Bijbel e kenki sma libi

FU SAN EDE wan man di ben kweki leki wan fayafaya Lomsu èn di ben abi wan bun wroko leki krutuman tron Yehovah Kotoigi? San meki taki wan terrorist tapu fu du ogri èn tron wan preikiman fu Gado Wortu? Leisi san den sma disi abi fu taki.

„Mi kon frustan moro krin san bun èn san ogri.”​—SEBASTIÃO ALVES JUNQUEIRA

A GEBORE NA INI 1946

KONDRE: BRASYONKONDRE

FOSI: WAN FAYAFAYA LOMSU

A LIBI FU MI FOSI: Mi famiri ben libi na boiti, sowan 6 kilometer fu a foto Piquete. Mi papa nanga mama ben abi wan pikin gron pe den ben prani sani èn kweki meti so taki wi ben kan feni den sani di wi ben abi fanowdu. A skoro pe mi ben go ben de na ini Piquete. Sobun, mi bai wan owru baisigri fu kan go na foto moro makriki. Den sma na ini wi birti ben pôti, ma a foto ben krin èn furu ogri no ben pasa drape. Furu fu den man fu a foto ben e wroko na ini wan fabriki pe den ben meki fetisani gi srudati.

Mi ben lobi studeri èn mi ben man go na wan skoro pe srudati ben leri frei opolani. A ben de na wan foto krosibei fu Piquete. Na ini 1966 mi klari a skoro èn mi tron wan komandanti. Baka dati mi go na wan afkatiskoro èn di mi kaba mi kisi mi papira. Bakaten mi suku wan wroko leki edeman fu skowtu. Na ini 1976 lanti meki mi du wan eksame. Di mi slaag, mi kisi a wroko. Son leisi mi ben wroko leki edeman fu wan strafu-oso tu. Na a ten dati Yehovah Kotoigi ben kon drape furu leisi èn den ben aksi primisi fu preiki gi den strafuman. Ala ten den ben fruteri mi fu Bijbel tu. Mi ben abi furu lespeki gi Gado. Mi ben fruwondru fu leri taki Gado nen na Yehovah èn taki wi kan tron wan mati fu en.

Safrisafri mi go na fesi èn te fu kaba mi kisi wan hei posisi. Na ini 1981 mi pasa wan tra eksame fu lanti èn mi tron a moro prenspari krutuman fu wan distrikt. Na ini 2005 mi tron wan krutuman fu wan krutubangi na ini São Paulo. A krutubangi dati abi a wroko fu luku den krutubosroiti baka, di moro lagi krutubangi teki.

A FASI FA BIJBEL KENKI MI LIBI: Syatu baka di mi klari na afkatiskoro, mi bigin leisi Bijbel. A sani dati tyari wan bigi kenki kon na a fasi fa mi ben e denki fu sani. Mi ben de wan fayafaya Lomsu. Son famiriman fu mi ben de priester èn wán ben de beskopu. Mi ben yepi a priester te a ben e hori Mis na ini kerki. Fosi a ben hori a taki fu en, mi ben leisi wan tu pisi na ini wan buku di abi begi na ini. Lomsu osofamiri no ben abi a gwenti fu leisi Bijbel.  Dati meki mi mama ben mandi srefisrefi di a kon sabi taki mi ben e leisi Bijbel. A ben wani meki mi tapu nanga a sani dati èn fu dati ede a taigi mi taki mi ben o lasi mi frustan. Ma toku mi tan leisi Bijbel fu di mi no ben feni taki a fowtu.

Mi denki taki mi tan du en fu di mi ben wani leri moro. Mi ben wani sabi moro fu den priester nanga a wroko di den ben abi na ini kerki. Mi bigin leisi buku tu di e leri taki Lomsu Kerki musu feti gi den reti fu den pôtiwan. Ma den sma di ben e horibaka gi a leri disi ben abi so wan fowtu denki, taki mi no ben man frustan en.

Na a ten dati mi tifidatra, di ben abi a Buda bribi, gi mi wan buku di a ben kisi fu wan sma. A buku ben nen „Libisma kon nanga yepi fu evolutie noso na Gado meki den?” * Mi teki a buku fu di mi ben denki taki a ben o bun fu leisi en makandra nanga a buku De oorsprong der soorten fu Charles Darwin. A buku di a tifidatra gi mi ben bun, a ben makriki fu frustan èn a ben abi krin buweisi. Mi ben kon si krin taki na evolutie-leri no ben tru.

Di mi leisi a tori di e taki fa libisma meki, mi ben wani sabi moro èn mi ben wani tra buku fu Yehovah Kotoigi tu. Wan sma fruteri mi fu wan monteur di ben de wan Yehovah Kotoigi. Mi taki nanga en èn a gi mi wan tu buku fu leisi. Na a ten dati mi no ben wani studeri Bijbel nanga den Kotoigi. Mi ben denki taki misrefi ben o man studeri en.

Mi ben trow èn di mi bigin leisi Bijbel, mi bosroiti taki a ben o bun fu leisi en makandra nanga mi osofamiri. Ibri wiki mi nanga mi osofamiri ben e studeri èn ben e leisi Bijbel makandra. Wi leki Lomsu famiri ben abi furu fu du nanga priester nanga beskopu. Sobun, a sani di mi leisi na ini Yohanes 14:6 hari mi prakseri. Drape skrifi: „Yesus taigi en [a disipel Tomas]: ’Mi na a pasi, mi na san tru, èn mi na a libi. Nowan sma kan kon na a Tata sondro mi.’” Baka di mi ondrosuku a tori finifini, mi kon si taki Yehovah e frulusu wi nanga yepi fu Yesus. Kerki ben meki wi bribi taki na den priester ben kan meki wi kisi frulusu.

Tu tra Bijbeltekst kenki a fasi fa mi ben denki fu Lomsu Kerki nanga den leri fu en. Wan fu den tekst disi na Odo 1:7 di e taki: „Bigi lespeki gi Yehovah na a bigin fu sabi. Ma don sma e wisiwasi koni èn den no lobi du san sma e leri den.” A tra tekst na Yakobus 1:5: „Efu wan fu unu e mankeri koni, dan meki a tan aksi Gado fu dati, bika te Gado e gi sma sani, a e du dati nanga en heri ati èn sondro fu suku fowtu na den. Sobun, Gado o gi a sma a koni dati.” Mi ben angri fu kon kisi sabi nanga koni, ma kerki no ben man yepi mi nanga dati. Dati meki mi no go moro.

Na ini 1980 mi wefi bigin studeri Bijbel nanga den Kotoigi. Te mi ben de na oso, mi ben sidon arki tu. Baka wan pisi ten mi srefi teki Bijbelstudie. Ma a teki langa fosi wi bosroiti fu dopu èn tron Yehovah Kotoigi. Mi wefi dopu na ini 1994 èn mi dopu na ini 1998.

DEN WINI DI MI KISI: Den fo pikin fu wi kisi furu wini fu di den leri fu libi soleki fa Yehovah wani (Efeisesma 6:4). Mi abi tu manpikin di e du furu muiti fu yepi tra Kotoigi na ini a gemeente pe den e go. Den tu umapikin fu mi e preiki fayafaya gi trawan. Ibri mun mi wefi e gebroiki furu ten fu yepi sma fu kon sabi Bijbel èn mi abi a grani fu dini leki owruman na ini a gemeente fu mi.

Di mi tron wan Kotoigi fu Yehovah mi kon frustan moro krin san bun èn san ogri. Leki krutuman mi e pruberi fu teki na eksempre fu Yehovah te mi musu krutu wan afersi. Mi e  luku ala tori finifini, mi no e krutu sma tumusi hebi èn te a fiti mi e sori sari-ati.

Aladi mi e kisi fu du nanga furu krutu-afersi fu sma di gi trawan bigi mankeri, sma di ben abi seks nanga pikin-nengre èn sma di du tra bigi ogri, toku mi e firi ete gi sma. Te mi e luku nyunsu, mi e tegu fu si fa moro nanga moro sma e libi wan yayolibi èn fa a libi fu den pori. Mi e taigi Yehovah tangi taki mi kon frustan fu san ede moro nanga moro sma e du ogri èn taki wi abi a howpu taki wan ten o kon te a libi o de moro bun.

„Strafu-oso no kenki mi.”​—KEITH WOODS

A GEBORE NA INI 1961

KONDRE: NOORD-IERLAND

FOSI: WAN TERRORIST

A LIBI FU MI FOSI: Mi gebore na ini 1961 na Portadown, wan foto fu Noord-Ierland pe furu sani ben de fu du. Mi kweki leki wan Anitri èn mi ben tan na wan strati pe furu Lomsu nanga Anitri ben e libi. Furu fu den osofamiri drape ben pôti. Wi no ben abi furu moni, ma wi ben libi leki famiri èn wi ben gwenti go na makandra oso.

A fasi fa mi ben libi fosi no ben moi kwetikweti. Na ini 1974 mi ben e horibaka gi a bigi opruru di ben de na Noord-Ierland na a ten dati. Sani no ben waka bun na ini a birti fu wi. Fu eksempre, wan neti mi papa, di ben de basi fu wan matamata fabriki, ben de na wroko e leri tu yongu Lomsu boi di ben libi na ini na oso leti na wi sei. Na a srefi ten wan sma fringi wan bom go na ini a foroisi fu na oso pe den tu Lomsu boi disi ben tan. A bom kiri a papa, a mama nanga a pikin brada fu den.

Problema kon moro bigi èn bigi feti broko. Den Lomsu bron den oso fu den Anitri di ben libi na ini Lomsu birti èn den Anitrisma fon den Lomsusma di ben tan na ini Anitri birti. Te fu kaba, na soso Anitri ben libi na ini a strati fu wi. Syatu baka dati, skowtu hori mi èn mi koti strafu dri yari langa fu di mi ben poti bom gi sma.

Di mi ben de na strafu-oso, mi meki mati nanga wan strafuman. Sma ben sabi en leki wan man di ben horibaka gi a politiek grupu di no ben wani meki Noord-Ierland lusu Ingrisikondre. Wi ben de leki brada èn bakaten mi ben de en kotoigi di a trow. Ma strafu-oso no kenki mi, noso a mati fu mi. Di den lusu wi, wi waka langalanga go du den srefi sani baka. Ma disi leisi wi ben du moro bigi ogri srefi. A bakapisi ben de taki mi mati doro baka na strafu-oso. Drape sma kiri en.

Sma ben wani kiri mi tu èn wán leisi den sutu mi wagi panya nanga wan bom. Ma den sani disi meki taki mi horibaka moro faya gi a politiek grupu fu mi.

 Na a pisi ten disi mi ben yepi fu meki wan telefisi programa di ben taki fu den bigi opruru di ben de na ini a kondre. Den ben sori en na telefisi na ini Ingrisikondre. Disi meki taki mi kisi moro problema. Fu eksempre, di mi kon na oso wan neti, mi kon si taki mi wefi gowe libi mi. Syatu baka dati lanti puru mi boi na mi fu di mi ben meki a telefisi programa dati. Mi kan memre taki mi ben luku na ini a spikri èn mi ben taki: „Efu wan Gado de, dan yepi mi.”

A satra baka dati mi miti wan sma di mi ben sabi. A nen Paul èn a ben tron wan Yehovah Kotoigi. A bigin taki nanga mi fu Bijbel. Tu dei baka dati, Paul seni wan Waktitoren gi mi. Wan fu den artikel ben abi a tekst fu Yohanes 18:36 pe Yesus e taki: „Mi kownukondre no de fu a grontapu disi. Efu mi kownukondre ben de fu a grontapu disi, dan den dinari fu mi ben o feti, so taki den Dyu no ben o kisi mi. Ma soleki fa mi taki kaba, mi kownukondre no de fu a grontapu disi.” Den wortu dati naki mi ati trutru. A dei dati mi libi bigin kenki.

A FASI FA BIJBEL KENKI MI LIBI: Paul bigin studeri Bijbel nanga mi. Bakaten Bill, wan tra Kotoigi, go doro nanga a studie. Mi sabi taki mi ben de wan muilek studenti. Mi ben abi someni aksi èn mi tyari furu domri kon na mi oso fu sori Bill taki a no abi leti. Ma te fu kaba mi kon frustan den tru tori fu Gado Wortu.

Mi kan memre taki wán leisi mi taigi Bill fu no kon na mi oso fu studeri nanga mi fu di sma ben tapu den pasi na ini a birti fu wi. Efu a ben o kon drape, dan den ben o teki a wagi fu en èn den ben o bron en. Ma toku Bill kon studeri nanga mi leki fa a ben gwenti. A libi a wagi fu en na oso èn a rèi en baisigri kon. Suma ben o wani teki wan baisigri? Wan tra leisi Bill nanga mi ben e sidon na mi oso e studeri Bijbel di skowtu nanga srudati kon fu tyari mi go sroto. Di den tyari mi gowe, Bill bari gi mi fu frutrow na tapu Yehovah. Den sani dati naki mi ati trutru.

A fosi leisi di mi go na wan konmakandra fu Yehovah Kotoigi na a Kownukondre zaal, wan tu fu den ben musu fu skreki. Mi wiwiri ben langa, mi ben weri wan yesilinga èn mi ben weri wan leri dyakti di ben e sori fu sortu politiek grupu mi de. Ma mi no ben man bribi taki den Kotoigi ben abi so furu switifasi gi mi. A sani dati naki mi ati trutru.

Aladi mi ben studeri Bijbel, toku mi ben moksi ete nanga den owru mati fu mi. Ma te fu kaba den tru tori di mi ben leri fu Bijbel bigin sungu go moro dipi na ini mi ati. Mi kon frustan taki efu mi ben wani dini Yehovah, dan mi ben musu kenki a fasi fa mi ben denki fu politiek. Dati no ben de makriki fu du. Ma den sani di mi leri fu Bijbel èn a krakti fu Yehovah, yepi mi fu kenki. Mi koti mi wiwiri, mi puru mi yesilinga èn mi bai wan paki. Den sani di mi ben leri ben meki tu taki mi ben sori moro switifasi gi sma.

DEN WINI DI MI KISI: Mi heri libi mi ben du wan lo ogri èn mi ben gwenti gens a tirimakti. Ala skowtu na ini a birti fu mi ben sabi mi fesi. Ma now sani de tra fasi. Fu eksempre, a fosi leisi di mi go na wan kongres fu Yehovah Kotoigi na a foto Navan na Ierland, dan skowtu rèi nanga mi a heri pasi fu Noord-Ierland go na Ierland. Di mi drai go na oso, den ben rèi nanga mi tu. Ma now mi e go na den kongres sondro taki skowtu abi fu kon nanga mi. Boiti dati, noti e tapu mi now fu du a preikiwroko makandra nanga mi Kresten brada Paul, Bill èn nanga den tra sma fu a gemeente.

Di mi libi kenki, mi tron wan memre fu a gemeente. Drape mi miti wan Kotoigi di nen Louise èn mi trow nanga en. Wan tra moi sani na taki mi boi kon tan nanga mi baka.

Te mi denki baka fa mi ben libi fosi, dan mi e sari taki mi du someni ogri nanga trawan. Ma fu tru mi kan taki dati Bijbel e yepi sma leki mi fu kenki. Mi abi wan howpu now èn dati e meki mi firi koloku.

[Futuwortu]

[Prenspari pisi na tapu bladzijde 12]

Mi mama ben mandi srefisrefi di a kon sabi taki mi ben e leisi Bijbel