Fa Yesus ben e si politiek?

DEN Evangelie skrifiman e taki fu difrenti situwâsi na ini a diniwroko fu Yesus, pe a ben kisi fu du nanga politiek. Fu eksempre, syatu baka di Yesus teki dopu di a ben abi sowan 30 yari, dan Didibri ben wani meki a tron tiriman fu grontapu. Bakaten, di a ben e du a diniwroko fu en, wan bigi grupu sma ben wani meki a tron kownu fu den. Ma efu dati no ben sari, dan wan pisi ten baka dati, sma pruberi fu dwengi en fu tron wan politiek man. San Yesus du? Meki wi go luku.

Tiriman fu grontapu. Den Evangelietori e taki dati Didibri ben wani gi Yesus „ala den kownukondre fu grontapu”. Prakseri omeni bun sani Yesus ben o man du gi libisma di e pina efu a ben de wan tiriman fu grontapu! Nowan sma di lobi politiek èn di wani taki libisma go na fesi, ben o weigri fu teki a posisi dati, a no so? Ma Yesus weigri fu teki en.​—Mateyus 4:8-11.

Kownu. Furu fu den sma na ini a ten fu Yesus ben e angri gi wan tiriman di ben o lusu den moni problema nanga den politiek problema fu den. Fu di den sani di Yesus ben du ben e naki sma ati, meki den ben wani taki a teki prati na politiek. San Yesus du? Na Evangelie skrifiman Yohanes e taki: „Fu di Yesus ben sabi taki den ben wani grabu en fu meki a tron kownu, meki a gowe baka na a bergi en wawan” (Yohanes 6:10-15). A de krin taki Yesus weigri fu teki prati na politiek.

Wan politiek man. Luku san pasa wan tu dei bifo den kiri Yesus. Tu grupu sma ben go na Yesus. Wan fu den ben de den bakaman fu den Fariseiman di ben wani komoto na ondro a makti fu a Gran Kownukondre Rome. A trawan ben de den partèiman fu Herodes, di ben wani tan na ondro a makti fu Rome. Den ben wani dwengi Yesus fu taki sortu sei a teki. Den aksi en efu den Dyu ben musu pai Rome belasting moni.

Markus skrifi san Yesus piki den: „’Fu san ede unu e tesi mi? Tyari wan solfru moni kon,  meki mi luku en.’ Ne den tyari a moni kon. Dan a taigi den: ’Suma prenki èn suma nen de na en tapu?’ Den taigi en: ’A di fu Grankownu.’ Ne Yesus taigi den: ’Pai Grankownu san na fu Grankownu, ma pai Gado san na fu Gado’” (Markus 12:13-17). A sani di wan buku e taki, e meki wi kon frustan fu san ede Yesus piki den na a fasi dati: „A weigri fu de wan mesias di ben e teki prati na politiek, èn a meki den kon frustan krin san na fu Grankownu èn san na fu Gado” (Church and State​—The Story of Two Kingdoms).

A no de so taki Yesus no ben e broko en ede nanga problema soleki pôtifasi nanga kruktudu. Fu taki en leti, Bijbel e sori taki a ben sari trutru te a ben si a takru situwâsi fu den sma na en lontu (Markus 6:33, 34). Toku Yesus no pruberi fu tyari wan kaba kon na a kruktudu di de na grontapu, aladi son sma pruberi fu dwengi en fu teki prati na den politiek afersi fu a ten dati.

Den eksempre disi e sori krin taki Yesus weigri fu teki prati na politiek. Ma fa a de nanga Kresten na ini a ten disi? San den musu du?