DI WAN safri-ati owru man sori wan yonkuman na Yapan switifasi, dan dati naki na ati fu a yonkuman disi. A man ben de wan zendeling èn furu yari langa a no ben kon na ini a kondre disi fu Asia. Aladi a no ben man taki Yapantongo so bun ete, toku a ben e go na a oso fu a yonkuman fu taki nanga en fu Bijbel. A man disi ben abi pasensi. Nanga wan switi lafu na tapu en fesi èn na wan switi fasi, a ben e piki den furu aksi fu a yongu studenti fu en di ben gridi fu kon sabi moro.

Noiti moro a yonkuman o frigiti a switifasi fu a zendeling disi. A ben e prakseri na ensrefi: ’Efu Bijbel e meki taki wan sma man sori so furu lobi nanga switifasi, dan mi musu fu kon sabi moro fu dati.’ Disi gi en a deki-ati di a ben abi fanowdu fu ondrosuku wan sani di ben de heri tra fasi leki san a ben sabi kaba. Iya, switifasi e naki sma ati èn a kan kenki den. Furu tron dati krakti moro leki san wortu man du.

Nofo tron a de so taki wi abi a gwenti fu sori den sma di wi lobi, switifasi. Ma a no libisma wawan e sori switifasi. Gado e sori switifasi tu. Yesus ben taki dati en Tata na hemel no e sori switifasi soso gi den wan di lobi En, ma sosrefi „gi den sma di no de nanga tangi”. Yesus ben gi den bakaman fu en deki-ati fu teki na eksempre fu Gado. A ben taki: „Un musu bun dorodoro, neleki fa un Tata na hemel bun dorodoro tu.”​—Lukas 6:35; Mateyus 5:48; Eksodes 34:6.

Gado meki libisma leki fa ensrefi de èn dati meki den man sori switifasi neleki en (Genesis 1:27). Iya, wi kan teki na eksempre fu Gado èn leri fu sori switifasi na sma di no de wi famiri. Bijbel e sori taki switifasi na wan fu den moi froktu fu Gado en santa yeye, noso krakti (Galasiasma 5:22). Fu dati ede, wan sma di e leri sabi en Mekiman Gado moro bun èn e kon moro krosibei na en, o man leri tu fu sori switifasi ala ten.

Boiti taki switifasi na wan sani di Gado poti na ini ala libisma, a e si en leki wan prenspari sani tu. Dati meki a no musu fruwondru wi te a e taki dati wi musu „sori switifasi gi makandra” (Efeisesma 4:32). A e memre wi tu taki wi ’no musu frigiti fu lobi fu gi sma wan switikon.’​—Hebrewsma 13:2.

Na ini a ten disi furu sma grofu èn den no de nanga tangi. Sobun, wi man sori trawan switifasi, iya, srefi te wi no sabi den? San kan yepi wi fu du disi? Boiti dati, fu san ede wi musu broko wi ede nanga a tori disi?

Na apostel Paulus ben e taki fa wi kan sori switifasi gi sma di wi no sabi. Ma a moi fu si san a e taki baka dati: „Na fu di son sma du dati, meki sondro fu den sabi, den kari engel kon na ini den oso.” Fa yu ben o firi te yu ben o kisi na okasi fu kari engel kon na ini yu oso? Ma luku tu taki fosi Paulus taki fu den engel, a gebroiki den wortu „sondro fu den sabi”. Nanga tra wortu, a ben wani sori taki efu wi abi a gwenti fu sori trawan switifasi, srefi te wi no sabi den trutru, dan wi o kisi blesi na wan fasi di wi no ben fruwakti.

Te yu e leisi tra Bijbel, dan yu e si taki na a tekst pe Paulus ben e taki a sani disi, tra tekst de tu di e tyari yu go na Genesis kapitel 18 nanga 19 di e taki fu a tori fu Abraham nanga Lot. Na ini den tu kapitel disi wi e leisi fa engel ben e sori densrefi na Abraham èn na Lot fu gi den wan prenspari boskopu. A boskopu di Abraham  kisi ben e sori taki Gado ben o gi Abraham wan manpikin soleki fa a ben pramisi en kaba. A boskopu di Lot kisi ben sori taki Gado ben o pori den foto Sodom nanga Gomora, ma taki a ben o frulusu Lot.​—Genesis 18:1-10; 19:1-3, 15-17.

Te yu leisi den tekst di kari dya, dan yu o si taki Abraham nanga Lot ben sori switifasi gi sma di ben kon na den, aladi den no ben sabi den. Iya, na ini Bijbel ten, sma ben e sori switifasi gi ala sma di ben kon na den, awansi na mati, famiri, noso sma di den no ben sabi. A sani dati ben de wan gwenti èn wan sani di den ben musu fu du. Fu taki en leti, a Wèt di Gado gi Moses ben taki dati den Israelsma ben musu sorgu gi trakondre sma di ben e libi na ini Israel (Deuteronomium 10:17-19). Aladi a ben de wan gwenti fu sori sma switifasi, toku wi e si taki Abraham nanga Lot du moro leki san den ben musu du, soleki fa a Wèt ben sori bakaten. Den ben meki furu muiti fu sori switifasi gi sma di den no ben sabi èn Gado ben blesi den fu dati.

Abraham sori switifasi èn dati meki Gado blesi en nanga wan manpikin. Ma disi tyari blesi kon gi wi tu. Fa so? Gado gebroiki Abraham nanga en manpikin Isak fu du prenspari sani di ben abi fu du nanga a wani fu En. Den tron prenspari sma na ini a famiri pe a Mesias Yesus ben o komoto. A fasi fa Abraham nanga Isak gi yesi na Gado, ben sori fa libisma ben o kisi frulusu fu di Gado sori den lobi nanga bun-ati.​—Genesis 22:1-18; Mateyus 1:1, 2; Yohanes 3:16.

Den tori disi e sori krin san Gado e fruwakti fu den sma di a lobi èn o prenspari a de gi en te wan sma e sori switifasi. A no de wan sani di wi kan du o ten wi wani, ma na wan sani di Gado taki dati wi musu du.

Bijbel e taki dati na ini a ten fu wi furu sma ’no ben o de nanga tangi. Den no ben o tai hori na trawan èn den no ben o lobi trawan’ (2 Timoteyus 3:1-3). A musu fu de so taki yu e miti den sortu sma dati ibri dei. Ma toku dati no musu tapu wi fu sori trawan switifasi. Bijbel e taigi Kresten: „Te wan sma du unu wan ogri, un no musu du a sma dati ogri baka. Pruberi fu du sani di ala sma feni bun.”​—Romesma 12:17.

Wi kan meki muiti fu tan sori trawan switifasi. Bijbel e taki: ’Ibri sma di lobi trawan, e kon sabi Gado.’ Wán fasi fa wi kan sori a lobi fu wi, na te wi e sori trawan switifasi (1 Yohanes 4:7; 1 Korentesma 13:4). Iya, te wi e sori tra libisma switifasi, dan wi e kon leri sabi Gado moro bun èn dati e meki wi moro koloku. Di Yesus hori wan takimakandra na tapu Olèif-bergi, a taki: „Koloku fu den sma di abi sari-ati [noso switifasi] gi trawan, bika sma o abi sari-ati [noso  switifasi] gi den. Koloku fu den sma di abi wan krin ati, bika den o si Gado.”​—Mateyus 5:7, 8.

Luku na eksempre fu Aki, wan yongu uma fu Yapan di abi tu manpikin. En mama dede sondro taki a ben fruwakti dati èn baka dati a kon lasi-ati. Son leisi a ben firi so brokosaka taki a ben abi fu go na datra. Ne wan osofamiri froisi kon na ini en birti. No so langa pasa, a masra na ini na osofamiri disi kon lasi en libi fu di a kisi mankeri èn now a mama wawan ben abi fu sorgu gi feifi yongu pikin. Fu di Aki ben sari na osofamiri, meki a du muiti fu tron wan mati fu a mama nanga den pikin fu en. A prati nyanyan nanga den èn krosi di a no ben gebroiki moro. A prati tra sani tu nanga den. Aki du ala san a man fu yepi na osofamiri èn na so a kisi ensrefi baka. A kon frustan taki san skrifi na ini Bijbel tru. Drape skrifi: „Wan sma sa de moro koloku te a e gi sani, leki te a e kisi sani” (Tori fu den apostel 20:35). Iya, te yu e firi brokosaka, dan a moro bun sani di yu kan du na fu sori trawan switifasi.

Yu no abi fu pai furu moni fu sori switifasi. Boiti dati, a no koni sma noso tranga sma nomo man sori switifasi. Te yu e lafu nanga wan trawan, noso e taigi en wan sani fu trowstu en, noso e yepi en èn e gi en wan pikin kado, dan a sma dati o breiti trutru nanga san yu e du gi en. Efu yu nanga wan sma musu tanapu e wakti na ini wan rèi, dan a o breiti te yu meki a go fosi. Te yu no sabi san fu du noso san fu taki, dan taki noso du wan bun sani. Na a bigin fu na artikel disi wi ben taki fu wan yonkuman. A switifasi di na owru zendeling sori a yonkuman disi, naki en ati. A sani di a du, du moro gi a yonkuman leki san a taigi en. Dati meki a no musu fruwondru wi te Gado e fruwakti fu den anbegiman fu en taki den musu „lobi fu du bun”.​—Mika 6:8.

A pikinso switifasi di yu e sori trawan, kan du furu gi den kaba. Te yu e du dati fu di yu lobi den èn spesrutu fu di yu lobi Gado, dan dati kan meki ala sma firi prisiri. Srefi te sma no de nanga tangi taki yu sori den switifasi, dan dati no de fu soso. Gado breiti nanga san yu du. Bijbel e gi wi a dyaranti taki te wi e sori trawan switifasi, dan yu kan taki dati na leni wi „e leni Yehovah” wan sani (Odo 19:17). Fu san ede yu no e suku okasi fu sori sma na yu lontu switifasi?