Wan boskopu di e meki sma kisi têgo libi

„Efu sma wani kisi têgo libi, den musu leri sabi yu, a wan-enkri tru Gado, èn a sma di yu seni kon, Yesus Krestes.”​—YOHANES 17:3.

SABI kan kibri wan sma libi. Nouhou ben abi tin mun di a kon siki, ma en mama, di e yepi sikisma na ini a kondre Niger, ben sabi san fu du. A moksi sukru nanga sowtu na ini krin watra èn a gi en boi fu dringi. Na organisâsi fu den Verenigde Nâsi di e luku den reti fu pikin-nengre taki dati „fu di a yepi a pikin wantewante èn fu di a ben sabi pikinso fu datratori, meki a pikin fu en no siki langa”.

Te sma sabi Bijbel, dan dati kan kibri den libi. Moses, a fosi Bijbel skrifiman, taki: „Un no musu si den sani di mi e taki, leki soso sani, bika den o meki unu tan na libi” (Deuteronomium 32:47). Bijbel kan meki wi libi moro langa trutru? Fa a kan meki wi tan na libi?

Den fosi feifi artikel ben sori wi taki nowan tra buku de leki Bijbel. A abi profeititori di e kon tru ala ten, a e taki soifri fa sani pasa na ini a historia èn a e kruderi nanga sabidensi. Boiti dati, ala den buku fu Bijbel de wán èn den e gi bun rai. Disi e sori wi taki Bijbel na wan spesrutu buku. Sobun, te Bijbel e taki dati wi kan libi moro langa, noso fu têgo, dan a ben o bun fu luku a tori disi finifini.

Wi wani gi yu deki-ati fu leri fa soifri sabi fu Bijbel kan meki yu firi korostu now èn fa a kan meki yu de koloku na ini a ten di e kon. Yehovah Kotoigi o breiti fu sori yu fa yu kan kisi a sabi disi.

[Faki/​Prenki na tapu bladzijde 9]

Bijbel na wan spesrutu buku tu, fu di en wawan e gi bun piki na tapu prenspari aksi:

• Fu san ede wi dya?

• Fu san ede so furu sma e pina?

• Howpu de gi wi lobiwan di dede?

Na ini a buku disi, San Bijbel e leri wi trutru?, di yehovah Kotoigi tyari kon na doro, yu kan feni a piki di Bijbel e gi na tapu den aksi disi.