A DE wan moi dei na ini mei. Wi de na ini a Republiek Altay, wan kefalek moi kontren te na a zuid-westsei fu Siberia. Te wi e luku go na dorosei, dan wi kan si bigi dungru busi fu pinabon. Baka den busi dati, wi e si den hei bergi-ede nanga snew na tapu èn di abi wan lekti blaw kloru. Disi na a farawe kontren pe den Altaysma e tan. Den sma disi de tra fasi leki den tra pipel fu Asia èn den abi den eigi tongo. Den e libi switi na den Altay-bergi, wan nen di abi fu du nanga wan Torku-Mongolia wortu di wani taki „a meki fu gowtu”.

Wan tu yari pasa kaba sensi mi nanga mi wefi leri taki Dofusma-tongo fu Rosiakondre. Sensi a ten dati wi bigin go tu na den Dofusma-tongo gemeente èn na pikin grupu Yehovah Kotoigi di dofu. Na ini a kondre disi, moro leki 170 difrenti pipel nanga kulturu de èn den alamala e taki Rosiatongo. Ma den dofu sma na wi mindri e taki Dofusma-tongo fu Rosiakondre nanga makandra. Den e moksi furu nanga makandra, èn furu fu den e angri fu fruteri wi fu a libi fu den èn fu sori switifasi gi wi. Na so a de na Altay.

Te wi de na ini a foto Gorno-Altaysk, dan wi e yere fu wan tu dofu sma di e libi na ini wan pikin dorpu di de sowan 250 kilometer moro fara. Wi sabi taki wan tu Kotoigi e tan drape, ma nowan fu den man taki Dofusma-tongo. Wi e aksi wisrefi suma na den dofu Altaysma disi èn wi e bosroiti taki wi o rèi go suku den. Wan dofu trowpaar Yury nanga Tatyana, e prisiri te den e si fa wi de fayafaya fu go. Wi e tyari DVD fu prati gi dofu sma èn sosrefi wan DVD player. Boiti dati, wi e tyari wan bigi batra nanga dringi, brede, worst, èn sosrefi waran piroshki noso pikin pastei di den Rosiasma lobi meki èn di abi koro nanga patata na ini. Te fu kaba, wi e spoiti wi skin, wi krosi, nanga wi susu bun nanga wan sani di e sorgu taki kupari no e beti wi, bika sma na ini a kontren disi gwenti kisi wan sortu siki fu den kupari disi.

Wi e rèi na tapu wan bergipasi di lai boktu, èn a kontren drape moi srefisrefi. Na ala sei wi e smeri jasmijn nanga lila bromki. A e gi wi krakti! Wi e prisiri te wi e si fa wan grupu dia fu Siberia e teki den ten fu kaw a grasi di den e nyan. Den Altaysma e libi na ini udu oso di bow na ini grupu krosibei fu makandra, èn den abi moi daki fu zinkplaat. Na sei furu fu den oso disi, ete wan oso de di sma e kari ayyl. Nofo tron, den oso disi abi siksi uku èn a daki fu den gersi wan peprewoisi. Sonwan fu den oso disi gersi wan lontu tenti di tapu nanga bon buba. Furu Altay famiri e libi na ini na ayyl fu mei te go miti september, dan den e froisi go tan baka na ini a tra oso teleki mei.

Den Kotoigi na ini a dorpu e gi wi wan waran switikon èn den e tyari wi go na a oso fu wan dofu trowpaar di e tan drape. A trowpaar disi breiti srefisrefi fu si wi èn den wani sabi pe wi komoto èn san wi e du. Wi e kon sabi taki den abi wan computer, sobun te wi e sori den wan DVD, dan den de nomonomo fu luku en. Wantewante a de neleki den no e si wi moro. Den ai spikri na a computer èn den sani di den e si e hari den prakseri so te, taki wanwan leisi den e du den srefi sani dati nanga den anu. Den e seki den ede tu fu sori taki den e agri nanga san den e si. Nanga furu muiti wi man kisi den fu luku wi èn wi e stop a DVD, so taki wi kan go na den prenki na a bigin di e sori wan moi paradijs na grontapu. Wi tan poti prakseri na wan fu den prenki èn wi e fruteri den san Gado o du gi libisma èn sortu sma o libi fu têgo na ini den situwâsi di den e si. A e gi wi deki-ati fu si taki den wani sabi moro èn te wi de fu gowe, den e fruteri wi fu wan tra trowpaar di e libi na ini wan tra dorpu. A o teki wan tu yuru fu rèi doro drape.

Wi e hari gowe baka, èn wi e abra wan pasi di sma koti na ini den bergi. A pasi disi lai ston èn a moi kefalek. Wi e hari gowe moro fara tapu a pasi di lai boktu èn wi e rèi teleki wi doro wan dorpu di pikin moro leki a wan pe wi komoto. Drape wi e feni a dofu osofamiri. Den alamala, a masra, a wefi, a mama fu a wefi, èn a pikin boi fu a trowpaar disi, breiti taki sma kon luku den sondro taki den ben fruwakti dati. Wi pasa go na ini a pikin doro fu na ayyl fu den èn wi e smeri a switi smeri fu udu nanga botromerki na ini na oso. Na oso abi wan lontu olo na tapusei fu a daki fu en di gersi wan peprewoisi, èn leti e pasa na ini na olo disi kon na ini na oso. Na ini wan uku fu na oso yu abi wan ston onfu di ferfi kon weti èn sosrefi wan stoof. Boiti dati, moi redi matamata e anga na a skin fu na oso. A man nanga na uma e gi wi pikin lontu boru di baka na ini oli èn sosrefi pikin Sneisi komki nanga te. Wi e aksi den efu oiti den prakseri fu tron mati fu Gado. Den e denki a tori wan pisi ten. A mama fu a wefi e fruteri wi taki wan leisi di a ben pikin, a ben tyari nyanyan go na wan presi na den bergi fu gi leki ofrandi na den gado. „Mi no sabi san dati ben wani taki trutru”, na so a e taki, aladi a e hari en skowru èn e lafu. „Na so wi ben gwenti.”

Wi e sori den wan DVD fu a tori dati èn wi e si taki den no man bribi san den e si. Den wani taki wi fruteri den moro sani, ma fa wi o du dati dan? Nofo tron wi e seni sms gi dofu sma, ma fu di nowan enkri cellulair antenne de na ini a kontren disi, meki wi e pramisi den sma disi fu seni brifi gi den.

Son e dongo kaba te wi e gowe. Wi e brasa makandra èn wi e teki a langa pasi go baka na Gorno-Altaysk. Wi weri, ma wi breiti nanga a fasi fa sani waka. Wan pisi ten baka dati wi e aksi Kotoigi fu drape fa a de nanga na osofamiri disi. Den e taigi wi taki ibri tra wiki, a masra e go na wan moro bigi foto, pe wan sisa di sabi Dofusma-tongo e studeri Bijbel nanga en èn e tyari en go na wan konmakandra. Wi breiti srefisrefi taki a muiti di wi du ben abi bun bakapisi!

Te wi e suku reti-ati dofu sma, dan a de neleki wi e suku gudu di kibri te na tapu den bergi. Te wi suku omeni yuru langa, dan wi e feni wan diri ston na wan presi pe wi no ben denki taki wi ben o feni en. Gi wi, den Altay-bergi sa de gowtu bergi ala ten, fu di den e memre wi na den reti-ati sma di wi miti drape.