Fu san ede a no bun fu du afkodrei?

Sensi Barbara * yongu, a ben gwenti si sani, a ben e yere sten, èn a ben e bribi taki a ben man taki nanga dede famiriman. En nanga en masra, Joachim, ben e leisi buku di ben abi fu du nanga bonu èn den ben kon abi a koni fu leisi karta di e sori san o pasa na ini a ten di e kon. Den karta disi ben e sori den taki den ben o meki furu moni, èn na dati pasa tu na ini a bisnis fu den. Wan dei, den karta warskow den taki sma ben o kon na den oso fu du den ogri. Den karta sori den tu fa den ben musu kibri densrefi.

ALADI a gersi leki sma na ini a ten disi no e bribi moro na ini bonu, toku a de so taki sma na ala sei lobi dangra tori. Sma na heri grontapu e weri tapu, den e suku yepi na den dedewan, noso den e go na bonuman fu koti luku noso fu kibri densrefi gi takru sani. Wan artikel di nen „Laptop and Lucifer” (Lucifer nanga a computer) ben kon na doro na ini wan Doisri tijdschrift. Na artikel dati ben taki: „Internet e meki taki moro nanga moro sma e bigin poti prakseri na afkodrei sani” (Focus).

Yu ben sabi taki Bijbel e taki fu afkodrei? Kande yu o fruwondru fu si san Bijbel e taki fu a tori disi.

San Bijbel e taki fu afkodrei?

Na ini owruten Israel, Gado ben gi en pipel wan wèt di ben taki: „Nowan lukuman noso bonuman musu de na un mindri, nowan sma di e suku marki fu sabi san o pasa, nowan towfruman, nowan wisiman, nowan sma di e go suku rai na wan sma di e taki nanga yeye, nowan sma di abi a wroko fu taki sani na fesi, èn nowan sma di e go suku rai na den dedewan. Yehovah e tegu gi iniwan sma di e du den sani disi” (Deuteronomium 18:10-12). Fu san ede Yehovah ben e krutu afkodrei na so wan krakti fasi?

Soleki fa na ondrofenitori na a bigin fu na artikel e sori, dan furu sma e bribi taki libisma man taki nanga den dedewan, èn taki na den dedewan e yepi den fu kon sabi sani te den e koti luku. Disi na sani di furu kerki e leri sma. Den e leri sma taki den dedewan e libi go doro leki yeye. Ma Bijbel e leri wi wan heri tra sani. A e taki krin: „Den dedewan no sabi notinoti” (Preikiman 9:5). Bijbel e sori taki a de neleki  den dedewan e sribi dipi sondro fu sabi san e pasa na den lontu (Mateyus 9:18, 24; Yohanes 11:11-14). * Fu di dati de so, dan kande yu e aksi yusrefi fa wi musu frustan den dangra sani di sma e ondrofeni? Nanga suma den sma disi e taki dan?

Te sma e taki nanga yeye

Den Evangelietori e sori taki di Yesus ben de na grontapu, a ben e taki nanga yeye. Markus 1:23, 24 e taki dati „wan ogri yeye” ben taigi Yesus: „Mi sabi heri bun suma na yu.” A no de fu taki dati den yeye sabi tu suma na yu. Ma yu sabi suma na den?

Fosi Gado ben meki libisma, a ben meki furu yeye manpikin, noso engel (Yob 38:4-7). Den engel na libisani di hei moro libisma (Hebrewsma 2:6, 7). Den abi makti, den koni srefisrefi, èn Gado ben meki den fu du a wani fu en. A Psalm skrifiman ben singi: „Un alamala di de engel fu Gado, un prèise Yehovah, iya, unu di tranga srefisrefi èn di e du san a taki.”​—Psalm 103:20.

Bijbel e sori taki bakaten, wan tu fu den engel bigin abi demakandra nanga libisma na wan fasi di Gado no ben feni bun. San den ben abi na prakseri? A fosi engel di du dati ben gebroiki wan triki fu meki den fosi tu libisma, Adam nanga Eva, drai baka gi a Gado nanga a Mekiman fu den. Na so na engel disi kon tron Satan Didibri, wan ogri-ati leiman èn wan gensman fu Gado.​—Genesis 3:1-6.

Bakaten, tra engel „gowe libi a tanpresi fu den” na ini hemel, èn den bigin libi nanga moi uma na grontapu (Yudas 6; Genesis 6:1, 2). Den tranga-ede engel disi nanga den basra pikin fu den ben e pina libisma so te, taki grontapu kon „lai ogridu”. Kande yu sabi a Bijbel tori di e taki fa Gado tyari wan Frudu kon fu pori den ogri-ati sma na a ten fu Noa.​—Genesis 6:3, 4, 11-13.

A fruduwatra dwengi den engel fu kenki a libisma skin fu den kon tron yeye baka èn fu drai go baka na a presi pe den yeye e tan. Ma a Mekiman no gi pasi taki den drai kon baka na „a tanpresi fu den”. Na presi fu dati, Gado poti den na strafu na ini wan situwâsi di wi kan teki gersi nanga „peti pe deki dungru de” (2 Petrus 2:4, 5). Bijbel e kari den trangayesi engel disi „ogri yeye” (Yakobus 2:19). Na den e kori den sma di e du afkodrei.

San den ogri yeye wani?

Na a fosi presi, den ogri yeye di abi demakandra nanga libisma wani meki sma tapu fu anbegi a tru Gado, Yehovah. Furu sma di e bonu feni taki den abi spesrutu krakti, ma fu taki en leti, den ogri yeye e gebroiki den sani disi fu tapu pasi gi sma fu kisi soifri sabi fu Gado èn fu tron mati fu en.

A di fu tu sani di den ogri yeye wani du, de fu si na a sani di Satan, a fesiman fu den, pruberi fu du nanga Yesus. Satan ben wani gi Yesus „ala den kownukondre fu grontapu nanga a moi fu den”. A ben taigi Yesus: „Boigi èn anbegi mi wán leisi nomo.” Iya, Satan nanga den ogri yeye e angri fu sma anbegi den. Ma Yesus ben weigri fu drai baka gi Gado èn gi a tru anbegi.​—Mateyus 4:8-10.

Na ini a ten disi, a no e pasa so furu taki ogri yeye e taki langalanga nanga sma. Na presi fu dati, den e suku fu kori den wan di no sabi moro betre. Iya, ogri yeye e  meki sma denki taki a no de wan ogri fu leisi karta fu kon sabi fa sani o waka gi den, te den e go koti luku, èn te den e luku horoskoop nanga den sortu sani dati. No meki den sortu sani dati kori yu! A no tru taki den sani disi e yepi wi fu kon sabi dangra tori. Te sma lobi bonu tori, dan ogri yeye e gebroiki a sani dati fu kori den, so taki den e tapu fu anbegi Yehovah. Te ogri yeye no man kisi sma na a fasi dati, dan nofo tron den e tanteri den sma dati di fadon na ini a trapu fu den. Na so den sma disi no kan de koloku. Efu na dati pasa nanga yu, dan san yu kan du fu komoto na ondro a makti fu den ogri yeye disi?

Fa yu kan lusu yusrefi fu afkodrei?

No kori yusrefi. Den yeye di e taki nanga libisma na feanti fu Gado, èn den o kisi pori (Yudas 6). Den na bedrigiman nanga leiman di e du neleki den na den dedewan. Fa yu ben o feni en te yu e kon sabi taki wan sma di yu ben e si leki yu mati, ben e hori yu na spotu fu di a e suku nomo fu hari yu puru fu wan sani di bun gi yu? San yu ben o du te yu kon sabi taki a sma di yu e taki tori nanga en tapu Internet, na wan sma di e suku fu kori trawan, so taki a kan abi seks nanga den? We, te yu e moksi nanga ogri yeye, dan moro bigi ogri kan miti yu. Yu musu du ala san yu man fu no abi demakandra moro nanga den. San yu kan du?

Baka di wan tu sma fu owruten Efeise kon sabi san Bijbel e taki fu afkodrei, dan den bron den buku di ben abi fu du nanga bonuwroko, awansi o diri den buku dati ben de. Den „bron den na fesi ala sma” (Tori fu den apostel 19:19, 20). Na ini a ten disi, den sani di abi fu du nanga bonuwroko a no soso buku, tapu, nanga den sortu sani dati, ma sosrefi sani di de fu si tapu Internet. Wai pasi gi iniwan sani di kan meki taki yu e bigin du afkodrei.

Prakseri a trowpaar di ben kari na a bigin fu na artikel disi. Den karta fu den ben sori den taki tu ogri sma ben o kon na den oso èn taki den no ben musu arki den. Den no ben musu teki nowan sani fu den tu. Ma di Connie nanga Gudrun, tu Kotoigi fu Yehovah, kon na a oso fu Joachim nanga Barbara fu taigi den taki den ben tyari bun nyunsu fu Gado, dan den tu sma disi bosroiti fu arki den. Di den bigin taki fu afkodrei, dan Connie nanga Gudrun sori den krin san Bijbel e taki fu a tori dati. Ne den bigin studeri Bijbel doronomo nanga den sma disi.

Fosi yu denki, Joachim nanga Barbara bosroiti fu no abi nowan enkri demakandra moro nanga den ogri yeye. Den Kotoigi fruteri den taki den yeye no ben o breiti nanga a tori dati. Fu taki en leti, Joachim nanga Barbara pasa muilek ten èn den ogri yeye pina den na wan tumusi ogri-ati fasi èn den ben e frede srefisrefi. Wan pisi ten, den ben e frede ibri neti, teleki den froisi go tan na wan tra oso, pe den feni pikinso frulekti. A heri pisi ten di a trowpaar disi ben e pina so, den tan poti frutrow na ini den wortu fu Filipisma 4:13: „Mi man du ala sani nanga yepi fu a sma di e gi mi krakti.” Yehovah blesi den fu di den ben e horidoro, èn te fu kaba den ogri yeye no trobi den moro. Tide na a dei, Joachim nanga Barbara de koloku anbegiman fu a tru Gado, Yehovah.

Bijbel e gi ala sma di wani kisi a blesi fu Yehovah, a rai disi: „Saka unsrefi na ondro Gado. Ma kakafutu gi Didibri èn a o lon gowe fu unu. Kon krosibei na Gado èn a o kon krosibei na unu” (Yakobus 4:7, 8). Efu yu wani, dan Yehovah Gado man yepi yu fu puru yusrefi na ondro a makti fu den ogri yeye, èn a o du dati tu. Te Joachim nanga Barbara e prakseri baka fa den kon fri fu afkodrei, dan den e agri dorodoro nanga den wortu disi di skrifi na Psalm 121:2: „Mi yepi o komoto fu Yehovah.”

[Futuwortu]

[Prenspari pisi na tapu bladzijde 21]

Te sma e du bonuwroko, dan dati e tapu den fu tron mati fu Gado

[Prenspari pisi na tapu bladzijde 22]

„Kon krosibei na Gado èn a o kon krosibei na unu.”​—YAKOBUS 4:8