Wan takimakandra nanga wan birtisma​—Yesus na Gado?

YEHOVAH KOTOIGI lobi fu taki fu Bijbel nanga den birtisma fu den. Wan sani de di yu wani kon sabi fu Bijbel? Yu e aksi yusrefi fu san ede Yehovah Kotoigi e bribi noso e du son sani? Efu dati de so, dan yu no musu frede fu taki fu a tori dati nanga wan Kotoigi te yu miti wan fu den. A o de klariklari fu taki nanga yu fu a tori dati.

A pisi tori di e kon now, na wan takimakandra di wan Kotoigi fu Yehovah ben kan abi nanga wan birtisma. Kon meki wi taki dati wan Kotoigi di nen Alma kon na a oso fu wan uma di nen Samanta.

A tru taki unu no e bribi na ini Yesus?

Samanta: A domri fu mi taki dati Yehovah Kotoigi no e bribi na ini Yesus. A tru?

Alma: We, mi kan taigi yu taki wi e bribi na ini Yesus. Fu taki en leti, wi e bribi taki wan sma musu poti bribi na ini Yesus fu man kisi frulusu.

Samanta: Na dati mi e bribi tu.

Alma: We, dan mi nanga yu e bribi a srefi sani. Ma fosi mi go moro fara, mi na Alma. Fa yu nen?

Samanta: Mi na Samanta. Mi breiti fu si yu.

Alma: Mi breiti fu si yu tu, Samanta. Kande yu e aksi yusrefi: ’Efu trutru Yehovah Kotoigi e bribi na ini Yesus, dan fu san ede sma e taki dati disi no de so?’

Samanta: Iya, na dati mi e aksi misrefi.

Alma: We Samanta, mi kan taigi yu taki wi e bribi tranga na ini Yesus, ma wi no e bribi ala sani di sma e taki fu en.

Samanta: Fa so?

Alma: We, son sma e taki dati Yesus ben de noti moro leki wan bun man. Ma wi no e agri nanga a tori dati.

Samanta: Misrefi no e agri nanga dati.

Alma: Mi breiti taki yu e si en so tu. Wan tra sani, na taki Yehovah Kotoigi no e bribi sani di no e kruderi nanga san Yesus ben taki fu ensrefi èn fu en Papa.

Samanta: Sortu sani na dati?

Alma: Furu kerki e leri taki Yesus na Gado. Kande dati na san sma leri yu.

Samanta: Iya, a domri fu mi taki dati Gado nanga Yesus na a srefi.

Alma: Ma san yu denki? Efu yu wani kon sabi san tru fu Yesus, dan a no moro bun fu luku san Yesus ben taki fu ensrefi?

Samanta: Iya, yu abi leti.

San Yesus ben taki?

Alma: Meki wi luku wan Bijbeltekst di e yepi wi fu kon frustan a tori moro bun. Grantangi luku san skrifi na Yohanes 6:38. Yesus ben taki: „Mi no saka komoto fu hemel fu du mi wani, ma fu du a wani fu en di seni mi kon.” Efu Yesus ben de Gado, dan wi no ben o man frustan a tekst dati, a no so?

 Samanta: Fa so?

Alma: We, Yesus ben taki dati a no ben saka komoto fu hemel fu du san ensrefi wani.

Samanta: Dati tru, a ben taki dati a ben kon fu du a wani fu a sma di ben seni en.

Alma: Ma efu Yesus na Gado, dan suma ben seni en komoto fu hemel? Èn fu san ede Yesus ben de klariklari fu du a wani fu a sma dati?

Samanta: Mi e bigin frustan san yu wani taki. Ma mi no sabi efu a wan-enkri tekst disi e sori taki Yesus a no Gado.

Alma: We luku san Yesus ben taki na wan tra okasi. A ben taki wan srefi sortu sani na ini a tra kapitel fu Yohanes. Yu kan leisi Yohanes 7:16, grantangi?

Samanta: A bun. „Ma Yesus piki den: ’Den sani di mi e leri sma, a no fu misrefi, ma den de fu a sma di seni mi kon.’”

Alma: Grantangi, Samanta. A vers disi e sori taki Yesus ben leri sma en eigi denki?

Samanta: Nôno, a ben taki dati den sani di a e leri sma e komoto fu a sma di seni en.

Alma: Dati tru. Ma dan wi musu aksi wisrefi baka: ’Suma seni Yesus? Èn suma gi en den tru tori di a ben e leri sma?’ Yu no denki taki a sma dati ben o hei moro Yesus? Te yu luku en bun, dan a sma di e seni wan trawan fu go du wan sani, bigi moro a sma di a e seni, a no so?

Samanta: Dati na wan moi tori. Noiti mi ben leisi a pisi dati.

Alma: Luku sosrefi san Yesus taki na Yohanes 14:28: „Unu yere taki mi taigi unu: Mi e gowe, ma mi o kon baka na unu. Efu unu lobi mi, dan unu o prisiri taki mi e go na a Tata, bika a Tata bigi moro mi.” Te yu e luku a vers disi, fa yu denki taki Yesus ben si ensrefi? A ben feni taki en nanga en papa na a srefi?

Samanta: We, a ben taki dati en Papa hei moro en. Sobun, a ben si Gado leki wan sma di bigi moro en.

Alma: Heri bun. Wi o luku ete wan eksempre. Luku san Yesus ben taigi den disipel fu en na Mateyus 28:18. A vers dati e taki: „Mi kisi ala makti na ini hemel èn na grontapu.” Sobun, san Yesus ben taki? A ben taki dati ala ten a ben abi ala makti kaba?

Samanta: Nôno, a ben taki dati a ben kisi ala makti.

Alma: Ma efu Yesus na Gado, dan fa a ben kan kisi moro makti? Èn suma gi en a makti dati?

Samanta: So, na wan sani yu e taki drape.

Nanga suma Yesus ben e taki?

Alma: Wan tra sani de di wi no ben o frustan efu Yesus ben de Gado trutru.

Samanta: San na dati?

Alma: We, a tori dati abi fu du nanga a dopu fu Yesus. A skrifi na Lukas 3:21, 22. Yu kan leisi den vers dati?

Samanta: „We, di ala sma teki dopu, dan Yesus teki dopu tu. Di a ben e begi, hemel opo. Ne santa yeye saka kon na en tapu leki wan doifi, dan wan sten komoto na hemel èn a taki: ’Yu na mi Manpikin, a lobiwan. Na yu mi feni bun.’”

Alma: Yu si san Yesus ben e du di a ben e teki dopu?

Samanta: A ben e begi.

Alma: Iya. We, wi ben kan aksi wisrefi: ’Efu Yesus na Gado, dan suma a ben e begi?’

Samanta: Dati na wan moi aksi. Mi o aksi mi domri a tori dati.

Alma: Luku tu taki di Yesus ben opo komoto na ini a watra, wan sten ben de fu yere komoto fu hemel. Yu si san a sten dati taki?

Samanta: A taki dati Yesus ben de En Manpikin, taki a ben lobi en, èn taki a ben feni en bun.

Alma: Dati tru. Ma efu Yesus na Gado, dan  suma ben taki den sani dati komoto fu hemel?

Samanta: Noiti mi ben si a sani dati so.

Fu san ede den de leki „Tata” nanga „Manpikin”?

Alma: Luku ete wan sani di wi musu hori na prakseri: Wi leisi taki Yesus ben kari Gado en hemel Tata. Èn di Yesus teki dopu, wan sten komoto fu hemel taki dati Yesus ben de En Manpikin. Te yu luku en bun, Yesus ben taki krin dati en na a Manpikin fu Gado. We, efu yu wani leri mi taki tu sma na speri, dan yu ben o taki fu wan papa nanga en manpikin?

Samanta: Nôno, kande mi ben o taki fu tu brada.

Alma: Heri bun. Kande yu ben o taki fu twelengi srefi. Ma Yesus ben taki dati Gado na a Tata èn taki en na a Manpikin. Sobun, san yu denki taki Yesus ben wani leri wi?

Samanta: Mi e frustan san yu e taigi mi. Yesus e sori taki a wan sma moro owru èn taki a abi moro makti leki a trawan.

Alma: Dati na en. Yu srefi e frustan krin taki te tu sma na ini wan famiri na speri, dan den kan de brada noso twelengi. We dan, efu Yesus ben de Gado trutru, dan leki a Bigi Leriman, a ben o gebroiki wan srefi sortu eksempre tu, noso wan moro bun wan srefi, a no so?

Samanta: Iya, dati tru.

Alma: Ma na presi fu dati, a taki dati en na a „Manpikin” èn taki Gado na en „Tata”.

Samanta: Na wan moi sani yu taki drape.

San den fosi bakaman fu Yesus ben taki?

Alma: Fosi mi gowe, mi wani sori yu ete wan sani, efu yu feni dati bun.

Samanta: Ai, yu kan taki.

Alma: Efu Yesus na Gado trutru, dan yu no denki taki den disipel fu en ben o taki dati tu?

Samanta: Mi denki so, iya.

Alma: Ma na nowan presi na ini Bijbel yu e si taki den ben e leri sma dati. Ma luku san wan fu den fosi bakaman fu Yesus, na apostel Paulus, ben skrifi. Na Filipisma 2:9, a e taki san Gado du baka di Yesus dede èn kisi wan opobaka: „Na fu dati ede Gado poti en moro hei tu leki fa a ben de kaba èn a gi en [Yesus] wan nen di bigi moro ibri tra nen.” Te yu e luku a vers disi, dan san Gado ben du gi Yesus?

Samanta: A vers e taki dati Gado poti en moro hei leki fa a ben de kaba.

Alma: Iya. Ma efu Yesus ben de a srefi leki Gado fosi a dede èn a poti en moro hei bakaten, dan dati wani taki dati Yesus ben o hei moro Gado, a no so? Yu denki taki wan sma kan hei moro Gado?

Samanta: Nôno, dati no kan.

Alma: Yu si. Sobun, te yu luku ala den buweisi disi, dan a tru taki Bijbel e leri taki Yesus na Gado?

Samanta: No, mi no denki. Bijbel e taki dati en na a Manpikin fu Gado.

Alma: Na so a de. Ma mi kan taigi yu Samanta, taki Yehovah Kotoigi abi bigi lespeki gi Yesus. Wi e bribi taki a dede fu en leki a pramisi Mesias, o meki taki ala sma di e gi yesi na Gado kan kisi frulusu.

Samanta: Mi e bribi dati tu.

Alma: We dan, kande yu e aksi yusrefi: ’Fa wi kan sori Yesus taki wi de nanga tangi taki a gi en libi fu a bun fu wi?’ *

Samanta: Mi aksi misrefi a sani dati tu.

Alma: Kande mi kan kon baka fu sori yu san Bijbel e taki fu a tori dati. Yu o de na oso tra wiki na a yuru disi?

Samanta: Iya, mi o de na oso.

Alma: A bun, te tra wiki.

[Futuwortu]