Na ini Persiakondre, lanti ben poti sma fu tyari lantibrifi gowe di ben e taki fu prenspari tori fu a kondre. A Bijbel buku Ester e taki fa a Persia sistema disi ben e wroko: „Mordekai meki den sekretarsi skrifi den brifi na ini a nen fu Kownu Ahasferos, dan a teki a linga fu Kownu èn a poti stampu na tapu den brifi. Baka dati a meki boskopuman di e rèi asi, tyari den brifi gowe. Den asi ben de spesrutu asi fu Kownu èn den ben man lon esi-esi” (Ester 8:10). A Gran Kownukondre Rome ben abi wan srefi sortu seti fu tyari lantibrifi nanga brifi fu a legre go na tra presi.

Ma a seti disi no ben de fu tyari brifi fu tra sma gowe, soleki den brifi di na apostel Paulus nanga trawan ben skrifi. Wan gudu sma ben kan seni wan srafu fu en fu tyari wan brifi gowe. Ma nofo tron sma ben seni brifi gowe nanga mati fu den, noso nanga sma di den no ben sabi srefi, ma di ben go na a kontren pe a sma di ben musu kisi a brifi ben tan. Sma ben kan seni wan brifi gowe nanga famiriman, mati, srudati, noso bisnisman. Ma a no de fu taki dati a sma di ben tyari a brifi gowe ben musu de fu frutrow èn a no ben musu meki noti pasa nanga a brifi. Soleki fa Bijbel e sori, dan a kan taki Paulus aksi Kresten brada di ben teki waka, fu tyari wan tu fu den brifi fu en gi sma.​—Efeisesma 6:21, 22; Kolosesma 4:7.

Na ekonomia fu a kondre ben drai moro furu fu di sma ben e prani gron, ben e kweki meti èn ben e kenki gudu gi tra warti sani. Bijbel e taki fu wowoyo di ben de na a portu fu a foto. A e taki fu „Skapu-portu”, „Fisi-portu”, nanga „Brokopatu-portu” (Nehemia 3:1, 3; Yeremia 19:2). A kan taki den nen disi ben sori sortu sani sma ben bai noso seri na den portu disi. Bijbel e taki tu fu „a strati fu den bakriman” fu Yerusalem èn a e taki fu difrenti tra sani di sma ben bai noso seri.​—Yeremia 37:21.

Ma omeni moni sma ben pai gi sani? Wan buku di e fruklari sani fu Bijbel e taki: „Na ini den hondrohondro yari di pasa, den prijs fu sani ben e kenki doronomo èn a muilek fu taki soifri omeni yu ben musu pai gi wan spesrutu sani.” Ma owruten dokumenti nanga Bijbel e sori taki srefi na ini a ten dati sani ben kon moro diri te moni ben lasi waarde. Fu eksempre, sma gwenti bai noso seri srafu gi pisi moni. Den ben seri Yosef gi 20 pisi solfru. Dati ben de a moni di sma ben pai gi wan srafu na ini a di fu 18 yarihondro fosi Krestes (Genesis 37:28). Dri hondro yari baka dati sma ben pai 30 solfru moni gi wan srafu (Eksodes 21:32). Na ini a di fu aiti yarihondro fosi Krestes, sma ben pai 50 pisi solfru gi wan srafu (2 Kownu 15:20). Tu hondro yari baka dati, na a ten di a Gran Kownukondre Persia ben e tiri, sma ben pai 90 pisi solfru gi wan srafu noso moro leki dati srefi. Soleki fa a sori, dan sani ben kon moro diri na ini owruten neleki fa dati e pasa na ini a ten disi.