Wan brifi fu Ierland

Disi ben de a moro switi fakansi fu mi!

„YU MUSU go du wan span sani fu puru yu prakseri na a eksame fu yu”, na dati mi papa nanga mi mama ben taigi mi. „Kon meki wi go luku den nicht fu yu na Ierland. Meki wi go preiki a Kownukondre boskopu gi den sma drape di no e yere a boskopu so furu.”

Mi no ben feni taki disi ben de wan bun sani. Mi ben senwe fu di mi ben denki taki mi no ben o man stuka nofo gi mi eksame èn fu di noiti ete mi ben go na wan tra kondre boiti Ingrisikondre. Noiti mi ben frei nanga opolani. Mi leki wan pikin fu 17 yari ben lobi fu du furu sani èn mi ben e libi na ini wan birti fu Londen pe furu sani ben de fu du. Dan fa mi ben o man go na wan pikin foto na a zuidwest-sei fu Ierland pe sani ben e waka safrisafri?

Mi no ben abi fu frede. Di na opolani saka, mi ben lobi Ierland wantewante. Fu di wi ben gowe fu Londen frukufruku mamanten, meki mi fadon na sribi di a wagi fu wi bigin rèi. Wi ben e rèi na smara strati di ben abi lagi skotu na seisei èn wanwan leisi te mi ben e wiki, mi ben e si moi bergikontren na baka den skotu disi.

A fosi neti wi doro na a foto Skibbereen èn wi tan na wan osofamiri di ben froisi go na Ierland fu yepi nanga a preikiwroko. A ben de wan switi ten pe wi ben gi makandra deki-ati. Wi ben e prei wan sani di abi fu du nanga Bijbel tori: Ibriwan fu wi ben puru wan pisi papira na ini wan saka pe a nen fu wan sma fu Bijbel ben skrifi na tapu. Baka dati wi ben musu sori nanga wi anu san a sma dati ben ondrofeni. Dan den trawan ben musu rai suma na a sma.

A dei na en baka, mi, mi papa nanga mama, mi pikin brada, den nicht fu mi nanga tra famiri teki boto go na Heir Island pe sowan 30 sma e tan. Yesus ben taki dati a bun nyunsu ben musu preiki na ala presi fu grontapu pe sma e libi. Sobun, heri dei wi taki fu Bijbel nanga den sma disi di abi switi fasi. Na so wi ben kan gi den deki-ati èn wi ben kan prisiri fu a moi èilanti.

A son ben e skèin èn a loktu ben krin. Wi ben kan smeri wan switi sani leki kronto. Na den geri bromki fu a gaspeldoorn ben smeri so. A heri swampugron na mindrisei fu na èilanti ben lai bromki. Yu ben abi sesyoro di lai nanga bigi ston pe fisiman-fowru nanga jan-van-gent-fowru ben meki nesi èn ben sorgu gi den pikin fu den. A heri kontren na ini a birti fu Roaringwater Bay ben lai pikin èilanti èn na furu fu den èilanti disi nowan sma ben e tan. Wi ben fruwondru trutru fu si ala den moi sani disi di Yehovah meki!

Di wi ben de baka na Skibbereen, mi ben meki furu mati na ini a gemeente fu Yehovah Kotoigi drape èn mi ben pruberi fu du sani di noiti mi  no du ete. Wan nyun sani di mi ben leri, na fu pari wan pikin boto. Na wan moi sani te yu e sidon na ini wan boto, dan yu e luku a sesyoro fu Ierland! Wi ben go fanga fisi fu nyan, ma fosi wi ben kan du dati, den sedagu ben kisi den kaba. Wi ben prei na tapu a santi fu a syoro èn mi ben pruberi fu dansi srefi leki den sma fu Ierland.

Wi teki wi ten fu leri pikinso fu Skibbereen tu. Baka 1840, ala den patata di sma prani kon pori. Spesrutu na ini Skibbereen nanga den dorpu na en lontu den sma ben firi den takru bakapisi fu dati. Dusundusun sma kon dede fu di den no ben abi noti fu nyan. Den beri sowan 9000 sma na ini wán bigi grebi. Na wan trowstu fu sabi taki dyonsro te Gado Kownukondre o tiri, dan noiti moro angriten o de. Furu sma di dede na so wan sari fasi o kon na libi baka na ini wan paradijs na grontapu.

Wi nanga den Kotoigi fu Skibbereen go preiki gi sma di ben e libi na ini a bigi kontren fu a gemeente èn di no ben yere a boskopu so furu ete. Wi teki wan smara bergipasi go na den oso di ben de na tapu wan smara pisi fu a bergi. Drape yu ben kan si a Se fu Ierland. Dyaso wi ben miti sma tu di ben abi switi fasi. Te wi ben e bigin nanga wan takimakandra nanga den sma fu Heir Island, dan wi ben e fruteri den taki wi ben de nanga fakansi èn taki wi ben teki pikinso fu wi ten fu taki fu Bijbel nanga den. Na so wi ben du tu na Skibbereen.

Mi mama ben taki nanga wan uma di ben breiti fu teki A Waktitoren nanga na Ontwaakt! Di wi miti en wan tu dei baka dati, a taigi wi taki a ben lobi den tijdschrift.

A taki: „Mi e begi unu fu tyari moro tijdschrift kon gi mi èn fu taki nanga mi.” Wi taigi en taki wi ben o drai go baka na oso, ma taki wi ben o aksi wan sma fu kon na en.

A taki: „We, te unu e kon baka, dan kon luku mi, grantangi. Den sma fu Ierland noiti e frigiti wan sma fesi!”

A lasti dei fu wi fakansi wi go na sesyoro nanga den brada nanga sisa fu a gemeente. Wi suku udu nanga wan tu ston fu meki wan faya, dan wi bori den pakro di wi ben feni na mindri den ston di skwala fu se ben wasi kon na tapu a syoro. Mi leki wan fotopikin prisiri trutru fu ala den sani disi.

Sobun, fa mi ben feni a wiki di mi ben de na Ierland? Gi mi disi ben de a moro switi fakansi! Boiti taki a ben de wan prisiri ten, mi ben firi bun tu fu di mi ben sabi taki mi ben plisi Yehovah èn gi en grani. Mi lobi dini Gado èn te yu abi bun mati nanga famiri di abi a srefi denki leki yu èn di e wroko makandra nanga yu, a e gi yu moro prisiri srefi. Di mi doro oso, mi taigi Yehovah tangi taki a gi mi so furu bun mati di lobi en èn taki mi ondrofeni someni moi sani di mi no o frigiti noiti.

[Sma di abi a reti fu a prenki na tapu bladzijde 25]

An Post, Ireland