„DI LIBISMA bigin tiri tra libisma, sani no waka bun gi den” (Preikiman 8:9). Den wortu dati di skrifi sowan 3000 yari pasa, e taki soifri fa a grontapu fu now ben o de. Nofo tron te libisma abi makti, dan den e pina trawan, awansi suma den de noso awansi pe den e libi. Furu leisi den e du ogri nanga den swakiwan èn nanga den pôtiwan. Fa Yehovah e firi te a e si den ogri disi? Wi e feni a piki na ini Esekièl 22:6, 7, 31.​—Leisi.

A Wèt di Yehovah gi Israel ben sori krin taki sma di abi makti noiti no ben musu gebroiki a posisi fu den fu pina trawan. A ben o blesi a pipel soso te den tiriman ben o sori switifasi gi den mofinasma nanga den pôtisma èn te den ben o hori den na prakseri (Deuteronomium 27:19; 28:15, 45). Ma na ini a ten fu Esekièl, den edeman na ini Yerusalem nanga Yuda gebroiki den makti na wan ogri-ati fasi. San ben pasa?

Den ben gebroiki den „makti fu kiri sma” (vers 6). A wortu „makti” abi fu du nanga a hei posisi fu den edeman. Wan tra Bijbel e taki en so: „Dem fesiman foe Israel . . . ben misbruiki hem krakti foe trowe broedoe.” Na den tiriman ben musu sorgu taki sma hori a wèt. Ma fa retidu ben kan de efu den ben gebroiki a makti fu den fu du sma ogri èn fu kiri den?

Soleki fa a sori, dan baka di Esekièl taki san skrifi na ini vers 6, a no krutu soso den fesiman di ben trangayesi Yehovah Wèt, ma a krutu sosrefi den sma di ben waka na den baka. „Den pina den papa nanga mama”, na so Esekièl e taki (vers 7). Fu di den no lespeki a posisi fu papa nanga mama, meki den broko na osofamiri-libi, a moro prenspari seti di e meki wan kondre drai bun.​—Eksodes 20:12.

A kruka pipel ben pina den mofinawan na den mindri. Ibri leisi te den ben trangayesi a Wèt di Gado gi Israel, den ben e sori taki den no lespeki a lobi-ati seti disi. Fu eksempre, Gado Wèt ben sori taki den Israelsma no ben musu libi takru nanga den trakondre sma di ben e tan na ini den kondre (Eksodes 22:21; 23:9; Lefitikus 19:33, 34). Ma a pipel ben e „bedrigi” den trakondre sma.​—Vers 7.

Boiti dati, den Israelsma ben pina den sma di no abi yepi. Dati ben de „den pikin di no abi papa èn den uma di den masra dede kaba” (vers 7). Te wan sma lasi wan papa, wan mama, noso wan trowpatna na ini dede, dan Yehovah e firi gi den sma dati. Gado pramisi taki a ben o strafu den sma di ben e pina wan pikin di no abi yepi noso wan uma di en masra dede kaba.​—Eksodes 22:22-24.

Na a fasi disi èn na tra fasi tu den Israelsma na ini a ten fu Esekièl, ben broko Gado Wèt di ben leri taki den musu sori lobi. San Yehovah ben o du? A ben taki: „Mi o krutu den” (vers 31). Neleki fa a ben taki, dan a gi pasi taki den Babilonsma pori Yerusalem èn taki den tyari en pipel gowe na ini katibo na ini 607 fosi Krestes.

Den wortu fu Esekièl e leri wi tu sani fu Yehovah èn fu a fasi fa a e denki fu kruktudu. A fosi sani na taki a no lobi kruktudu kwetikweti. A di fu tu sani na taki a e sori sari-ati gi sma di no du ogri èn di trawan e pina. Gado no kenki (Maleaki 3:6). A e pramisi taki heri esi a o puru kruktudu nanga den sma di e du kruktudu (Odo 2:21, 22). Fu san ede yu no e leri moro fu a Gado „di lobi retidu”? Fu san ede yu no e leri fa yu kan tron wan mati fu en?​—Psalm 37:28.

A bun fu leisi a pisi disi fu Bijbel na ini augustus:

▪ Esekièl 21–38

[Prenspari pisi na tapu bladzijde 27]

Yehovah ben sori krin taki sma di abi makti noiti no ben musu gebroiki a posisi fu den fu pina trawan