Fu san ede a sma di e arki begi e gi pasi taki pina de?

ALADI son sma e begi, toku den e tweifri taki Gado de. Fu san ede den e tweifri? Kande fu di den e si furu pina na ini a grontapu disi. Yu aksi yusrefi kaba fu san ede Gado e gi pasi taki pina de?

A de so trutru taki Gado meki libisma leki fa den de now? A ben wani taki den ben musu sondu èn taki den ben musu pina? Wi no ben o lespeki wan gado di wani taki libisma e pina. Ma luku a sani disi: Kon meki wi taki dati yu ben o waka lontu wan nyun wagi di yu feni moi. Te yu kon si taki a bakasei fu a wagi krabu, dan yu ben o taki dati a fabriki meki a wagi so? Kwetikweti! Yu ben o taki dati a fabriki meki a wagi heri bun èn taki wan sma, noso wan sani krabu a wagi.

Na so a de tu te wi e luku a moi fasi fa den sani na wi lontu seti èn fa den meki. Te wi e agersi en nanga a fasi fa libisma tyari soso bruya nanga pori kon, dan san wi e si? Bijbel e leri wi taki Gado meki a fosi man nanga uma sondro fowtu, ma bakaten densrefi sorgu taki sani no waka bun nanga den (Deuteronomium 32:4, 5). Ma koloku taki Gado pramisi fu meki sani kon bun baka. A o meki den libisma di e gi yesi na en, kon de sondro fowtu. Ma fu san ede a wakti so langa?

Fu san ede a teki so langa?

Disi abi fu du nanga na a tori di musu sori wi suma abi a reti fu tiri libisma. Noiti Yehovah ben wani taki libisma tiri densrefi. En ben o de a Tiriman fu den. Bijbel srefi e taki: „A no de na wan libisma di e waka fu taki srefi pe a o poti en futu” (Yeremia 10:23). A sari fu taki dati den fosi libisma bosroiti fu opo densrefi teige a tiri fu Gado. Na a kruktudu  fu den, meki taki den tron sondusma (1 Yohanes 3:4). A bakapisi ben de taki den ben abi sondu èn taki sani no waka bun gi den èn gi den bakapikin fu den.

Dusundusun yari Yehovah meki libisma tiri densrefi èn a kon na krin taki libisma no man du dati. Disi e sori taki ala libisma tirimakti e meki sma pina. Nowan fu den ben man puru feti, ogridu, kruktudu noso siki.

Fa Gado o meki sani kon bun baka?

Bijbel e pramisi wi taki dyonsro Gado o tyari wan nyun grontapu kon pe retidu o de (2 Petrus 3:13). Soso den wan di teki a bosroiti fu sori lobi gi tra sma èn gi Gado o kisi primisi fu libi drape.​—Deuteronomium 30:15, 16, 19, 20.

Bijbel e taki tu dati esi-esi ’a dei o doro taki Gado o krutu’ den sma di e tyari pina kon èn a o puru pina (2 Petrus 3:7). Baka dati Yesus Krestes di Gado poti leki tiriman o tiri ala libisma di e gi yesi na Gado (Danièl 7:13, 14). San a tiri fu Yesus o du? Bijbel e taki: „Den safri-ati sma o kisi grontapu èn den o prisiri srefisrefi, fu di freide o de pasa marki.”​—Psalm 37:11.

Yesus, di de Kownu na hemel, o puru ala ogri sani soleki siki nanga dede. Sma no o kon owru moro èn den no o opo densrefi moro teige Yehovah, „a sma di e gi libi” (Psalm 36:9). Yesus o yepi ala den sma di e teki a lobi-ati tiri fu en. Leki tiriman a o meki den pramisi disi fu Bijbel kon tru:

▪ „Nowan sma di e tan na ini a kondre o taki: ’Mi siki.’”​—Yesaya 33:24.

▪ „[Gado] o figi ala watra puru na den ai  èn dede no o de moro. Nowan sari, noso krei, noso pen no o de moro. Den fositen sani pasa kaba.”​—Openbaring 21:4.

A e trowstu wi fu sabi taki dyonsro Gado o du san a pramisi fu du. A o puru ala pina. Sobun, wi kan de seiker taki a e arki den begi fu wi, awinsi a e gi pasi nownowde taki pina de.

Iya, Gado de. A kan yere yu, srefi te yu e taki fu yu problema nanga yu broko-ede. A wani taki yu e libi na ini wan ten pe yu no o tweifri moro èn pe yu no o abi problema moro.