San yu kan du te yu no e wroko so furu moni moro

OBED na a papa fu tu pikin. Tin yari langa a wroko na wan diri hotel na ini wan bigi Afrikan foto èn a ben man sorgu bun gi en osofamiri. Wanwan leisi te a ben kisi na okasi fu teki wan bun fakansi nanga en osofamiri, dan a ben e go na den kontren na ini en kondre di lanti sreka gi den busimeti. Ma den no ben man du den sani disi moro di a lasi en wroko, fu di a hotel pe a ben wroko no ben e drai bun moro.

Stephen wroko moro leki 22 yari na wan bigi bangi èn a ben abi wan hei posisi drape. Wan fu den sani di a bangi ben seti gi en na wan bigi oso, wan wagi, sma di ben e krin en oso, nanga wan bun skoro gi den pikin fu en. Di a bangi bigin orga a wroko tra fasi, Stephen lasi en wroko. A e taki: „Mi nanga mi osofamiri ben broko saka srefisrefi. Mi ben lasi-ati, mi ben mandi èn mi ben frede fu di mi no ben sabi san ben o pasa.”

Den sani disi e pasa na ala sei. Den ekonomia problema na grontapu, e meki taki milyunmilyun sma di ben abi wan bun wroko, lasi den wroko. Furu fu den di ben man feni wan wroko baka, no e kisi so furu moni moro, aladi sani e kon diri dei fu dei. Awansi wan kondre gudu noso pôti, den alamala e firi fa na ekonomia e go na baka.

Teki koni bosroiti

Te wi no e wroko so furu moni moro noso te wi lasi wi wroko, dan wi kan broko saka makriki. A tru taki wan sma e broko en ede son tron. Ma wan koni man ben taki wan leisi: „Yu e firi brokosaka te nowtu miti yu? Efu dati de so, dan yu no o abi furu krakti” (Odo 24:10). Na presi fu bruya tumusi te na ekonomia e go na baka, wi musu du san Gado Wortu e taigi wi: „Poti koni na wan sei.”​—Odo 2:7.

Aladi Bijbel a no wan buku di e leri sma fa fu wroko nanga moni, toku a abi bun rai di yepi milyunmilyun sma na heri grontapu fu gebroiki den moni moro bun. Meki wi go luku wan tu prenspari rai di Bijbel e gi wi.

Teri den kostu. Luku san Yesus taki na ini Lukas 14:28: „Suma fu unu di wani bow wan toren, no sa go sidon fosi fu teri den kostu, so taki a kan si efu a abi nofo moni fu klari a wroko?” A rai disi e leri wi fa wi kan bosroiti na fesi omeni moni wi o gebroiki èn wi musu hori wisrefi na dati. Ma Obed e taki dati disi no de so makriki: „Fosi mi lasi mi wroko, wi ben gwenti bai furu sani di wi no ben abi fanowdu trutru. Fu di wi ben abi nofo moni fu bai iniwan sani di wi ben wani, meki noiti wi ben luku na fesi fa wi o gebroiki a moni.” Te sma e du disi, dan den o de seiker taki a pikinso moni di den abi now, o de soso gi den sani di na osofamiri abi fanowdu trutru.

Kenki a fasi fa yu ben gwenti libi. A tru taki a no makriki fu kon gwenti wan libi pe yu no o man bai so furu sani moro leki fosi, ma toku a bun fu kon gwenti so wan libi. Stephen e taki: „Fu man abi nofo moni, mi nanga mi osofamiri ben musu froisi go na wi  eigi oso di ben moro pikin èn di no ben abi ala sani na ini. Den pikin ben abi fu go na wan skoro di no ben diri so, ma pe den ben kan kisi bun leri ete.”

Efu yu wani taki na osofamiri kon gwenti a nyun libi fu den, dan a de prenspari fu taki bun nanga den. Austin, di wroko neigi yari langa gi wan bangi fosi a lasi en wroko, e taki: „Mi nanga mi wefi go sidon luku sortu sani wi ben abi fanowdu trutru. Wi no ben man bai diri nyanyan-sani nanga nyun krosi moro di wi no ben abi fanowdu èn wi no ben man teki diri fakansi tu. Mi breiti taki na osofamiri fu mi no ben si den kenki disi leki wan bigi problema.” Kande yongu pikin no o frustan ala ten fu san ede den kenki disi de fanowdu, ma papa nanga mama kan yepi den fu frustan dati.

De klariklari fu du tra sortu wroko. Efu yu ben gwenti du kantorowroko, dan kande a no o makriki fu du tranga wroko. Austin e taki: „Fu di mi ben de wan basi fosi fu wan bigi bisnis, meki a ben muilek gi mi fu du wan wroko di sma ben e si leki lagi wroko.” Disi no musu fruwondru wi fu di Bijbel e taki na ini Odo 29:25: „Te yu frede libisma, dan dati o de wan trapu gi yu.” Efu yu e prakseri nomo san tra sma o denki fu yu, dan yu no o feni a moni fu sorgu gi yu osofamiri. San kan yepi yu fu si sani na a yoisti fasi?

Yu musu abi sakafasi. Baka di Obed lasi en wroko na a hotel, dan wan sma di ben wroko nanga en fosi, aksi en fu kon wroko gi en na wan presi pe den e meki wagi. A ben abi fu waka fara na tapu doti pasi fu man bai ferfi nanga tra sani gi wagi. Obed e taki: „Mi no ben lobi a wroko, ma wan moro betre wroko no ben de fu du. Sakafasi yepi mi fu kon gwenti wan wroko pe a moni no ben doro wan di fu fo pisi srefi fu a moni di mi ben wroko fosi. Ma a moni ben sari fu sorgu mi osofamiri.” Te so wan sani miti yu, dan yu kan leri wan sani?

Leri fu breiti nanga san yu abi. Wan sma di breiti nanga san a abi, na wan sma di de koloku èn di no e feti fu kisi moro. Kande disi muilek fu frustan gi wan sma di no abi furu moni. Ma luku san na apostel Paulus, wan zendeling di ben sabi san a wani taki fu no abi furu, e skrifi: „Mi ben leri fu breiti nanga san mi abi, awansi fa sani e waka gi mi. Mi sabi san a wani taki fu abi pikinso nomo èn san a wani taki fu abi bun furu.”​—Filipisma 4:11, 12.

Kande a libi fu wi ben o de moro bun, ma na ini a ten disi pe sani e kenki so esi, a libi ben kan de moro ogri tu. Wi kan kisi furu wini te wi e teki a rai fu Paulus di a skrifi nanga yepi fu santa yeye. A ben taki: „A tru taki wan sma e kisi furu wini te a e dini Gado fayafaya, ma dati o pasa soso te a breiti nanga san a abi. Sobun, efu wi abi nyanyan, krosi nanga wan presi fu tan, dan wi musu breiti nanga den sani disi.” Paulus no ben gi wi deki-ati fu tron lesiman, ma a ben sori taki wi no musu poti tumusi furu prakseri na sani di wi abi fanowdu fu sorgu wisrefi.​—1 Timoteyus 6:6, 8.

Fa wan sma kan de koloku trutru?

A no te wi e bai ala sani di wi wani noso te wi e libi wan switi libi, dan wi o de koloku trutru. Na Yesus srefi ben taki: „Wan sma sa de moro koloku te a e gi sani, leki te a e kisi sani.” Iya, te wi e prati san wi abi nanga trawan èn te wi e gi den deki-ati, dan wi o de koloku èn wi no o suku moro leki san wi abi fanowdu.​—Tori fu den apostel 20:35.

Yehovah Gado, a Mekiman fu wi, sabi heri bun san wi abi fanowdu. Na ini Bijbel a gi bun rai di yepi furu sma fu libi wan moro bun libi èn fu no broko den ede so furu moro nanga sani di no de so prenspari. Hori na prakseri taki na ekonomia situwâsi fu wan sma no o kenki wantronso. Ma Yesus ben gi wi a dyaranti taki den sma di e tan „suku fosi a Kownukondre nanga Gado en retidu”, o kisi ala den sani di den abi fanowdu ibri dei.​—Mateyus 6:33.