A PASA kaba taki yu ben wani wan sani nomonomo?​— * Efu dati de so, dan yu de leki furu tra sma. Ma efu yu wani wan sani, dan yu musu fruteri wan lei soso fu man kisi en?​— Nôno, yu no musu du dati. Wan sma di e du dati abi bigi-ai. Meki wi go luku fa wan man di nen Gehasi meki taki bigi-ai pori en libi. Gehasi ben de wan futuboi fu Elisa, a profeiti fu a tru Gado, Yehovah.

Elisa nanga Gehasi ben libi langa ten pasa, sowan dusun yari fosi Gado en Manpikin, Yesus, gebore na grontapu. Yehovah ben meki Elisa du kefalek sani noso wondru. Fu eksempre, Bijbel e fruteri fu wan heihei man fu a legre fu Siria, di ben abi a takru siki di den e kari gwasi. Nowan sma no ben man meki a kon betre. Ma Elisa ben man du dati.

Te Gado e gebroiki Elisa fu meki sma kon betre, dan a no e teki moni noiti. Yu sabi fu san ede?​— Elisa sabi taki a no en e du den wondru, ma Yehovah. Te Naman kon betre, a breiti so te taki a wani gi Elisa gowtu, solfru nanga moi krosi. Elisa no wani teki noti, ma Gehasi wani den sani nomonomo.

Baka di Naman gowe, dan Gehasi e lon go na en baka. Ma a no e taigi Elisa. Te a miti Naman, dan yu sabi san Gehasi e taigi en?​— ’Elisa seni mi fu taigi yu taki didyonsro tu sma kon luku en. A seni aksi tu krosi so taki a kan gi den man.’

 Ma dati no tru! Fu di Gehasi wani den krosi di Naman ben wani gi Elisa, meki a e lei taki tu sma kon na den. Ma Naman no sabi taki Gehasi e lei. Dati meki a breiti fu gi Gehasi den kado. Naman e gi Gehasi moro srefi leki san a aksi. Yu sabi san e pasa baka dati?​—

Te Gehasi e doro baka na oso, dan Elisa e aksi en: ’Pe yu komoto?’

’Mi no go nowan pe’, Gehasi piki en. Ma Yehovah meki Elisa sabi san Gehasi du. Dati meki Elisa e taki: ’Disi a no a ten fu teki moni noso krosi fu sma.’

Gehasi teki moni nanga krosi di no de fu en. Fu dati ede Gado meki a gwasi fu Naman kon na tapu Gehasi. San wi kan leri fu a tori disi ?​— Wan sani di wi e leri na taki wi no musu fruteri sani di no tru.

Fu san ede Gehasi fruteri wan lei?​— Fu di a ben abi bigi-ai. A ben wani abi sani di no ben de fu en èn a fruteri wan lei fu man kisi den. Fu dati ede a kisi wan takru siki di tan en heri libi langa.

Ma wan sani miti Gehasi di takru moro gwasi. Yu sabi san na dati?​— Dati na taki Gado no ben feni en bun moro èn no ben lobi en moro. Meki a no pasa noiti taki wi du wan sani di o meki taki Gado no lobi wi moro. Ma meki wi sori switifasi èn meki wi prati den sani di wi abi nanga trawan.