Bijbel de leki iniwan tra buku?

„Na Gado srefi ben meki sma skrifi ala den sani di de na ini Gado Buku. Den sani disi bun fu gi leri . . . , so taki wan futuboi fu Gado kan kon bun dorodoro èn a kan de srekasreka fu du ibri bun wroko.”​—2 TIMOTEYUS 3:16, 17.

SON sma no e agri nanga a sani di skrifi dyaso. Fa a de nanga yu? Yu e si Bijbel leki:

• Wan moi buku di abi prenspari sani na ini?

• Wan fu den furu prenspari santa buku?

• Wan buku nanga fositen tori di e leri wi fa wi musu tyari wisrefi?

• A Wortu fu Gado?

Wan tra aksi na: A abi trobi san yu e bribi? Luku san Bijbel srefi e taki: „Ala sani di sma skrifi fositen, ben skrifi fu leri wi wan sani. Disi e yepi wi fu horidoro èn fu kisi trowstu fu Gado Buku, so taki wi kan abi howpu” (Romesma 15:4). Sobun, Bijbel srefi e taki dati a skrifi fu gi wi leri, fu trowstu wi èn fu gi wi howpu.

Ma efu Bijbel na wan buku di moi fu leisi nomo noso efu a de wan fu den furu santa buku, dan yu ben o teki leri fu en èn yu ben o meki a tiri yu osofamiri? Yu ben o du dati efu a boskopu na ini ben de heri tra fasi leki fa yu ben denki? Efu Bijbel na wan buku nanga anansitori, dan a o man gi yu trowstu nanga howpu?

Na a tra sei, yu abi milyunmilyun sma di studeri Bijbel èn di e bribi taki Bijbel wawan na a Wortu fu Gado. Fu san ede? San e meki taki Bijbel de tra fasi leki tra buku? Kon meki wi luku feifi prenspari sani na ini den artikel di e kon now, di o sori wi fu san ede disi de so.