DEN sani di a meisje disi taki e sori sortu bigi problema e miti meisje nanga umasma na heri grontapu. Den heri libi langa sma e du ogri nanga den èn e desko den. Luku den sani disi:

• Desko umasma. Na ini 2011, den Verenigde Nâsi ben skrifi taki na ini Asia pikinmoro 134 milyun umasma e mankeri, fu di sma puru bere di den si taki den o kisi wan meisje, den kiri den te den gebore kaba, noso den no e sorgu den bun.

• Skoroleri. Na heri grontapu, tu fu ibri dri umasma nanga meisje no go na skoro noiti noso den kisi fo yari skoroleri nomo.

• Sma e dwengi den fu abi seks. Moro leki 2.6 milyard umasma e libi na ini kondre pe lanti no e si en leki wan ogri te wan masra dwengi en wefi fu abi seks nanga en.

• Gosontu. Na ini pôti kondre, ibri tu miniti wan umasma di de nanga bere noso wan umasma di kisi problema di a pikin fu en gebore, e dede fu di a no kisi bun datrayepi.

• A reti fu bai gron noso oso. Na umasma e prani èn e sorgu gi moro leki afu fu den nyanyan sani na grontapu. Toku furu kondre no e gi umasma a reti fu bai gron noso fu kisi en leki famirigudu.

Fu san ede? Na ini son kulturu, sma e hori densrefi na kerkileri nanga gwenti di e gi den deki-ati fu libi takru nanga umasma èn son leisi den e leri srefi taki a no fowtu fu du dati. Wan Fransi koranti skrifi san Chandra Rami Chopra, wan afkati fu India, ben taki: „Ala kerki abi wèt di e taki wan srefi sortu sani: Den e gi sma deki-ati fu desko umasma.”

Na so yu e denki tu? Yu e denki taki Bijbel e leri taki umasma no prenspari neleki fa furu tra kerkibuku e du dati? Son sma feni taki son Bijbeltekst e sori dati. Ma fa a Gado fu Bijbel srefi e denki fu umasma? Kande a o muilek fu taki fu a tori disi. Ma te wi luku finifini èn nanga wan krin ati san Bijbel e taki fu umasma, dan wi kan feni a piki.