A di fu 132 klas fu a Gileadskoro

Sma di e opo taki gi a tru bribi

NA TAPU 10 maart 2012, a ben de wan spesrutu dei na a Waktitoren Skoro fu Yehovah Kotoigi na ini Patterson, na New York, fu di den studenti fu a di fu 132 klas ben klari a Waktitoren Bijbelskoro Gilead. Dusundusun sma di weri moi krosi, sosrefi sma fu tra kondre, ben kon makandra drape. Furu fu den sma ben de na a zaal na Patterson. Trawan ben de na tra Betel-oso e luku a programa na tapu telefisi. Ala nanga ala 9042 sma ben kon makandra.

Sma ben angri fu sabi san o pasa. Ala den studenti fu a di fu 132 klas ben de na ini a spesrutu furuten diniwroko kaba, fosi den go na a skoro. Dati no ben de so nanga den studenti di ben go na a Gileadskoro fosi den. Den sma fu a klas disi ben wroko fosi na Betel, trawan ben de spesrutu pionier, kring-opziener, distrikt-opziener noso zendeling. San den brada ben o taigi den studenti disi di abi ondrofeni?

Den arkiman no ben abi fu wakti langa. Gerrit Lösch, wan memre fu a Tiri Skin fu Yehovah Kotoigi, ben de a fesiman fu a programa èn a ben hori a fosi lezing. A poti na aksi disi di hari sma prakseri: „Yu na wan sma di e opo taki?” A fruteri taki Kresten na sma di e opo taki gi a tru bribi èn di e horibaka gi ala den Kresten leri. Te wi e opo taki gi a tru bribi, dan wi no e leri sma den tru tori fu Bijbel nomo, ma wi e yepi den tu fu lobi a tru bribi.

„Fa wi sabi taki wi abi a tru bribi?”, na so Brada Lösch aksi. A taki dati te furu sma e teki a tru bribi, dan dati a no wan buweisi. Milyunmilyun sma kon na ini a tru anbegi na ini a ten disi. Ma na a Pinksterfesa fu a yari 33 baka Krestes, wan tu sma nomo ben du dati. A ben taki fu feifi sani di e sori taki wi abi a tru anbegi. Den sani disi na: (1) Wi e tan teki a leri fu Yesus, (2) wi lobi makandra, (3) wi e hori wisrefi na den hei markitiki fu Gado, (4) te kesekese de na grontapu, wi no e teki sei èn (5) wi na den sma di Gado teki fu tyari en nen.

„Du ala ten san yu leri”

Den arkiman ben aksi densrefi san ben o pasa di Geoffrey Jackson fu a Tiri Skin waka go na tapu a podium nanga wan kofru na ini en anu. A nen fu en lezing „Du ala ten san yu leri”, teki puru fu Yesaya 50:5. A tekst dati e taki san Yesus Krestes ben o du: „Mi no opo misrefi teige en. Mi no du sani tra fasi leki fa a taigi mi fu du.”

Brada Jackson gi den studenti deki-ati fu de gaw fu teki a tiri fu Yehovah di a e gi nanga yepi fu en santa yeye, Bijbel èn na organisâsi fu en. Na ini Mateyus 25:14-30, yu kan leisi na agersitori fu den srafu di ben kisi talenti. Fu di ibri srafu kisi so furu leki san a ben man du, yu kan taki dati ibriwan ben kisi a srefi. Ma den ben musu sorgu taki den du ala san den man. Yesus ben kari den tu srafu ’bun srafu di e du den wroko bun’. A no te wan sma abi bun bakapisi, dan dati wani taki dati a e du en wroko bun, ma na te a e gi yesi èn te a e klari a wroko di a kisi fu du.

A Masra kari a di fu dri srafu wan „takru èn lesi srafu” èn wan „srafu di no warti noti”. San ben de a problema? A ben kibri en talenti. Wan talenti ben warti 6000 solfru moni, ma a no ben de wan moni. Sma ben e gebroiki en fu wegi sani èn a ben hebi 20 kilo. Na ini a ten disi 20 kilo na san wan sma di e teki opolani go na tra kondre mag tyari na ini en kofru. A ben o teki furu muiti fu kibri wan sani di bigi leki wan kofru. Sobun, a srafu du wan  sani, bika a kibri en talenti. Ma dati no ben de san a Masra taigi en fu du. Na so wan zendeling kan feni taki a abi furu fu du. Ma san a e du so? Na langa brifi a e skrifi gi famiri nanga mati tapu Internet fu fruteri den ala sortu nyunsu? Na luku a e luku ala sortu tori tapu Internet? A e sidon taki tori nanga mati? A e du bisnis? Te neti e tapu, dan so wan zendeling weri srefisrefi kande, ma a no du a wroko di a ben kisi fu du. Brada Jackson tapu nanga a rai disi: „Tan du a wroko di yu kisi fu du!”

„No bigin tweifri”

Dati ben de a nen fu a lezing fu Anthony Morris fu a Tiri Skin. „Soleki fa Bijbel e sori, dan bribi nanga tweifri no de a srefi”, na so a taki. „Bribi e meki taki wan sma no e tweifri moro. Efu Satan ben man meki taki Eva, wan uma di ben de sondro sondu, bigin tweifri, dan a kan du a srefi sani nanga wi tu. Meki un bribi kon tranga, dan unu no o tweifri moro”, na so Brada Morris taki. A poti prakseri na a tori fu Petrus di ben „waka na tapu a watra”. Ma di Petrus ’si fa a bigi winti wai’, a kon frede èn a bigin sungu. Baka di Yesus grabu en hori, a aksi en: „Fu san ede yu bigin tweifri?” (Mateyus 14:29-31) „Unu leki zendeling o abi furu fu du na ini a furuten diniwroko èn sma di e si dati kan feni en wan kefalek sani. Gi den a gersi leki unu e waka na tapu watra. Ma te bigi winti wai, dan no bigin tweifri.”

Brada Morris taki moro fara dati te problema e miti wan sma, neleki te wan bigi winti e wai, dan a kan muilek srefisrefi. Ma neleki fa wan bigi winti e pasa te fu kaba, na so den problema o gowe tu. A gi den studenti deki-ati fu luku san Paulus nanga Silas du di den ben de na strafu-oso na Filipi. Tori fu den apostel 16:25 e taki: „Na mindrineti, Paulus nanga Silas ben e begi èn den ben e singi prèisesingi gi Gado, aladi den strafuman ben e arki.” Denki a sani disi: Den no ben begi wawan, ma den ben e singi tu. Den ben e singi so tranga taki den tra strafuman ben man yere den. Furu fu wi no man singi moi, Brada Morris taki. Ma disi no musu tapu wi fu singi, spesrutu te wi abi problema. Brada Morris tapu nanga den wortu fu singi nomru 135 di nen „Horidoro te na a kaba”, fu a singibuku Singi gi Yehovah.

Tra lezing di gi deki-ati

„Yu o angri fu libi langa fu si soso bun?” Dati ben de a nen fu a lezing di Robert Luccioni hori. A brada disi e wroko na a afdeling di e bai sani gi Betel. A nen fu a lezing teki puru fu den wortu fu Kownu David di skrifi na ini Psalm 34:12. Na ini a lezing fu en Brada Luccioni sori fa wi kan lusu problema na so wan fasi taki wi tan wan mati fu Yehovah. Wi kan leri furu fu den sani di skrifi na ini 1 Samuel kapitel 30. Di David nanga den man fu en èn den famiriman fu den lowe gi Kownu Saul, den go libi na Siklak. Di ogri-ati Amalèksma grabu den famiriman fu den man fu David tyari gowe, dan den man disi feni taki na fu David ede meki a sani dati pasa èn den ben wani ston en kiri. San David du? A no ben lasi-ati, ma „a go suku yepi na Yehovah en Gado” (1 Samuel 30:6). A aksi Yehovah san a musu du. Ne a du soifri san Yehovah taigi en èn a frulusu den sma di ben de na ini katibo. A takiman gi den studenti a dyaranti taki efu den e frutrow Yehovah na a srefi fasi disi èn efu den e gi yesi na En, dan den o angri fu libi langa fu si soso bun. Den o man tyari den frantwortu fu a moi grani di den kisi èn den o prisiri.

„Prakseri den bun ten di o kon”, ben de a nen fu a lezing di Michael Burnett, wan fu den leriman fu a Gileadskoro ben hori. Den Israelsma ben prati a neti na ini dri pisi di ben de fo yuru langa. A lasti pisi di ben de fu 2:00 mindrineti te go miti 6:00 mamanten, ben de a moro dungru èn kowru ten èn a ben moro muilek fu tan na ai. Na mindrineti a psalm skrifiman ben prakseri den sani di Yehovah e taki fu a no fadon na sribi (Psalm  119:148). „Unu o abi fu de na ai”, na so Brada Burnett taigi den studenti. „Son leisi unu o miti dungru pisi ten di kan meki unu lasi-ati èn unu o si den ogri di e pasa na ini a kowru grontapu disi di no abi lobi. Un musu bosroiti na fesi san unu o du te sani miti unu di kan meki unu lasi-ati.” Dan a memre den taki den musu studeri Bijbel finifini, so taki den kan tan na ai èn tan abi wan tranga bribi. Brada Burnett agersi en so: „Ibri dei unu e begi Yehovah, fu di unu wani taki a musu de un mati. Sobun, meki un mati Yehovah taki ibri dei nanga unu nanga yepi fu Bijbel. Neti pasa moi fara kaba. Dati meki un musu prakseri bun fa unu o gebroiki den dei fu unu èn na so unu o man prakseri den bun ten di o kon.”

„Unu kisi leri fu man du a wroko di musu du”, ben de a nen fu a lezing di Mark Noumair, wan tra leriman fu a Gileadskoro ben hori. A lezing teki puru fu 1 Petrus 5:10. A brada poti na aksi disi gi den studenti: „Efu unu na preikiman di abi ondrofeni, dan fu san ede unu kisi a kari fu kon dyaso na a Gileadskoro?” Ne a brada taki: „Fu di unu sabi du a preikiwroko heri bun. Furu sma di sabi du wan wroko bun e go na skoro baka fu leri moro. Na ini den feifi mun di pasa, Yehovah meki unu ’tanapu kánkan’ èn a meki unu ’kon tranga’, fu di unu studeri en Wortu èn unu leri fa en organisâsi seti. Disi o yepi unu fu man tyari den bigi frantwortu di unu o kisi. Wan postu di tranga no e beni, drai, noso priti te a e tyari wan hebi sani. Te unu o wroko makandra nanga den Kresten brada nanga sisa fu unu, dan a o kon na krin taki unu kisi bun leri. San unu o du te unu kisi problema? Unu o libi den gronprakseri fu Gado na wan sei, noso unu o horidoro èn du finifini san unu leri fu Gado Wortu? Wan sani di tranga kan tyari wan lai. Wan udu tranga fu di den finifini titei na ini na udu frekti kon makandra bun steifi. A fasi fa un ati de, o sori o tranga a bribi fu unu de. Yehovah meki unu kon dyaso fu meki unu kon tranga gi a wroko di un musu du èn fu meki taki unu de fu frutrow. Gado du san en musu du èn wi e begi taki unu du unu wroko èn meki unu ’Gran Leriman’ gi unu leri dorodoro.”

Ondrofenitori nanga interview

Na den momenti disi a moi fu yere ondrofenitori fu den studenti fu a Gileadskoro. Na wan pisi fu a programa den studenti demo wan tu fu den sani di den ben ondrofeni na ini a preikiwroko na a pisi ten fu a skoro. Wan trowpaar fu Fransikondre, ben musu wakti siksi yuru langa na wan opolani presi di den ben na pasi fu go na a Gileadskoro. Na a nyanyan-oso drape den bigin taki na ini Ingrisitongo nanga tu man di ben e wakti opolani tu. Di wan fu den man taigi den taki a ben de fu Malawi, den bigin taki nanga en na ini Tyityewatongo. A man ben fruwondru èn a aksi den fa a du kon taki den ben man taki a tongo fu en. Den piki en taki den ben de zendeling na ini Malawi. Di a tra man taki dati en ben de fu Kamerun, dan a fruwondru di den bigin taki Fransitongo nanga en. Ala tu man ben taki bun sani fu Yehovah Kotoigi èn den zendeling preiki gi den.

Nicholas Ahladis fu a Vertaalafdeling, ben interview tu trowpaar fu a skoro. Wan trowpaar ben froisi fu Australia go na Owstu-Timor pe feti de, fu go dini leki zendeling. A tra trowpaar froisi fu Korea fu go dini leki zendeling na Hong Kong. Ala tu trowpaar ben breiti fu drai go baka na den kondre pe den e dini, fu du den sani di den leri na a Gileadskoro.

Baka di den studenti kisi den diploma, wan studenti leisi wan brifi fu sori taki den de nanga tangi gi a leri di den kisi. Dan Brada Lösch taki wan tu moi sani na a kaba fu a programa. A taigi den studenti taki a tru anbegi moi leki wan alenbo, taki a de leki wan watra-olo na ini wan sabana èn leki wan ankra na ini wan krasi se. A taki: „A de wan bigi blesi fu sabi a tru bribi. Opo taki gi a tru bribi èn yepi trawan fu du a srefi.”

 [Schema/​Karta na tapu bladzijde 31]

WAN TU SANI FU A KLAS

A nomru fu den kondre pe den studenti komoto: 12

Gemiddeld yari di den abi: 36

Gemiddeld yari di den dopu: 20

Gemiddeld yari di den de na ini a furuten diniwroko: 15

[Karta]

(Efu yu wani si pe den sani disi skrifi, luku a tijdschrift)

Kondre pe den o go dini:

KONDRE PE DEN O GO DINI:

BELISE

BENIN

KAMBODYA

KAMERUN

KAAP FERDIA

IVOORKUST

DOMINIKAN REPUBLIEK

OWSTU-TIMOR

EKWADOR

GABON

GEORGIA

GINEA

HONG KONG

LIBERIA

MADAGASKAR

MALAWI

PERU

SAMOA

SÃO TOMÉ NANGA PRÍNCIPE

AMERKANKONDRE

ZIMBABWE

[Prenki na tapu bladzijde 31]

A di fu 132 klas fu a Waktitoren Bijbelskoro Gilead

Den nen di de fu si na ondrosei, poti na ini rèi di nomru fu fesisei go na bakasei èn na ini ibri rèi den nen poti fu a kruktu-anusei go na a reti-anusei.

(1) R. Lap; J. Lap; T. Ng; P. Ng; F. Laurino; B. Laurino; S. Won; S. Won.

(2) N. Morales; M. Morales; J. Zanutto; M. Zanutto; I. Rumph; J. Rumph; D. Germain; N. Germain.

(3) Y. Atchadé; Y. Atchadé; C. Thomas; E. Thomas; C. Estigène; P. Estigène.

(4) D. Ehrman; A. Ehrman; J. Bray; A. Bray; M. Amorim; D. Amorim; Y. Seo; Y. Seo.

(5) J. Simon; C. Simon; C. Seale; D. Seale; J. Erickson; R. Erickson.

(6) D. McCluskey; T. McCluskey; A. Brown; V. Brown; D. Mariano; C. Mariano; Y. Loyola; C. Loyola.

(7) P. Rutgers; N. Rutgers; P. Foucault; C. Foucault; J. Wunjah; E. Wunjah.