SON LEISI, a kan de wan prisiri fu prakseri son sani baka. Te yu e prakseri den moi ten di yu ben abi nanga den lobiwan fu yu, dan yu e firi prisiri. Ma son leisi a kan de leki wan fluku fu memre son sani. A de so taki sari sani di ben pasa langa ten kaba e hati yu te now ete? Efu dati de so, dan kande yu e aksi yusrefi o ten yu o kaba prakseri den sari sani dati. Wi e kisi trowstu te wi e luku san a profeiti Yesaya ben skrifi.​—Leisi Yesaya 65:17.

Yehovah o sorgu taki sma no o man memre sari sani moro. Fa so? A o tyari wan kaba kon na a ogri grontapu disi nanga ala a pina di e pasa na ini, dan a o poti wan tra sani na ini en presi di bun omeni tron moro leki san wi abi now. Nanga yepi fu Yesaya, Yehovah e pramisi: „Luku, mi o meki nyun hemel nanga wan nyun grontapu.” Te wi e frustan a pramisi dati, dan dati kan gi wi howpu.

San na den nyun hemel? Bijbel e taki fu tu sani di kan yepi wi fu kisi piki tapu na aksi dati. A fosiwan, na taki tu tra Bijbel skrifiman e taki fu nyun hemel, èn den ala tu e gebroiki wortu di abi fu du nanga bigi kenki di pasa na grontapu (2 Petrus 3:13; Openbaring 21:1-4). A di fu tu sani, na taki na ini Bijbel, a wortu „hemel” kan abi fu du nanga wan tirimakti (Yesaya 14:4, 12; Danièl 4:25, 26). Sobun, den nyun hemel na wan nyun tirimakti di man seti sani bun baka na grontapu. Na Gado Kownukondre wawan, noso a hemel tirimakti di Yesus leri wi fu begi fu en, o man du ala den sani dati. A Kownukondre dati o tyari retidu kon na heri grontapu, soleki fa Gado wani dati.​—Mateyus 6:9, 10.

San na a nyun grontapu? Luku tu sani na ini Bijbel di kan yepi wi fu kon sabi dati. A fosiwan, na taki na ini Bijbel a wortu „grontapu” son leisi no abi fu du nanga a grontapu srefi, ma nanga libisma (Psalm 96:1). A di fu tu sani, na taki Bijbel taki dati na ondro a tiri fu Gado, reti-ati libisma o leri fu du san bun, èn te fu kaba ala sma na heri grontapu o du dati (Yesaya 26:9). Sobun, a nyun grontapu na wan libimakandra fu sma di o saka densrefi na ondro a tirimakti fu Gado èn den o hori densrefi na den reti markitiki fu en.

Yu e bigin si kaba fa Gado o sorgu taki sma no o man memre sani moro di e meki den firi sari? Heri esi, Yehovah o tyari nyun hemel nanga nyun grontapu kon soleki fa a pramisi, èn na so retidu o de na ini a nyun grontapu. * Na ini a nyun grontapu dati, sma no o memre sari sani moro, fu di siki, problema, nanga broko-ede no o de moro. Reti-ati libisma o nyan bun fu a libi trutru èn den no o wani frigiti den moi sani di den e ondrofeni ibri dei.

Ma fa a de te wi ati e sari nownowde? Yehovah ben pramisi Yesaya a sani disi tu: „Sma no o memre den fositen sani moro èn den sani dati no o abi krakti na den tapu moro.” Safrisafri wi o frigiti ala sari sani di miti wi na ini na owru grontapu disi. Fa yu feni a sani dati? Efu yu feni en wan moi sani, dan fu san ede yu no e kon moro krosibei na a Gado di e pramisi yu so wan moi libi?

A bun fu leisi a pisi disi fu Bijbel na ini maart:

▪ Yesaya 63–Yeremia 16

[Futuwortu]

[Prenspari pisi na tapu bladzijde 19]

Yehovah o sorgu taki wan kaba o kon na sani di e meki wi firi sari