Wan takimakandra nanga wan birtisma​—Ala bun sma e go na hemel?

YEHOVAH KOTOIGI lobi fu taki fu Bijbel nanga den birtisma fu den. Wan sani de di yu wani kon sabi fu Bijbel? Yu e aksi yusrefi fu san ede Yehovah Kotoigi e bribi noso e du son sani? Efu dati de so, dan yu no musu frede fu taki fu a tori dati nanga wan Kotoigi te yu miti wan fu den. A o de klariklari fu taki nanga yu fu a tori dati.

A pisi tori di e kon now, na wan takimakandra di wan Kotoigi fu Yehovah ben kan abi nanga wan birtisma. Kon meki wi taki dati wan Kotoigi di nen Marcus kon na a oso fu wan man di nen Robert.

San den sma di o go na hemel o go du drape?

Marcus: Te yu e prakseri a tamara, dan yu denki taki sani o kon moro bun, noso taki den o kon moro ogri, noso yu denki taki sani o tan leti so?

Robert: Mi denki taki sani o kon moro bun. Mi abi a howpu fu go na hemel fu kan de nanga Masra.

Marcus: Dati na wan moi howpu. Furu tron Bijbel e sori wi fa hemel de èn taki a de wan grani fu go drape. Ma yu prakseri kaba san den sma di o go na hemel o du drape?

Robert: Wi o de nanga Gado èn wi o prèise en fu ala ten.

Marcus: Dati na wan moi sani trutru. A moi fu si taki Bijbel no e taki nomo fu den grani di den sma di o go na hemel o kisi, ma a e taki tu fu wan prenspari frantwortu di den o abi.

Robert: San na dati?

Marcus: Na a frantwortu di Openbaring 5:10 e taki fu en. Na ini a tekst dati skrifi: „Na yu [Yesus] meki den tron wan Kownukondre èn yu meki den tron priester gi wi Gado èn den o tiri grontapu leki kownu.” Robert, yu si sortu frantwortu den wan di o go na hemel o abi?

Robert: A tekst e taki dati den o tiri grontapu leki kownu.

Marcus: Dati na wan moi prakseri, a no so?

Suma den o tiri?

Marcus: We, yu no e agri taki efu den sma di o go na hemel o tiri leki kownu, dan sma musu de di den o tiri, a no so? Te yu luku en bun, dan efu wan kondre abi wan tirimakti, ma nowan tra sma e tan na ini a kondre, dan a tirimakti de fu soso.

Robert: Ai, mi e frustan san yu wani taki.

Marcus: Sobun, wi kan aksi wisrefi: Suma den sma di o go na hemel o tiri?

Robert: Mi denki taki den o tiri den sma na grontapu di no dede èn di no go na hemel ete.

 Marcus: Dati ben o de wan bun sani efu ala bun sma ben o go na hemel. Ma wan tra sani de di wi kan luku. A kan de so taki son bun sma no o go na hemel?

Robert: Noiti mi yere taki Kresten e bribi a sani dati.

Marcus: Mi e aksi yu dati fu di wan moi sani skrifi na ini Psalm 37:29. Yu ben o wani leisi a tekst dati, grantangi?

Robert: A bun. A e taki: „Na den reti-ati sma o kisi grontapu èn fu têgo den o tan libi drape.”

Marcus: Grantangi. Yu si pe furu bun sma o libi?

Robert: A tekst e taki dati den o tan na grontapu.

Marcus: Soifri. Den no o tan wan syatu pisi ten nomo. Luku san a tekst e taki: „Fu têgo den o tan libi drape.”

Robert: Kande dati wani taki dati bun sma o de na grontapu ala ten. Te wi dede èn wi e go na hemel, dan tra bun sma di gebore e teki wi presi.

Marcus: Kande furu sma ben o fruklari a tekst disi so. Ma a kan taki a e sori wi wan tra sani? A kan taki a e sori wi taki bun sma o libi fu têgo na grontapu?

Robert: Mi no de seiker efu mi e frustan san yu wani taki.

Wan Paradijs o kon na grontapu

Marcus: We, luku san wan tra pisi fu Bijbel e taki fu a libi na grontapu na ini a ten di e kon. Meki wi leisi Openbaring 21:4. Disi na san a tekst e taki fu sma di o libi na a ten dati: „A o figi ala watra puru na den ai èn dede no o de moro. Nowan sari, noso krei, noso pen no o de moro. Den fositen sani pasa kaba.” A no wan moi howpu?

Robert: Iya. Ma mi denki taki a tekst dati e taki fa a libi o de na ini hemel.

Marcus: We, a tru taki den sma di o go na hemel o kisi den srefi sortu blesi. Ma luku a tekst baka. San o pasa nanga dede?

Robert: A tekst e taki dati „dede no o de moro”.

Marcus: Heri bun. We, mi de seiker taki yu e agri taki efu wan sani no o de moro, dan a sani dati ben musu de fosi.

Robert: Dati tru.

Marcus: Ma noiti dede ben de na hemel, a no so? Soso dyaso na grontapu sma e dede.

Robert: Hmm. Mi musu denki fu a tori disi fosi.

Marcus: We, Robert, Bijbel e leri taki son bun sma o go na hemel, ma taki furu trawan o libi dya na grontapu fu têgo. Fu taki en leti, mi de seiker taki yu sabi den wortu disi di furu sma sabi: „Blesi foe dem saka-fasi soema, bikasi dem sa kisi grontapoe leki wan erfenis.”​—Mateyus 5:5, Da Bijbel na ini Sranantongo.

Robert: Iya, furu leisi mi yere a tekst disi na ini a kerki fu mi.

Marcus: Efu safu-ati sma o kisi grontapu, dan dati wani taki dati sma o libi na grontapu, a no so? Den sma di o libi na grontapu o kisi wini fu den moi sani di skrifi dyaso na ini Openbaring. Den o si fa grontapu o kenki krinkrin fu di Gado o puru ala ogri, srefi dede.

Robert: Mi e frustan san yu wani taigi mi, ma mi no de seiker taki wán noso tu Bijbeltekst nomo e sori taki san yu e taki, tru.

Marcus: Yu abi leti. Ma furu tra tekst de di e taki fa a libi dyaso na grontapu o de na ini a ten di e kon. Efu yu abi ten, mi kan sori yu wan fu den tekst di mi lobi.

Robert: Ai, mi abi pikinso ten.

„Den ogriwan no sa de moro”

Marcus: Wi ben leisi Psalm 37 vers 29 kaba. Meki wi luku a psalm dati baka, ma  now wi o leisi vers 10 nanga 11. Yu ben o wani leisi den tekst dati?

Robert: Ai. „Ete wan syatu pisi ten èn den ogriwan no sa de moro. Yu o luku pe den ben de fosi, ma den no sa de moro. Ma den safri-ati sma o kisi grontapu èn den o prisiri srefisrefi, fu di freide o de pasa marki.”

Marcus: Grantangi. Te yu luku vers 11, dan yu e si pe „den safri-ati sma”, noso bun sma o libi?

Robert: A tekst e taki dati den „o kisi grontapu”. Ma mi denki taki a tekst disi e taki fu a ten disi. Te yu luku bun, dan nownow kaba bun sma e libi na grontapu.

Marcus: Dati tru. Ma luku taki a tekst e taki tu dati bun sma o abi ’freide pasa marki’. Wi no e si furu freide na grontapu now, a no so?

Robert: Kwetikweti.

Marcus: Sobun, fa a pramisi disi o kon tru? Kande mi kan teki na eksempre disi: Kon meki wi taki dati yu abi wan bigi oso èn yu e yuru kamra gi sma. Sonwan fu den sma dati na bun sma. Den e sorgu bun gi den kamra èn den e pruberi fu libi bun nanga birtisma. Yu breiti taki yu yuru den kamra gi den. Ma wan tu takru sma de na den mindri tu. Den no e sorgu bun gi a presi èn den e meki trobi nanga den birtisma. We, efu den takru sma disi no wani kenki, dan san yu o du?

Robert: Mi o yagi den.

Marcus: Na dati Gado o du nanga ogri sma fu a ten disi. Meki wi luku vers 10 baka. A e taki: „Den ogriwan no sa de moro.” Sobun, yu kan taki dati Gado o yagi den sma di e tyari problema kon gi trawan. Dan bun sma o man libi na ini freide na grontapu. Mi e frustan taki a prakseri disi taki bun sma o libi fu têgo na grontapu, de heri tra fasi leki san yu leri.

Robert: Iya, noiti mi yere a sani dati na ini mi kerki.

Marcus: Soleki fa yu taki, dan a no sari fu luku wán noso tu tekst nomo di e taki fu a tori disi. Ma wi musu luku san a heri Bijbel e taki fu a tamara fu den bun sma. Ma yu denki taki den tekst di wi leisi tide e sori taki bun sma o go na hemel èn taki furu tra bun sma o libi dya na grontapu fu têgo?

Robert: Mi no de seiker. Ma mi musu fu agri taki den tekst di yu leisi gi mi, e sori taki dati kan. Mi musu prakseri a tori moro.

Marcus: Te yu o luku a tori moro fini, dan kande yu o abi tra aksi tu. Fu eksempre, san pasa nanga den bun sma di ben libi fosi wi? Den alamala go na hemel? Efu den no go na hemel, dan pe den de now?

Robert: Dati na moi aksi.

Marcus: Kande mi kan skrifi wan tu tekst gi yu di abi fu du nanga a tori disi, so taki yu kan leisi den. * Dan mi o kon baka na yu fu taki fu den tekst dati, baka te yu srefi leisi den èn denki fu den. A bun?

Robert: Ai, dati bun. Grantangi.

[Futuwortu]