Yu ben sabi a sani disi?

San na a altari gi „wan gado di wi no sabi” di na apostel Paulus ben si na ini Ateine?​—Tori fu den apostel 17:23.

▪ Difrenti Griki skrifiman fu owruten ben taki fu den sortu altari disi. Fu eksempre, na ini a di fu tu yarihondro baka Krestes, Pausanias, di ben de wan historia skrifiman èn wan sabiman fu aardrijkskunde, ben taki dati na ini Olympia, yu ben abi „wan altari fu gado di wi no sabi”. Wan takiman nanga filosofiaman Philostratus ben taki dati na ini Ateine, „altari [ben] meki fu gi grani na gado di sma no sabi srefi”.

A skrifiman Diogenes Laertius fu a di fu dri yarihondro baka Krestes, ben taki fu wan gwenti di e sori pe den „altari di no abi nen” ben e komoto. A tori disi di de fu a di fu siksi noso a di fu seibi yarihondro fosi Krestes, e sori fa wan man di ben nen Epimenides ben krin Ateine puru wan takru siki drape. Diogenes skrifi: „A [Epimenides] teki skapu . . . èn a tyari den go na a Areopagus. Ne a lusu den meki den go pe den wani, dan a taigi den sma di ben e waka na baka den skapu, fu marki a presi pe ibri skapu ben e go didon. Drape den ben musu tyari ofrandi na a gado fu a kontren dati. Na so wan kaba ben kon na a takru siki, soleki fa sma ben e taki. Dati meki te na a dei fu tide, sma kan si altari di no abi wan nen na tapu, na difrenti presi fu Atika.”

Soleki fa wan buku e taki, dan wan tra sani ben kan de fu san ede sma ben e bow altari gi gado di den no ben sabi. A e taki dati „sma ben frede taki den ben o frigiti fu gi grani na son man gado noso uma gado di den no ben sabi. A sani dati ben o tapu den fu kisi blesi fu a gado dati, noso den ben o kisi fluku” (The Anchor Bible Dictionary).

Fu san ede den Dyu fu a fosi yarihondro ben e wisiwasi sma di ben e teki belasting moni?

▪ Noiti sma ben lobi den man di ben e teki belasting moni. Ma na ini owruten Israel, den ben e si den sma disi leki den moro wisiwasi èn den moro kruka sma di de.

A Rome tirimakti fu a ten dati ben e aksi tumusi furu belasting moni fu den sma. Den tiriman fu Rome ben wani taki sma pai belasting gi den gron èn sosrefi edemoni. Ma a sma di ben man pai a moro bigi moni, ben e kisi a wroko fu teki belasting moni tapu sani di bisnisman ben e tyari kon na ini a kondre èn ben e seri gi tra kondre, sosrefi tapu lai di ben e pasa na ini a kondre. Den bisnisman fu a kontren ben e bai a reti fu teki belasting moni na sma fu son kontren. Den sma dati ben de klariklari fu wroko gi den Romesma di den Dyu no ben lobi. Dati meki den Dyu ben e si den leki „sma di tori den èn sma di fadon komoto na bribi, sma di no ben de krin fu di den ben gwenti abi demakandra nanga sma di no ben e anbegi a tru Gado”, na so wan buku e taki (M’Clintock and Strong’s Cyclopædia).

Ala sma ben sabi den belasting man leki bigi fufuruman di ben e meki moni tapu den kondreman fu den. Sonwan fu den ben e aksi sma moro belasting leki san ben de fanowdu èn ala den moni dati ben e go na ini den eigi saka. Trawan ben e kon nanga falsi kragi fu kwinsi moni puru na den pôti Dyu (Lukas 3:13; 19:8). Dati meki sma ben e si den belasting man disi leki sondari, èn soleki fa wan buku e taki, den „no ben mag de krutuman noso kotoigi srefi” (The Jewish Encyclopedia).​—Mateyus 9:10, 11.

[Prenki na tapu bladzijde 18]

Wan altari gi wan gado di sma no sabi, brokopresi fu Pergamum, Torkukondre

[Prenki na tapu bladzijde 18]

Ston prenki fu wan belasting man, na ini Rome, a di fu 2 noso a di fu 3 yarihondro baka Krestes

[Sma di abi a reti fu a prenki]

Erich Lessing/Art Resource, NY