo ben e du a preikiwroko. A historia skrifiman Neander ben taki dati „Celsus, a fosi sma di ben skrifi takru sani fu a Kresten bribi, ben e lafu a tori taki sma di ben e meki sani fu skapu-wiwiri, sma di ben e meki susu, sma di ben e meki sani fu leribuba, sma di no ben sabi leisi noso skrifi, iya, srefi den moro lawlaw sma ben e preiki a bun nyunsu fayafaya.” Na ini a buku fu en, Jean Bernardi ben skrifi: „[Den Kresten] ben musu go na ala presi fu taki nanga ala sma. Den ben musu go na den bigi pasi èn na ini den foto, na den pren èn na sma oso. Awinsi sma ben wani arki den, noso awinsi sma no ben wani yere noti fu den. . . . Den ben musu go na den moro farawe presi fu grontapu” (The Early Centuries of the Church).

Suma e du a sani dati na ini a ten disi? „Wan fu den sani di meki taki so furu sma na ini a ten  disi no wani yere noti fu Gado, na taki kerki no e si en leki wan seryusu sani fu preiki èn fu gi sma leri”, na so David Watson, wan priester fu na Anglikan Kerki ben taki. Na ini a buku fu en, José Luis Pérez Guadalupe, ben skrifi fu a wroko di sma fu den Evangelie Kerki, den Adventist Kerki, èn fu tra kerki e du. A taki dati „den no e preiki oso fu oso”. A ben taki fu Yehovah Kotoigi: „Den seti sani fu go oso fu oso doronomo” (Why Are the Catholics Leaving?)

Jonathan Turley ben taki wan moi sani na ini a buku di nen Cato Supreme Court Review, 2001-2002. A ben taki: „Efu yu taki nomo fu Yehovah Kotoigi, dan wantewante sma e prakseri preikiman di e go na sma oso na den moro fruferi yuru. Gi Yehovah Kotoigi, a wroko di den e du fu go oso fu oso fu meki bakaman, no de nomo fu panya a bribi fu den, ma a wroko dati prenspari srefisrefi gi den eigi bribi.”

[Faki na tapu bladzijde 9]

Suma e du den sani disi?

Te yu e luku den buweisi fu Bijbel di wi tyari kon na fesi na ini den artikel disi, dan suma na ini a ten disi e libi soleki fa tru Kresten musu libi? Aladi dusundusun difrenti kerkigrupu de di e kari densrefi Kresten, toku wi musu hori na prakseri taki Yesus ben taigi den bakaman fu en: „A no ala sma di e taigi mi: ’Masra, Masra’, o go na ini a Kownukondre fu hemel. Ma na a sma di e du a wani fu mi Tata na hemel o go na ini” (Mateyus 7:21). Te wi kon sabi suma e du a wani fu a Tata, sobun te wi kon sabi suma na den wan di abi a tru Kresten bribi, èn te wi abi demakandra nanga den, dan dati kan meki wi kisi têgo blesi te Gado Kownukondre e tiri. Wi e gi yu wan kari fu aksi Yehovah Kotoigi, den sma di gi yu a tijdschrift disi, fu fruteri yu moro fu Gado Kownukondre èn fu den blesi di wi o kisi.​—Lukas 4:43.