Wan sma de di e arki begi?

„Fosi, mi ben e tweifri taki Gado de. Ma toku mi ben e begi son leisi. Mi no ben sabi efu wan sma ben e arki, ma mi ben e howpu taki dati ben de so. Mi no ben firi koloku èn mi no ben sabi san fu du nanga mi libi. Mi ben frede fu bribi na ini Gado, fu di mi ben denki taki soso swaki sma e bribi na ini Gado.”​—PATRICIA, * IERLAND.

YU E frustan fa Patricia e firi? Yu e begi Gado, aladi yu e tweifri taki a de? We, a no yu wawan e tweifri. Poti prakseri na a sani disi:

▪ Sma ben poti aksi gi 2200 Ingrisisma èn den kon si taki sowan 500 fu den ben e bribi taki wan Gado de di meki grontapu èn di e arki den begi fu den. Ma fu den 2200 sma disi moro leki 1200 e begi wawan leisi.

▪ Den poti aksi gi 10.000 sma fu difrenti kondre èn furu fu den ben taki dati den no e bribi na ini wan gado. Ma toku moro leki 3000 fu den e begi.

Fu san ede den e tweifri?

Allan, wan Ingrisiman, e taki: „Mi ben gwenti taki dati mi no e bribi na ini Gado, fu di mi ben denki taki kerki ben de fu basi sma èn fu meki moni. Mi ben denki tu taki efu wan Gado de, dan sma no ben o du someni ogri. Ma son leisi te mi ben sidon mi wawan, dan mi ben e taki nanga ’wan sma’. Mi ben e aksi misrefi fa a du kon taki mi de.”

Ibri sma di e denki so, sabi fu san ede a e tweifri efu den begi fu sma e kisi piki. Furu leisi sma e tweifri fu di den no e kisi piki na tapu aksi leki den wan di e kon now:

▪ Wan Mekiman de?

▪ Fu san ede kerki e tyari so furu problema kon?

▪ Fu san ede Gado e gi pasi taki sma e pina?

Efu yu ben o sabi a piki na tapu den aksi disi, dan kande yu no ben o tweifri moro fu begi.

[Futuwortu]