Wan aksi gi Yesus

Furu fayafaya bribiman feni taki kerki musu moksi nanga politiek. Den e bribi taki kerki kan yepi fu lusu den problema fu libisma. Ma fayafaya bribiman de tu di feni taki kerki nanga politiek no musu moksi nanga makandra. Fa yu e prakseri fu a tori disi? Yu feni taki den tu seti dati di abi furu makti, musu wroko makandra?

SMA taki dati Yesus Krestes na „a moro prenspari man na ini a historia fu kerki, fu di a ben abi furu krakti na tapu a libi fu sma”. Sobun, kon meki wi taki dati wi ben o aksi Yesus efu kerki musu moksi nanga politiek. San a ben o piki? Di a ben de na grontapu, a ben piki na aksi dati nanga yepi fu den sani di a ben taki èn ben du. Fu eksempre, na ini a pôpi takimakandra di a ben hori na tapu na Olèifbergi, Yesus gi den bakaman fu en rai di ben o yepi den fu kon sabi sortu frantwortu den ben abi na ini a libimakandra fu den. Meki wi go luku wan tu fu den rai dati.

 Abi krakti na tapu a libi fu sma

Yesus ben sori fa den bakaman fu en musu tyari densrefi na ini grontapu. A ben taki: „Unu na a sowtu fu grontapu. Ma efu sowtu no abi tesi moro, dan fa a o kon sowtu baka? Yu no man gebroiki en gi noti moro. Na fu teki en trowe go na dorosei meki sma trapu na en tapu. Unu na a leti fu grontapu. . . . Un musu meki un leti skèin gi sma tu. Dan den kan si den bun di unu e du èn den kan gi glori na un Tata di de na hemel” (Mateyus 5:13-16). Fu san ede Yesus ben teki den bakaman fu en gersi nanga sowtu èn nanga leti?

Den wortu fu Yesus wani taki dati den bakaman fu en de leki sowtu gi ala libisma, a no gi wan pikin grupu nomo. Den de leki leti tu gi ala libisma di wani si sani krin, a no gi wan pikin grupu nomo. Nanga den agersitori disi, Yesus sori krin taki a no ben wani taki den bakaman fu en hori densrefi aparti fu tra sma. Fu san ede den no ben musu du dati?

Luku a tori disi: Sowtu kan sorgu taki nyanyan no pori, ma dan yu musu moksi en fosi nanga a nyanyan. Wan lampu no kan tyari leti kon na ini wan dungru kamra efu yu no poti en na ini a kamra. Dati meki wi kan frustan fu san ede Yesus noiti no taigi den disipel fu en fu froisi go tan na farawe presi fu seti libimakandra pe soso bribiman e libi. A no ben gi den deki-ati tu fu go libi na ini oso noso tra presi pe tra sma no man kon makriki. Na presi fu dati, neleki fa sowtu musu moksi nanga nyanyan fu kan abi krakti na en tapu, èn neleki fa leti musu de fu man puru dungru, na so Kresten musu abi krakti na tapu a libi fu trawan.

„No de wan pisi fu grontapu”

Ma a rai di Yesus ben gi den bakaman fu en fu sori den fa den musu libi nanga tra sma, e meki wi aksi wisrefi fa Kresten musu si politiek, èn dati na wan prenspari aksi. Fu san ede? Syatu bifo Yesus dede, a begi Gado fu a bun fu den bakaman fu en. A ben taki: „Mi no e aksi yu fu puru den na grontapu, ma fu kibri den, so taki na ogriwan no kan du den ogri. Den no de wan pisi fu grontapu, neleki fa mi no de wan pisi fu grontapu” (Yohanes 17:15, 16). Ma efu Kresten no musu de wan pisi fu grontapu, dan fa den o man moksi nanga den sma na ini a birti fu den? Fu kisi piki tapu na aksi dati, wi o luku ete dri aksi:

• Fa Yesus ben e si politiek?

• San Kresten musu du na ini a ten disi?

• Fa den leri fu Krestes abi krakti na tapu a libimakandra?

[Prenspari pisi na tapu bladzijde 4]

Yesus sori krin taki a no ben wani taki den bakaman fu en hori densrefi aparti fu tra sma