▪ A kan taki wan reti-ati sma e aksi ensrefi a sani disi, fu di nowan wèt na ini Bijbel e taki dati sma no mag gebroiki tabaka. Ma disi wani taki dati a muilek fu frustan fa Gado e prakseri fu a tori disi? Kwetikweti.

Bijbel e taki dati „na Gado srefi ben meki sma skrifi ala den sani di de na ini Gado Buku” (2 Timoteyus 3:16). Bijbel e sori krin fa Gado wani taki wi musu sorgu wi gosontu. Meki wi go luku fosi san sabiman kon si fu a krakti di tabaka abi na tapu a gosontu fu libisma. Baka dati wi o luku san Bijbel gronprakseri e taki fu a tori disi.

Tabaka e pori a gosontu fu smokoman èn a de wan fu den moro prenspari sani di kan kiri sma. Wán fu ibri feifi sma di dede na ini Amerkankondre, kon dede fu di den ben smoko tabaka. Wan organisâsi na ini Amerkankondre di e ondrosuku fa sma e gebroiki drugs, e taki dati tabaka e kiri moro sma na ini a kondre dati leki den sma di e dede fu di „den e dringi sopi, den e gebroiki drugs, sma kiri den, den e kiri densrefi, wagi naki den, noso den e kisi AIDS”.

Sma di e smoko tabaka kan meki trawan kon siki. A no bun fu hari a smoko fu wan sikaret, awinsi na pikinso nomo. Te sma di no e smoko, e hari a smoko fu a sikaret fu wan tra sma, dan den kan kisi atisiki èn kanker na den fokofoko moro makriki. Na ini den yari di pasa, datra kon si wan tra problema èn dati na taki a doti fu smoko e tan na tapu krosi, matamata nanga tra sani, langa ten baka te a smoko gowe kaba. Spesrutu pikin-nengre kan kon siki fu a doti disi di wi no man si èn a kan meki taki den no man leri bun.

Smokoman kan tron srafu fu tabaka. A sma di e smoko tabaka kan tron wan srafu fu a takru gwenti disi. Fu taki en leti, sabiman e bribi taki te sma kon gwenti a nikotine di de na ini tabaka, dan dati na wan fu den moro muilek gwenti fu tapu.

Sortu Bijbel gronprakseri abi fu du nanga a tori disi? Luku san e kon now:

Gado wani taki wi musu lespeki a libi. A Wèt di Gado ben gi a pipel Israel, ben sori taki den sma di wani plisi en musu lespeki a libi fu libisma (Deuteronomium 5:17). Den Israelsma ben musu bow wan pikin skotu na a lanki fu a daki fu den oso. Fu san ede? Den daki ben plata èn sma ben teki dati leki den foroisi. A skotu ben musu sorgu taki sma na ini na osofamiri, noso trawan no fadon komoto na a daki èn kisi mankeri noso dede srefi (Deuteronomium 22:8). Den Israelsma ben musu sorgu tu taki den meti fu den no gi tra sma mankeri (Eksodes 21:28, 29). Wan sma di e smoko tabaka, no e hori den gronprakseri di abi fu du nanga den wèt disi. So wan sma e pori en gosontu fu espresi. A kan siki den sma tu na en lontu te a e smoko.

Gado wani taki wi musu lobi en nanga tra sma. Yesus Krestes ben taki dati den bakaman fu en musu gi yesi na den tu moro prenspari komando di de. Den musu lobi Gado nanga den heri ati, nanga den heri libi, nanga den heri frustan èn nanga ala den krakti. Den musu lobi tra sma tu leki fa den lobi densrefi (Markus 12:28-31). A libi na wan kado fu Gado. Dati meki wan sma di e smoko tabaka e sori taki a no e lespeki a kado disi kwetikweti èn na so a e sori taki a no lobi Gado (Tori fu den apostel 17:26-28). A takru gwenti disi kan pori a gosontu fu trawan. Dati meki so wan sma e lei te a e taki dati a lobi tra sma.

Gado wani taki wi wai pasi gi gwenti di no krin. Bijbel e taigi Kresten fu krin densrefi ’fu ibri sani di kan doti den skin nanga den denki’ (2 Korentesma 7:1). Te wan sma e smoko tabaka, dan dati e doti a sma. Den sma di wani tapu nanga smoko fu kan plisi Gado, o abi fu du tranga muiti. Ma Gado o yepi den fu tapu nanga a takru gwenti disi di e doti a skin.