Suma na a sma di e arki begi?

EFU wan sma de di e arki begi, dan wi kan frustan taki a musu fu de a Mekiman. Suma boiti a sma di meki na edetonton fu libisma man sabi san yu e prakseri? Wan tra sma de di kan gi wan piki na tapu begi noso di kan gi libisma san den abi fanowdu? Kande yu e aksi yusrefi: ’Na wan koni sani fu bribi na ini wan Mekiman?’

Furu sma e denki taki te yu e bribi na ini wan Mekiman, dan yu no musu bribi san disiten sabiman e taki. Ma a no tru taki wan sma di e bribi na ini Gado, no musu bribi sabiman. Poti prakseri na den sani di e kon now:

▪ No so langa pasa, den poti aksi gi 1646 professor na 21 universiteit fu Amerkankondre èn den kon si taki 550 fu den professor disi nomo ben taki dati den no e bribi na ini Gado.

Disi e sori wi taki furu sabiman e bribi taki Gado de.

Buweisi e sori taki wan Mekiman de

Wi abi fu bribi taki wan sma de di e arki den begi fu wi, sondro taki wi abi buweisi fu disi? Kwetikweti. A no tru taki te wan sma e bribi, dan a no abi buweisi fanowdu. Bijbel e taki dati bribi na „a krin buweisi fu sani di de trutru, ma di wi no man si” (Hebrewsma 11:1). Wan tra Bijbel e taki dati bribi na „da bewijs foe dem sani wi no si” (Da Bijbel na ini Sranantongo). Fu eksempre, yu no man si stroom, ma te yu e leti radio, dan dati e buweisi taki stroom de. Na so a de tu nanga a sma di e arki begi. Aladi wi no man si en, toku wi man si den buweisi di e sori wi taki a musu fu de.

Pe wi kan feni buweisi taki Gado de? San  wi musu du nomo na fu luku den sani na wi lontu. Bijbel e taki disi: „Iya, ibri oso abi wan sma di meki en, ma a sma di meki ala sani na Gado” (Hebrewsma 3:4). Yu e agri nanga a sani di skrifi dyaso? Luku a fasi fa den planeiti nanga den stari seti èn a fasi fa a libi bigin. Luku fa na edetonton fu libisma meki, di de a moro dangra sani. Te yu luku den sani disi, dan yu musu fu agri taki wan moro hei sani leki libisma de.

Ma den sani di wi e si na wi lontu no man leri wi ala sani fu Gado. Te yu e luku den buweisi di e sori taki Gado na a Mekiman, dan a de neleki te yu e sidon na baka wan doro di tapu èn yu e yere wan sma e waka kon. Yu sabi taki wan sma drape, ma yu no sabi suma na en. Efu yu wani sabi suma na en, dan yu musu opo a doro. Wan srefi sortu sani wi musu du tu te wi wani sabi suma na a sma di meki ala sani.

Bijbel de leki wan doro di wi musu opo fu kon sabi suma na Gado. Te yu opo a doro dati èn yu e luku wan tu fu den profeititori di kon tru finifini, dan yu o kisi buweisi taki Gado de. * Boiti dati, den tori di e fruteri wi san Gado du gi libisma, e sori wi fa a Gado disi de di e arki begi.

Fa a sma de di e arki begi?

Bijbel e sori taki a Gado di e arki begi, na wan trutru sma di yu kan kon sabi èn wi sabi taki na soso wan sma kan frustan den firi fu wi te wi e taki nanga en. Wi e kisi deki-ati te wi e leisi: „Yu na a sma di e arki begi. Na yu  ala sortu sma o kon suku yepi” (Psalm 65:2). Gado e yere den sma di e begi en nanga bribi èn a abi wan nen. Bijbel e taki: „Yehovah de fara fu den ogriwan, ma a e yere den begi fu den reti-ati sma.”​—Odo 15:29.

Yehovah abi firi. En na „a Gado fu lobi” èn Bijbel e kari en „a koloku Gado” (2 Korentesma 13:11; 1 Timoteyus 1:11). Wan ten ben de taki libisma ben du furu ogri. Bijbel e taki fa Gado ben e firi: „A ben e sari srefisrefi” (Genesis 6:5, 6). Sma e taki dati Gado e tesi libisma, ma disi no tru. Bijbel e taki: „A no tru kwetikweti taki Gado e du ogri!” (Yob 34:10) Ma kande yu e aksi yusrefi: ’Efu Gado na a almakti Mekiman, dan fu san ede a e meki sma pina ala ten baka?’

Yehovah gi libisma na okasi fu teki den eigi bosroiti. Disi e sori wi sortu Gado a de. Wi no breiti taki a gi wi na okasi fu bosroiti fa wi o libi? Ma a sari fu taki dati furu sma no e gebroiki na okasi disi na wan bun fasi. Fu dati ede den e pina èn den e meki trawan e pina tu. Poti prakseri now na wan prenspari aksi: Fa Gado kan puru pina sondro fu meki sma lasi na okasi fu teki den eigi bosroiti? Na ini a tra artikel wi o luku na aksi disi.

[Futuwortu]

[Faki na tapu bladzijde 5]

Na kerki e meki yu tweifri?

A sari fu si taki kerki e meki taki furu sma e tweifri taki wan sma de di e arki begi èn di abi sari-ati. Fu di kerki horibaka gi orloku, gi ogri-ati sani di sma du fu gens tirimakti èn fu di den e gi pasi taki sma e du ogri nanga pikin-nengre, meki furu sma di abi a gwenti fu begi e taki dati den no e bribi na ini Gado.

Fu san ede a de so taki furu leisi kerki e meki sma du ogri? We, na fu di ogrisma du ogri sani na ini a nen fu kerki. Bijbel ben e taki dati takru-ati sma ben o teki a Kresten bribi abra èn den ben o du sani di no e kruderi nanga Gado wani. Na apostel Paulus ben taigi den Kresten owruman: „Sma na un mindri o taki sani di no tru, fu hari den disipel kon na den baka.”​—Tori fu den apostel 20:29, 30.

Gado e tegu gi falsi bribi. Iya, Gado Wortu e sori taki falsi kerki meki taki „a brudu fu ala den wan di sma kiri na grontapu” fadon (Openbaring 18:24). Kerki no leri sma suma na a tru Gado di de wan Gado fu lobi. Dati meki Gado feni taki den kerki disi abi brudu-paiman.​—1 Yohanes 4:8.

A sma di e arki begi e prakseri den sma di falsi kerki e kwinsi. Fu di Gado lobi libisma, meki dyonsro a o meki Yesus krutu ala den kerkiman di e hoigri. Yesus ben taki: „Furu sma o taigi mi na a dei dati: ’Masra, Masra, a no na ini yu nen wi ben taki profeititori? . . . Toku mi o taigi den krin: Mi no sabi unu kwetikweti! Komoto na mi tapu, un ogriman.”​—Mateyus 7:22, 23.