„Te unu e begi, un musu taki: ’Tata’”

San yu e prakseri te yu e yere a wortu tata noso papa? Yu e prakseri wan man di lobi en osofamiri èn di e broko en ede nanga den, noso yu e prakseri wan man di no e sorgu bun gi en osofamiri èn di e fon den srefi? A fasi fa yu e denki fu a tori disi abi fu du nanga a fasi fa yu papa ben de.

„TATA” na wan wortu di Yesus ben gwenti gebroiki te a ben e taki nanga Gado, noso te a ben e taki fu en. * Di a ben leri den bakaman fu en fu begi, dan a ben taki: „Te unu e begi, un musu taki: ’Tata’” (Lukas 11:2). Ma sortu papa Yehovah de? A piki na tapu na aksi disi prenspari srefisrefi. Fu san ede? O moro wi e kon frustan sortu papa Yehovah de, o moro wi wani de krosibei fu en èn o moro wi o lobi en.

A wan-enkri sma di kan fruteri wi ala sani fu wi hemel Tata, na Yesus di ben abi wan bun matifasi nanga en. Yesus ben taki: „Nowan sma sabi a Tata trutru, boiti a Manpikin  nanga den sma di a Manpikin wani fu den kon sabi a Tata” (Mateyus 11:27). Sobun, a Manpikin na a moro bun sma di kan meki wi kon sabi a Tata.

San Yesus kan leri wi fu wi hemel Tata? Luku san Yesus srefi ben taki: „Gado ben lobi grontapu so te, taki a gi en wan-enkri Manpikin, so taki ala sma di e bribi na ini en no sa dede, ma sa kisi têgo libi” (Yohanes 3:16). Dyaso Yesus e sori taki lobi na a moro prenspari fasi fu wi hemel Tata (1 Yohanes 4:8). Na difrenti fasi Yehovah e sori a lobi fu en. A e sori taki a feni wi bun, a abi sari-ati nanga wi, a e kibri wi èn a e piri-ai gi wi te dati de fanowdu.

A Tata feni wi bun

Pikin-nengre e kisi deki-ati te den papa nanga mama feni den bun. Prakseri fa Yesus kisi deki-ati di a yere en Tata taki: „Disi na mi Manpikin, a lobiwan di mi feni bun” (Mateyus 3:17). Yesus fu en sei e gi wi a dyaranti taki a Tata lobi wi èn taki a feni wi bun. A ben taki: „Mi Tata o lobi a sma di lobi mi” (Yohanes 14:21). Den wortu disi de wan trowstu trutru. Ma wan sma de di no wani taki wi kisi a trowstu disi.

Satan e pruberi fu meki wi tweifri taki wi hemel Tata feni wi bun. A wani meki wi bribi taki wi no bun nofo fu dati. Nofo tron a e du disi te wi swaki, te wi siki, te wi owru, te wi lasi-ati fu di wi meki fowtu noso te wan sma hati wi. Luku a tori fu wan man di nen Lucas di ben abi a firi taki Gado no feni en bun. Lucas e fruteri taki di a ben yongu, en papa nanga mama kenki den heri libi èn den no ben du den bun sani moro di den ben leri en. Kande na fu dati ede a ben muilek gi en fu tron wan mati fu en hemel Tata. Boiti dati, Lucas ben gwenti du sani sondro fu denki. Nofo tron a ben kisi problema fu a sani disi, spesrutu nanga trawan. Ma en wefi di a e si leki wan bigi blesi fu Gado, ben abi pasensi nanga en èn a ben gi en deki-ati. Safrisafri a yepi Lucas fu basi a swakifasi fu en. Lucas kon si taki „Krestes Yesus kon na grontapu fu frulusu sondari” (1 Timoteyus 1:15). A e taki dati di a prakseri fu a lobi fu Gado èn taki Gado feni en bun, a ben firi moro koloku èn a ben de tevrede.

Te yu e tweifri son leisi efu Yehovah man lobi yu, noso feni yu bun, dan yu kan kisi deki-ati te yu e leisi Romesma 8:31-39 èn e denki dipi fu den tekst disi. Na wan lobi-ati fasi na apostel Paulus e fruteri wi taki nowan sani kan „prati wi fu a lobi fu Gado, di wi Masra Krestes Yesus abi tu”. *

Wan Tata di abi sari-ati

Wi hemel Tata sabi heri bun fa wi e pina. En na wan Gado di abi „trutru sari-ati” (Lukas 1:78). Nanga den sani di Yesus du, a ben sori taki en Tata abi sari-ati gi sondu libisma (Markus 1:40-42; 6:30-34). Tru Kresten e meki muiti tu fu abi sari-ati neleki a hemel Tata fu den. Den e gi yesi na a Bijbel rai fu „sori switifasi gi makandra èn [fu] abi sari-ati nanga makandra”.​—Efeisesma 4:32.

Luku a tori fu wan man di nen Felipe. Wan dei di a ben de na pasi fu go na wroko, a firi wan hebi pen neleki wan sani dyuku en na en baka. Esi-esi den tyari en go na ati-oso. Baka di datra ondrosuku en sowan aiti yuru, den kon si taki a bigi brudutitei fu en ati priti. Den ben taki dati ten no ben de moro fu du wan oparâsi fu di a ben abi soso 25 miniti fosi a ben o dede.

Wan tu fu den Kresten brada fu Felipe ben de drape èn fu di den ben sari en, meki den du wan sani wantewante. Esi-esi den sreka sani fu tyari en go na wan tra ati-oso pe datra koti en. Den tan nanga en teleki na oparâsi kaba. Koloku taki Felipe no dede. Te  Felipe e denki baka san ben pasa, dan a de nanga tangi taki den Kresten brada fu en ben sori sari-ati gi en. Ma a sabi taki na en hemel Tata meki den brada disi sori sari-ati. A e taki: „A ben gersi leki Gado, di de leki wan lobi-ati papa, ben tanapu na mi sei fu gi mi krakti.” Iya, nofo tron Yehovah e sori sari-ati gi wi fu di a e meki en futuboi na grontapu sori sari-ati tu.

Wi Tata e kibri wi

Son leisi wan pikin e lon go suku kibri na en papa te a e si taki ogri o miti en. Te a papa e brasa en pikin hori fu di a lobi en, dan a pikin no e frede moro. Yesus ben sabi taki Yehovah ben o gi en kibri (Mateyus 26:53; Yohanes 17:15). Wi no abi fu frede tu, fu di a hemel Tata e kibri wi. Yehovah e du dati na a fosi presi te a abi fu du nanga na anbegi fu wi. Sobun, a e sorgu taki a bribi fu wi no e kon swaki so taki wi o man wai pasi gi ogri èn wi o man tan de wan bun mati fu en. Wan fasi fa a e kibri wi na fu di a e sorgu taki wi e kisi rai fu Bijbel. Te wi e kisi a rai disi, dan a de neleki Yehovah e waka na wi baka èn e taki: „Disi na a pasi. Waka na tapu.​—Yesaya 30:21.

Luku a tori fu Tiago nanga en brada Fernando nanga Rafael di ben de memre fu wan pokugrupu. Den ben breiti di sma aksi den fu prei na ini wan fu den moro pôpi gebow fu São Paulo, Brasyonkondre, pe sma e prei poku. A gersi leki den ben o meki en leki pokuman. Ma wan Kresten brada warskow den taki sani no ben o waka bun efu den ben o moksi nanga sma di no ben e lespeki a pasi fu Gado (Odo 13:20). A sori den o prenspari a Bijbel rai disi de. Ne a fruteri san miti en eigi brada. Di en brada moksi nanga takru mati, a go du sani di no bun. Tiago nanga den brada fu en teki a bosroiti fu no prei poku moro gi moni. Now den ala dri e gebroiki furu fu den ten gi a Kresten diniwroko. Den e bribi taki a rai na ini Gado Wortu kibri den so taki a matifasi fu den nanga Gado no pori.

Wi hemel Tata e piri-ai gi wi

Wan lobi-ati papa e piri-ai son leisi gi den pikin fu en fu di a wani taki den tron bun sma (Efeisesma 6:4). So wan papa e strafu en pikin te dati de fanowdu, ma noiti a e du dati na wan grofu fasi. Na so wi hemel Tata kan feni en fanowdu son leisi fu strafu wi. Ma ala ten a e strafu wi na wan lobi-ati fasi. Noiti a e du dati na wan ogri-ati fasi. Neleki en Tata, na so Yesus no ben grofu tu, srefi te den disipel fu en no ben arki wantewante te  a ben e piri-ai gi den.​—Mateyus 20:20-28; Lukas 22:24-30.

Luku a tori fu Ricardo di ben warderi en taki Yehovah ben piri-ai gi en na wan lobi-ati fasi. Ricardo en papa gowe libi en di a ben abi seibi mun nomo. Di a tron wan tini, a ben misi wan papa na ini en libi. Dati meki a go du ogri sani èn en konsensi bigin fon en. A ben kon frustan taki en libi no ben kruderi nanga a fasi fa wan Kresten musu tyari ensrefi. Sobun, a bosroiti fu go taki nanga den owruman na a gemeente pe a ben e go. Na wan lobi-ati fasi den owruman gi en krakti rai fu Bijbel. Ricardo ben warderi a piri-ai, ma te a ben prakseri den ogri di a ben du fosi, dan a ben hebi gi en. A no ben man sribi te neti, a ben krei watra-ai èn a ben e lasi-ati. Bakaten a kon frustan taki aladi Yehovah ben piri-ai gi en, toku a ben lobi en ete. Ricardo ben memre san skrifi na ini Hebrewsma 12:6: „Yehovah e strafu a sma di a lobi.”

A bun fu hori na prakseri taki te wi e kisi piri-ai, dan disi no wani taki dati wi e kisi strafu fu wan ogri di wi du. Bijbel e sori tu taki piri-ai abi fu du nanga leri. Sobun, wi lobi-ati hemel Tata kan strafu wi, fu di a e meki wi firi den takru bakapisi fu den fowtu fu wi wan pisi ten. Toku Bijbel e sori wi taki te a e strafu wi, dan a e gi wi leri tu èn a e yepi wi fu du san reti (Hebrewsma 12:7, 11). Iya, wi Tata wani taki sani e go bun nanga wi èn a e piri-ai gi wi fu a bun fu wi.

Wi Tata e gi wi san wi abi fanowdu

Wan lobi-ati papa e meki muiti fu sorgu taki en osofamiri e kisi san den abi fanowdu. Na so a de tu nanga Yehovah. Yesus e taki: „Un Tata na hemel sabi taki unu abi ala den sani disi fanowdu” (Mateyus 6:25-34). Yehovah e pramisi: „Mi no o libi yu kwetikweti èn noiti mi o gowe fu yu.”​—Hebrewsma 13:5.

Di Nice en masra lasi en wroko, dan na uma disi kon si taki a tekst disi tru. Didyonsro a ben gowe libi en wroko di ben pai bun. A ben du disi so taki a ben kan abi moro ten gi den tu umapikin fu en èn gi a preikiwroko. Fa den ben o libi now? Nice begi Yehovah. A dei na en baka, en masra go na en wrokope fu go teki den sani fu en. Ne a masra fruwondru di en basi taigi en taki a ben abi wan tra wroko gi en. Sobun, a wán dei Nice en masra lasi en wroko èn a tra dei a feni wan wroko baka. Nice nanga en masra e taigi den hemel Tata tangi taki a meki sani waka bun gi den. Na ondrofenitori fu den e memre wi taki noiti wi lobi-ati Gado Yehovah, di e sorgu wi, e frigiti den futuboi fu en di e gi yesi na en.

Warderi a lobi fu wi Tata

Iya, wi no man kaba taki fu a moi fasi fa wi hemel Tata e sori wi lobi. Soleki fa wi ben si, dan a e sori a lobi fu en leki wan papa na difrenti fasi: A e feni wi bun, a abi sari-ati gi wi, a e kibri wi, a e piri-ai gi wi èn a e gi wi san wi abi fanowdu. Trutru wi kan taki dati Yehovah na a moro bun Papa di de.

Fa wi kan sori taki wi e warderi a lobi fu wi hemel Tata? Wi kan meki muiti fu leri moro fu en èn fu den sani di a o du (Yohanes 17:3). Wi kan libi soleki fa a wani (1 Yohanes 5:3). Na a fasi fa wi e libi nanga sma, wi kan sori a lobi fu en (1 Yohanes 4:11). Na ala den fasi disi wi kan sori taki wi e si Yehovah leki wi Tata èn taki wi feni en wan grani fu de en pikin.

[Futuwortu]

[Prenspari pisi na tapu bladzijde 19]

O moro wi e kon frustan sortu papa Yehovah de, o moro wi wani de krosibei fu en èn o moro wi o lobi en

[Prenspari pisi na tapu bladzijde 22]

Wi kan sori taki wi e si Yehovah leki wi Tata èn taki wi feni en wan grani fu de en pikin

[Faki/​Prenki na tapu bladzijde 21]

YEHOVAH E SORI EN LOBI LEKI TATA NA DIFRENTI FASI

A FENI WI BUN

A ABI SARI-ATI

A E KIBRI WI

A E PIRI-AI GI WI

A E SORGU WI