’Un musu lobi makandra’

„Mi e gi unu wan nyun komando, taki un musu lobi makandra. Neleki fa mi lobi unu, na so un musu lobi makandra tu. Na a fasi disi ala sma o sabi taki unu na mi disipel, te unu lobi makandra.”​—YOHANES 13:34, 35.

San disi wani taki? Krestes ben taigi den bakaman fu en fu lobi makandra neleki fa a ben lobi den. Fa Yesus ben sori taki a lobi den? A ben lobi ala sortu sma, aladi sma na ini a ten fu en ben e desko sma fu tra kondre èn sosrefi umasma (Yohanes 4:7-10). Fu di Yesus ben abi lobi, meki a gi en ten nanga en krakti fu yepi trawan èn a no suku en eigi bun (Markus 6:30-34). Te fu kaba, Krestes sori lobi na a moro bun fasi di de. A ben taki: „Mi na a moro bun skapuman. A moro bun skapuman e gi en libi gi den skapu fu en.”​—Yohanes 10:11.

Fa a ben de nanga den fosi Kresten? Na ini a fosi yarihondro, Kresten ben e kari makandra „brada” noso „sisa” (Fileimon 1, 2). Sma fu ala ras ben kan kon na ini a Kresten gemeente, fu di den Kresten ben e bribi taki „nowan difrenti de na mindri Dyu nanga Grikisma, bika den alamala abi a srefi Masra” (Romesma 10:11, 12). Baka a Pinksterfesa fu a yari 33, den disipel na ini Yerusalem „ben e seri den gron fu den èn ala sani di den ben abi, dan den prati a moni nanga makandra, so taki ibriwan fu den ben kan kisi san a ben abi fanowdu”. Fu san ede den ben du dati? Den ben du dati so taki den nyun sma di ben teki dopu ben kan tan na ini Yerusalem èn ben kan tan „poti prakseri na den leri fu den apostel” (Tori fu den apostel 2:41-45). San ben meki taki den yepi den trawan? Baka di den apostel dede, 200 yari no ben pasa ete di Tertulianus skrifi san trawan ben taki fu Kresten: „Den lobi makandra trutru . . . èn den de klariklari srefi fu dede gi makandra.”

Suma e du a sani dati na ini a ten disi? Wan buku e taki dati na ini den hondrohondro yari di pasa, sma di e kari densrefi Kresten, „du moro ogri sani nanga makandra, leki den ogri di sma di no e bribi na ini Gado du nanga den” (The History of the Decline and Fall of the Roman Empire, 1837). Wan ondrosuku di sma ben du no so langa pasa na ini Amerkankondre e sori taki furu sma di e taki dati den e anbegi Gado, no lobi sma fu tra ras, èn furu fu den sma disi e kari densrefi Kresten. Nofo tron kerki sma fu a wan kondre no abi noti fu du nanga sma fu tra kondre di de fu a srefi bribi leki den, èn den no de klariklari fu yepi den tra sma dati te den de na nowtu.

Na ini 2004, bigi winti wai sowan fo leisi na ini tu mun ten na ini Florida. Baka dati, na amra-basi fu wan komte na ini Florida di e sorgu taki sma di de na nowtu e kisi yepi, luku fu si efu sma ben e gebroiki den sani di den ben e kisi na wan yoisti fasi. A ben taki dati nowan enkri tra grupu ben orga so bun leki den Yehovah Kotoigi, èn a taki tu dati a ben o gi den iniwan sani di den ben abi fanowdu. Wan pisi ten na fesi, na ini 1997, wan grupu Yehovah Kotoigi go na a Demokrasia Republiek Kongo fu yepi Kresten brada nanga sisa, nanga tra sma drape di ben de na nowtu. Kotoigi na ini Europa ben tyari sani kon na wán gi den brada drape èn den sani dati ben warti wán milyun Amerkan dala.