▪ Na ini Bijbel wi kan leisi taki Yesus ben taigi den bakaman fu en: „Fu dati ede, go na sma fu ala kondre èn meki den tron disipel. . . . Leri den” (Mateyus 28:19, 20). Ala Kresten musu du a wroko disi? Na dati den fosi disipel fu Yesus ben frustan. Fu eksempre, na apostel Petrus ben taki: ’A [Yesus] taigi wi sosrefi fu preiki finifini’ (Tori fu den apostel 10:42). Na apostel Paulus ben skrifi tu: „Mi de fruplekti fu preiki. Iya, helu fu mi efu mi no preiki a bun nyunsu!”​—1 Korentesma 9:16.

A no Paulus nanga Petrus wawan ben du san Yesus taigi den, ma ala den fosi yarihondro Kresten ben e du dati tu. A moro prenspari sani di den ben e du, ben de a preikiwroko (Tori fu den apostel 5:28-32, 41, 42). Yehovah Kotoigi na ini a ten disi e meki muiti fu du a srefi sani. Neleki Yesus den e preiki fu „a Kownukondre fu hemel”.​—Mateyus 10:7.

Gi suma wi musu preiki a Kownukondre boskopu? Yesus ben taki dati a musu preiki gi ala sma èn na ala presi. A ben taigi den disipel: „Unu sa de kotoigi fu mi . . . te na den moro farawe presi fu grontapu” (Tori fu den apostel 1:8). A ben taki srefi taki fosi a grontapu kon na wan kaba, ’a bun nyunsu disi fu a Kownukondre ben o preiki gi sma na heri grontapu, so taki sma ben kan yere dati’ (Mateyus 24:14). Sobun, den fosi yarihondro Kresten ben meki muiti fu taki nanga ala sma. Den no ben taki nomo nanga sma di den ben sabi, noso nanga sma di no ben anbegi wan gado (Kolosesma 1:23; 1 Timoteyus 2:3, 4). Na so Yehovah Kotoigi na ini a ten disi e pruberi fu taki nanga ala sma tu. *

San na a moro bun fasi fu preiki a Kownukondre boskopu? Yesus, di ben sabi fa fu meki furu sma kon sabi a boskopu, ben seni den disipel fu en na foto, na dorpu èn na sma oso (Mateyus 10:7, 11, 12). Baka di Yesus dede, a kisi wan opobaka èn den disipel fu en go doro fu preiki „oso fu oso” (Tori fu den apostel 5:42). Neleki Yesus, den ben preiki te den ben e kisi na okasi fu du dati èn te den ben de na presi pe furu sma de (Yohanes 4:7-26; 18:20; Tori fu den apostel 17:17). Na ini a ten disi Yehovah Kotoigi e du a srefi sani te den e preiki.

Ma Yesus ben taki dati a no ala sma ben o arki (Mateyus 10:14; 24:37-39). Dati musu tapu Kresten fu preiki? Luku wan eksempre: Kon meki wi taki dati yu de na ini wan grupu di musu yepi sma, baka di wan hebi gronseki pasa. Yu ben o tapu fu suku sma baka wan pisi ten soso fu di yu feni wan tu sma nomo di tan na libi? Nôno, yu ben o tan suku solanga howpu ben de taki yu kan feni awinsi wán sma nomo. Yesus taigi den disipel fu en fu horidoro solanga howpu de fu feni sma di wani arki a bun nyunsu fu Gado Kownukondre (Mateyus 10:23; 1 Timoteyus 4:16). Yehovah Kotoigi e sori lobi gi Gado èn gi tra sma fu di den e go oso fu oso fu feni den sma disi. Te sma e yere a Kownukondre boskopu èn e gi yesi na a boskopu dati, dan den kan tan na libi.​—Mateyus 22:37-39; 2 Tesalonikasma 1:8.

A tijdschrift disi e taki fu a Bijbel boskopu dati. Efu yu wani sabi moro, dan grantangi taki nanga wan fu den Kotoigi fu Yehovah te yu miti en, noso skrifi go na den sma di tyari a tijdschrift disi kon na doro.

[Futuwortu]