Na artikel disi e poti prakseri na sani di yu ben wani kon sabi kande èn a e sori pe yu kan feni den piki na ini yu Bijbel. Yehovah Kotoigi ben o breiti fu taki nanga yu fu den piki disi.

1. Fa sma musu memre a dede fu Yesus?

Yesus ben taigi den bakaman fu en fu memre a dede fu en nanga yepi fu brede nanga win. A brede e prenki Yesus en skin èn a win e prenki en brudu.​—Leisi Lukas 22:19, 20.

A brede di Yesus gebroiki no ben abi srudeki. Na ini Bijbel, srudeki nofo tron e prenki sondu. Sobun, fu di a skin fu Yesus ben de sondro sondu, meki a ben fiti taki a gebroiki a brede dati fu prenki en skin. Yesus ben gi en skin leki wan srakti-ofrandi, èn na so sma no ben abi fu tyari meti ofrandi moro, soleki fa a Wèt di Gado ben gi Moses ben taki (Hebrewsma 10:5, 9, 10). A win ben e prenki a warti brudu fu Yesus di ben kanti trowe leki wan ofrandi gi den sondu fu wi.​—Leisi 1 Petrus 1:19; 2:24; 3:18.

2. O ten wi musu memre a dede fu Yesus?

Yesus dede na a dei fu a Paskafesa fu 14 Nisan. Wan dei fu a Dyu Kalender e bigin te son dongo. A neti fosi Yesus dede, a nyan a Paska nyanyan makandra nanga den apostel fu en. Baka dati, a seti wan nyun fesa di sma ben musu hori fu memre a dede fu en.​—Leisi Lukas 22:14, 15.

Na ini a ten disi, a pipel fu Gado e memre a sani di Gado du nanga yepi fu Yesus, fu frulusu heri grontapu fu sondu nanga dede (Eksodes 12:5-7, 13, 17). Neleki fa den Dyu ben e hori a Paskafesa wán leisi wan yari, na so Kresten e hori a Memrefesa fu a dede fu Yesus wán leisi wan yari baka sondongo, tapu 14 Nisan soleki fa a Bijbel kalender e sori.​—Leisi Yohanes 1:29.

  3. Suma musu nyan fu a brede èn dringi fu a win?

Di Yesus langa a win gi den bakaman fu en, dan a taki: „A kan disi wani taki a nyun frubontu” (1 Korentesma 11:25). A nyun frubontu ben kon na ini a presi fu a Wètfrubontu di Gado ben gi Moses. Na ini a frubontu dati, Gado ben pramisi den Israelsma taki a ben o teki den leki en pipel efu den ben tan gi yesi na en (Eksodes 19:5, 6). Ma Israel no ben gi yesi na Gado. Sobun, Yehovah kon nanga wan nyun frubontu.​—Leisi Yeremia 31:31.

Nanga yepi fu a nyun frubontu, Yehovah e gi furu sma okasi fu kisi blesi nanga yepi fu wan tu sma nomo. Den sma di de na ini a frubontu, na wan pikin grupu nomo fu 144.000 sma. Nanga yepi fu den, milyunmilyun sma fu ala kondre o man libi fu têgo na ini wan paradijs na grontapu. Son sma di de na ini a nyun frubontu e dini Yehovah na grontapu na ini a ten disi. Den wawan mag nyan fu a brede èn dringi fu a win, fu di a kan nanga win „wani taki a nyun frubontu”.​—Leisi Lukas 12:32; Openbaring 14:1, 3.

4. Fa wi e kisi wini fu a Memrefesa?

Na alayari Memrefesa fu Yesus en dede e meki wi kisi moro warderi gi a bigi lobi di Yehovah sori gi wi. A seni en Manpikin fu kon dede gi den sondu fu wi. Sobun, te wi de na a Memrefesa, dan wi musu denki dipi san a dede fu Yesus wani taki gi wi. Wi musu luku fa wi kan sori warderi gi den sani di Yehovah nanga Yesus du gi wi.​—Leisi Yohanes 3:16; 2 Korentesma 5:14, 15.

Efu yu wani sabi moro, dan luku bladzijde 206-208 fu a buku disi, San Bijbel e leri wi trutru?, di Yehovah Kotoigi tyari kon na doro.