Yu kan bribi den wondru di skrifi na ini Bijbel?

EFU wan sma ben o fruteri yu wan kefalek moi tori, dan yu ben o bribi en? Kande yu ben o bribi a tori efu yu ben o frutrow a sma. A no soso a fasi fa a sma e fruteri yu a tori ben o meki taki yu bribi en, ma yu ben o bribi en tu fu di a abi a gwenti fu taki san tru. Iya, na ini ala den yari noiti a lei gi yu fu espresi. Sobun, yu kan bribi san a e fruteri yu now.

Na so a de tu nanga den wondru di skrifi na ini Bijbel. Nowan fu wi ben de na libi di den sani dati pasa. Ma toku wi kan kon sabi efu den sani na ini Bijbel tru. Fa so? Luku wan tu sani di e sori taki den Bijbel tori di e taki fu wondru, tru.

Furu wondru pasa na presi pe furu sma ben de. Son leisi dusundusun sma, noso milyunmilyun sma srefi ben si den (Eksodes 14:21-31; 19:16-19). Den wondru no ben du kibrikibri, so taki sma no ben man si den.

Den wondru no ben du nanga wan lo opo-opo. Den sma di ben du wondru, no ben abi spesrutu wrokosani èn den no ben kon nanga wan lo pranpran. Den no ben leti spesrutu sortu lampu tu fu kori sma. Furu fu den wondru di sma du na ini Bijbel, den du na a momenti di sma aksi den yepi. Disi ben pasa sondro taki den ben sabi na fesi taki den ben o miti (Markus 5:25-29; Lukas 7:1-16). Na ini den situwâsi dati, a sma no ben man seti sani na fesi fu du a wondru.

Den sma di ben du wondru, no ben du dati fu kisi biginen, grani, noso gudu. Na presi fu dati den ben wani meki Gado kisi glori (Yohanes 11:1-4, 15, 40). Efu wan sma ben suku fu gebroiki a makti fu du wondru fu kon gudu, dan Gado ben krutu a sma dati.​—2 Kownu 5:15, 16, 20, 25-27; Tori fu den apostel 8:18-23.

Den difrenti sortu wondru di skrifi na ini Bijbel e sori taki den no ben man du nanga a krakti fu libisma. Fu eksempre, a se nanga a winti ben kon tiri, watra ben kon tron win, sma meki taki alen no fadon moro èn baka wan pisi ten den meki taki a bigin fadon baka, sikisma ben kon betre èn brenisma ben man si baka. Ala den wondru dati nanga someni trawan e sori taki wan moro hei makti di abi krakti na tapu ala sani, ben musu fu de na ini a tori.​—1 Kownu 17:1-7; 18:41-45; Mateyus 8:24-27; Lukas 17:11-19; Yohanes 2:1-11; 9:1-7.

Gensman di ben si den wondru no ben tweifri taki den pasa trutru. Di Yesus gi en mati Lasarus wan opobaka, dan den feanti fu  Yesus no ben taki dati Lasarus no ben dede trutru. Den no ben o man du dati tu fu di Lasarus ben beri fo dei kaba (Yohanes 11:45-48; 12:9-11). Srefi hondrohondro yari baka Yesus en dede, den skrifiman fu a Talmud, wan Dyu kerkibuku, ben agri taki Yesus ben abi makti fu du wondru. Ma den no ben bribi taki a ben kisi a makti dati fu Gado. Na dati pasa tu nanga den disipel fu Yesus di sma tyari den na fesi wan Dyu krutubangi. Den gensman no aksi den: „Unu du wan wondru?” Ma den aksi: „Nanga sortu makti èn na ini a nen fu suma unu du disi?”​—Tori fu den apostel 4:1-13.

Sobun, yu kan bribi san Bijbel e taki fu wondru? Den sani di wi kaba luku e tyari kon na krin taki wi kan bribi den wondru di skrifi na ini Bijbel. Ma tra sani de di e meki taki wi kan frutrow san Bijbel e taki. Fu eksempre, te yu e leisi wan tori na ini Bijbel, dan nofo tron yu o man si krin o ten a tori pasa, pe a pasa èn fa den sma nen di ben de na ini a tori. Srefi sabiman di e krutu Bijbel, e fruwondru taki Bijbel e taki finifini fu sani di pasa na ini owruten. Hondrohondro Bijbel profeititori kon tru soifri leki fa a skrifi. Boiti dati, Bijbel abi furu rai di e leri sma fa fu libi bun nanga trawan èn den rai disi yepi ala sortu sma, awinsi den yongu noso owru èn awinsi pe den komoto. Te a abi fu du nanga a fasi fa sma musu libi nanga trawan, dan Bijbel e gi a moro bun rai.

Efu yu no e bribi ala sani di skrifi na ini Bijbel, dan fu san ede yu no e teki ten fu ondrosuku en moro fini? O moro yu o kon sabi Bijbel, o moro yu o bribi den sani di skrifi na ini (Yohanes 17:17). Yu o kon si taki yu kan bribi san a e fruteri yu fu den wondru di pasa na ini owruten. Te yu poti bribi na ini den tori dati, dan a o moro makriki fu bribi san Bijbel e taki fu den sani di o pasa na ini a ten di e kon.

[Prenki na tapu bladzijde 7]

Den gensman fu Yesus no ben tweifri taki Lasarus ben dede